¹ Po uwandumi wa fayivi akaputa ipati lyache Nkhalinga ulutondwa lolukawa ukufuma ku mwanya. Ulutondwa lukapewa ichighulilo cha kuchibwina cha chisi ichikali. ² Akighula ichibwina cha kuchisi ichikali, ngati lyosi ilya muchibwina cha moto. Izuba ni mphepo vikafita ni lyosi lyakufuma mu chibwina, ³ Aba makantha bakafuma mu lyosi ukwiza pa chisu cha pansi, sona bakapewa amaka pachisu ngati bo bankhonya. ⁴ Vikabuziwa ukuti vitakanange nachimo pachisu ngati isote, pamo ichibyaliwachimo icha gilini pamo ikomo, Loli bene abanthu bo bate nichimanyilo cha Chala pa cheni chabo. ⁵ Vitakapeghiwa amazaza ghaku komela abanthu bala, Loli ukuti vibayinvwe imyezi fayivi. ulufundo lwabo lube ngati kubabwa kwa nkhonya nanthi aluma umunthu. ⁶ Mu masiku ghalanyene abanthu bazukulondanga infwa loli batazukuyagha. bazukulonda hee ukufwa loli infwa yizukubasamala. ⁷ Aba makantha bakaboneka ngati mphunda zyozisenganizye ukuya ku bulwe. Pa mitu yabo pakaba chimo ngati mphumphu ya golide, sona pamaso pabo pakaba ngati pa banthu, ⁸ Bakaba ni sisi ngati lya banakazi, na mino ghabo ghakaba ngati gha nkhalamu. ⁹ Vikaba ni vyakuchingila pachifuba ngati vya kuchingila vya chela, sona ichongo chamapapindo ghabo chikaba ngati chongo cha vingolo ni mphunda zikusamala ukuya ku bwite. ¹⁰ Bakaba nu tumisinda nu tubolela ngati twa bankonya; mu misinda mukaba amaka aghanangila abanthu pa myezi fayivi. ¹¹ Bakaba nu mwene uwa kubatangilila uwa chibwina cha chisi. Izina lyache mu chihebeli akaba we Abaddoni, sona mu chi giliki akaba ni zina Apoliyoni. ¹² Inthamyo iya bwandilo yamala. Linga! ukufuma pa iyi pakwiza inthamyo zibili. ¹³ Uwandumi wa sikisi akalizya ipati lyache, sona nkhivwa amazyu ukufuma ku mphembe zya chighemo cha golinde zyo zikabikiwa pamaso pa Chala, ¹⁴ Zikanena ku wandumi wa sikisi yo akaba ni pati, ''Basatule abandumi folo bo baka pinyiwa palusoko ulukulu ulya yufuleti.'' ¹⁵ Abandumi folo boba kasengania pakabalilo kalanyene, pisiku lila, umwezi ghula, nu mwaka ghula bakasatuliwa ukuti bakome uwabutatu uwa banthu. ¹⁶ Inambala ya balwa bwite bobakaba pasizi pa mphunda bakaba tu handiledi sauzande nkivwa inambala yabo. ¹⁷ Umu mo nkhalingila imphunda mu chilota chane nabo bakakwelapo: Ivyapachifuba vyabo vikaba vichesamu, ivifitufitu sona vya yelo, imitu ya mphunda yikayana ngati ya nkhalamu, sona mu mulomo wabo mukafuma umoto, ilyosi, sona ni chilungula cha moto. ¹⁸ Uwa butatu wa banthu akakomiwa ni vinthu vitatu ivi: umoto, ilyosi, ni chilungula cho chikafuma mu milomo yabo. ¹⁹ Pakuti amaka gha mphunda ghakaba mumilomo yabo na mumisinda yabo_pakuti imisinda yabo yikaba ngati njoka, zyozikaba nimitu yoyikabika ivilonda pa banthu. ²⁰ Abanthu bonsi bo batakakomiwa ni vinthu ivi, batakalapa ku mbombo zyabo zyo bakabomba, pamo batakaleka pa kwiputa ivi mphepho sona ni vifwani fwani vya golide, siliva, nivyela, amabwe, na makomo_ivinthu vyo vitangalinga, ukwivwa, pamo ukwenda. ²¹ Pamo batakalapa ukukoma kwabo, kubulozi, ku bwamalaya bwabo, pamo na kumbombo zya bwivi bwabo.