¹ Akanena nabo, '' naloli inkhubabuzya, balipo bamo bobali panonyene babo tebakawonje ubufwe bobatachibweni ichinamwene chachala bo chikwiza na maka. ² Bopendapo amasiku sikisi u Yesu akamusenda u Petulosi, u Yakobe nu Yohani ukubuka nabo kuchipili, akabuka kumwene akabaleka bene. Akapiluka bobakumulinga panthazi papabo. ³ Imyenda yache yikapiluka yikaba miswepu hee ukuti yikalasanga mumaso, yikaba miswepu ukulusya chonsi ichinthu ichiswepu pachisu chapansi sona atangabapo yumo yo angachapa pa chisu chapansi. ⁴ U Eliya nu Mozesi bakaboneka kukwabo sona bakanenezanianga nu Yesu. ⁵ U Petulosi akamula nukumubuzya u Yesu, '' Rabbi, chalinji ukuti twikale panonyene, ivitembe vitatu, choka chibe chako, chimo chibe cha mozesi nicha Eliya.'' ⁶ ( Atakamanyanga navyo akanenanga pakuti akatetemanga ubogha bukamukola.) ⁷ Ilibingu likiza nukubakupikila. Izyu likafuma mwibingu, '' uyu yo mwana wane yo imughanite, mumwivwilenge.'' ⁸ Umwakuchenuka bakalinga uku nu nuku batakalinga nayumo yo akabapo loli akaba we Yesu mwene. ⁹ Bobakwisika ivipili akababuzya ukuti batakamubuzye umunthu nayumo vyo bavilinga mpaka umwana wa munthu ize azyuke kubufwe. ¹⁰ Po bakavinda batakanena nakumo, loli bakanenezanianga ukuti choni, '' ukuzyuka kubufwe,'' chocho angangánamula. ¹¹ Bakamubuzikizya , bakati choni cho abamanya ndaghilo bakuti inthi akandile u Eliya pakwinza. ¹² Akababuzya akati u Eliya weyo akandila ukwiza ukuyania vyonsi. visimbiwe ukuti umwana wa munthu abaghile ukuti atamiwe mu vinthu ivinji numupamanthila. ¹³ Loli inkhubabuzya ukuti u Eliya akiza loli bakabomba izya bwighane bwabo ngati mo zisimbiwe izyache. ¹⁴ Bobiza kubamanyili bache, bakalinga abanthu abinji babazyungulile sona abamanya ndaghilo bakudalinkhana nabo. ¹⁵ Nakalubilo bobamulinga u Yesu, abanthu bakaswigha sona bakasamalila kukwache nukumulamuka. ¹⁶ Akababuzikizya abamanyili bache, '' mukudalinkhana ichoni nabanthu aba? ¹⁷ Yumo ukufuma mubanthu bobakabungana akamwamula, '' manyisi nizite numwana kukwako, ali nimphepo yoyikumukanizya ukunena ( chinunu). ¹⁸ Yikumukanizga ukunena sona yikumuwisya pansi, umutatafulo wukufumanga kumulomo, akusyeketulanga amino, sona akumililanga umubili wukukala. Imbabuzizye aba manyili bako ukuti bayifumye loli bapotizwe.'' ¹⁹ Akabamula akati, '' inkhulilo yakusita ukwitika, inthi nikalenge numwe mupaka liyi? inthi jimbilile mpaka liyi? za nawe kukwane. ²⁰ Bakamutwala umulumendo kwa Yesu. Bo umuzimu uwubibi wamulinga u Yesu, nalubilo chikamusumba umwana yula uwachizilisi, umulumendo akawa pasi nukufumya umutotofulo ku mulomo. ²¹ U Yesu akamubuzya u tata wache, '' vyabombiwa kalinga ivyamusango wunonyene?'' U wise akati, ''ukufuma ku bwana bwache.'' ²² Chikumuwisizyanga pamoto na muminzi sona chayezya hee ukuti chimukome. Nanthi ungabombapo zimo, ube nichisa nuswe sona ututule. ²³ U Yesu akamubuzya, '' nanthi ningakwanisya?'' vyosi ivinthu vipepe bwaka pala yo akusubalila. ²⁴ Nalubilo u wise wa mwana akalila sona akati, '' nkhusubila nthula nemusita kusubalila.'' ²⁵ Bo u Yesu alinga ibumba likubasamalila, akazikalipila imphepo imbibi akati, '' mwemphepo imbibi umwe mufumemo nivizilisi, ubwachinunu mufumemo mumwache sona mutakize mwinjilemo lumo. ²⁶ Zikalila hee nukumuzilisya umulumendo sona zikafuma umulumendo akaboneka ngati afwile, abanthu abinji bakanena ukuti '' afwa.'' ²⁷ Loli u yesu akamukola panyobe, nukumunyamusya po umulumendo akimilila. ²⁸ U Yesu bo injila mu nyumba abamanyili bache bakamubuzikizya ku lubazu, '' choni cho uswe tutangafumya imbibi?'' ²⁹ Akababuzya akati, '' inthamyo ngati iyi yitangafuma pene pala ukwiputa.'' ³⁰ Bakafumapo bakaya benda mu Galileya. Atakalondanga ukuti yumo amanye ko bakaba. ³¹ Pakuti akamanyisyanga abamanyili bache, akababuzya akati, '' umwana wa munthu inthi abikiwe munyobe zyabanalume, sona inthi bamukome. Nanthi bamukoma, penda amasiku matatu, inthi akazyuke ku bufwe.'' ³² Loli batakivwisya vyo akanena sona bakowopa pakumulalusya. ³³ Po bakaya ku Kaperenawumubo binjila munyumba, '' akabalalusya akati, '' mwanenezanianga ichoni munzila?'' ³⁴ Loli bakateba bwaka. Pakuti akabamanya pakuti bakadalinkhananga yo wesongo pabanyabo. ³⁵ Bo ikala pansi akabitizya bonsi twelovu poka. nukubabuzya ukuti, '' nanthi yuyo akulonda ukuba wabwandilo abaghile ukuti abe wabumalilo pa bonsi sona abe mutumwa wabonsi.'' ³⁶ Akamusenda umwana umunandi nukumubika pakasi papabo, akamukola panyobe sona akanena nabo bonsi. '' ³⁷ Wensi yuyo akumupokela umwana mwizina lyane kokuti akumphokela une, wensi yuyo akumphokela une atakumphokela une loli yuyo akanthuma une.'' ³⁸ Yohani akamubuzya akati, '' manyisi, twamubweni yumo afumyanga imphepo imbibi mwizina lyako loli twamulesizye chifukwa chakuti atakukonkha uswe.'' ³⁹ Loli u Yesu akati, '' mutakamulesyenge, pakuti atalipo nayumo yo inthi akabombe imbombo mwizina lyane sona panthazi anene ivibibi papane.'' ⁴⁰ Wensi yo atakulwana nuswe koti witu. ⁴¹ Wensi yuyo akukupa ulubako ulwaminzi aghakung' wa mwizina lyane chifukwa chakuti ali kumbali ya kilistu naloli inkhubabuzya tekapotwe ivilipwa. ⁴² Wensi yuyo nanthi atakubapokela abana bobakunitika une akubavulungania. Chali chiza ukuti bamufunde pabukulu pakumupinya ibwe ilikulu musingo nukumusumbila mu nyanja. ⁴³ Nanthi inyobe yoyo yingananga uyidumule chingaba chiza ukuti winjile ku chinamwene icha bumi bwa bwabwila nabwila nukuti ube ninyobe zibili loli uye ku moto uwasita kuzimya. ⁴⁴ Ukonyene ko insomi zitakufwa sona wope umoto wutakuzima lumo. ⁴⁵ Nanthi ichinama chocho chikunangisya uchidumule, chochiza ukuti ukinjile ku chinamwene chakumwanya ichabumi bwabwilanabwila ukupota ukuti winjile ku moto wabwilanabwila loli uli ni vinama vyonsi. ⁴⁶ Kuko kuli insomi sona zitakufwa sona umoto wutakuzima lumo. ⁴⁷ Nanthi iliso lyako likukupuvya ulikolobole lifume ulitaye, chochiza ukuti ukingile kuchinamwene chachala ni liso lyoka nukuti ube namaso ghonsi loli ukaye kuchibwina cha moto. ⁴⁸ Kuko insomi zitakufwa sona umoto wutakuzuma lumo. Pakuti umunthu wesi inthi akaswepe nu moto. ⁴⁹ Wensi inthi akapye. ⁵⁰ Imbeya yonyiza, loli nanthi yasupa ungayinyosezya bulibuli ukuti yinone sona? mube ni mbeya sona mube nu mutende pakasi pa munthu nu munyanche.