¹ Bo akabalilo ka lusekelo lwa chibama chakusita chilungo kali papipi, cho chikwitiziwa pasa. ² Abaputi abasongo na basimbi bakalondanga inzila mo bangamukolela u Yeso, pakuti bakoghopanga abanthu. ³ Pala u Satana akamwinjila u Yudasi, yo akitiziwanga Isikaliyoti yo akaba wa bamo twelovu (12). ⁴ U Yudasi akabuka ku baputi abasongo na basongo nukunenezania nabo angamupulekela u Yeso kukwabo. ⁵ Bakahoboka nukwitikizya ukumupa amakopala. ⁶ Akitika sona akanda pakulonda akabalilo akakuti angamupelekela ku kwabo ukuti ubumba litakazimanye. ⁷ Bo isiku lya chibama ichisita chilungo lyafika po umwana wa Ng'onzi akakomiwa pa kabalilo ka pasa. ⁸ U Yeso akatuma u Petulo nuYohani nukubabuzya ukuti, ''Buka mutunozyele ichakulya cha pasa, ukuti tulye.'' ⁹ Bakanena kukwache, '' Ka walonda ukuti tuye tunozyele kwiyi?'' ¹⁰ Akabamula akati, ''Linga, pala mwinjila bwaka mukaya akakulu, inthi mukomane nu munthu anyamwile insntha ya minzi. Mumukonkhezye mpaka ku nyumba yo akwinjilamo. ¹¹ Po munene ku mwenecho wa nyumba , 'U Manyisi akuti kukwako, '' Ka ichipinda chili kwiyi ningalyelako ulusekelo lwa pasa na bamanyili bane?''' ¹² Akuya pakubalanga ichipinda ichikulu cho chili pamwanya pa chinyabo cho chiyaniwe kale. Momo muyanizyemo vyonsi.'' ¹³ Po bakabuka, sona bakavyagha vyonsi ngati mo anenile kukwabo. Po bakayania ichakulya cha pasa. ¹⁴ Bo akabalilo kakwana, akikhala pansi na bakonkhelezi bache. ¹⁵ Po akababuzya akati, ''Nalonda nkhani pakuti indye poka numwe ulusekelo lwa pasa bo nchili pakuyimba. ¹⁶ Pakuti nkhubabuzya ukuti, nthakwiza ukulya poka numwe mpaka vyonsi vifisiwe mu bu Mwene bwa Chala.'' ¹⁷ U Yeso akasenda ukomeji bo apalizya akati, ''Senda ichi nukugabana. ¹⁸ Pakuti nkhubabuzya, nthakwiza pakung'wa sona u vinyo mpka ubumwene bwa Chala bwize.'' ¹⁹ Po akasenda ichibama, bo apalizya, akachimenyula nu kubapa, nukuti, ''Ughu mubili wane, gho ghukupelekiwa kukwinu. Mupangenge ichi ukuti munkhumbukilenge.'' ²⁰ Akanyamula u komeji uwakuyana bwaka bo bamala pakulya ichakulya cha chamabwila, nukuti, ''Ukomeji uyu lufingo ulupya lidaba lyane, lyo likwitika chifukwacha umwe. ²¹ Loli mube mye. Inyobe zya yumo yo ankhupeleka ali poka nune pano pa tebulo. ²² U Mwana wa Munthu naloli akubuka namo vikabatikiliwa. Loli soka kwa munthu yo akumupeleka ku balwani. ²³ Po bakanda pakunenezania pakasi papabo ukuti wewenu mu mwabo yo angabomba ivi. ²⁴ Pakaba sona ukudalinkhana pakasi papabo ukuti yo angaba we songo pa bonsi. ²⁵ Akanena ku kwabo, ''Abamwene aba banthu ba kunzi bali namaka pa banthu babo, sona bo bapeghiwe amaka bakwitikiziwa babombi bakubomba akiza. ²⁶ Loli te mo vingabela kukwinu. Mumalo mwache, muleke yo we songo papinu abe munandi, sona yo akwisenda ngati ali pamwanya abe ngati wa mbombo. ²⁷ Ka wewenu we songo, yo akwikala pa tebulo nukulya pamo yo akumubombela? Ka te weyo akwikhala pa tebulo nukulya? Loli kukwinu indi ngati ne mubombi. ²⁸ Loli mwebamo mwikhala nune mu nthamyo zyane zyonsi. ²⁹ Nkhwiza pakubapa ubumwene, ngati mo u tata ampelile ubu mwene, ³⁰ pakuti mungalya nukung'wa pa tebulo lyane mu bumwene bwane, nukwikhala pa vitengo nukulonga amaluko twelovu agh ba Izilayeli. ³¹ ''Simoni,Simoni,cheba,u Satana akukulonda, ukuti angakupeta ngati yo ngano. ³² Loli nakwiputila, ukuti ulusubilo lwako lutakapotwe. Bo wapinduka sona kukwane, ubakazye abakamu bako.'' ³³ U Petulo akanena ku kwache, ''We Mwene, newakwisengania pakubuka nuwe konsi ku jele na kumfwa.'' ³⁴ U Yesu akamula, ''Nkhukubuzya, Petulo, umukolwe te atakokolike isiku ili, bo uchili utankhanite katatu ukuti utamenye une.'' ³⁵ U Yesu akati kukwabo, ''Bo nabatuma kusita chikwama,pamo ichola cha pa bulendo,pamo insapato, ka mukatawiwapo chimo?'' Bakamula, ''Nachimochimo.'' ³⁶ Akati kukwabo, loli ilelo, wensi yo ali na kachikwama,muleke anyamule, sona yo ali nichikwama cha pa bulendo muleke asende. Wensi ate nu panga aghulizye inkhanzo yache nukughula u panga. ³⁷ Pakuti nkhubabuzya, vyo visimbiwe ivyane vibaghile vifisyike, 'Bakabelengiwa poka naba mbibi.' Pakuti vyo vikuneniwa ivyane vibaghile vifisiwe.'' ³⁸ Po bakanena, '' Mwene, linga! Pano pali abapanga babili.'' Akati kukwabo, ''Bakwana.'' ³⁹ U Yeso akafumapo, ngati mo akabombelanga bwilebwile, ku lupili lwa ku Olive, sona na bamanyili bakamukonkhanga. ⁴⁰ Bo bafika, akati kukwabo, ''Iputani ukuti mutakinjile mu ngelo.'' ⁴¹ Akabuka pa butalipo loli patti ibwe lingafika nanthi bangalisumba, akafugamila nukwiputa, ⁴² nukuti,''Tata, nanthi wighanite,fumyapo ukomeji uyu papane. Chitakabe mo une nkhulondela, loli ubwighane bwako bo bubombiwe.'' ⁴³ Uwnthumi ukufuma kumwanya akamubonekela, nukumukazya. ⁴⁴ Bo akunyala mu nyinong'ono, akiputa mwakufikapo, sona amatwinsi ghache ghatonyela pansi ngati lidaba. ⁴⁵ Bo amala pakwiputa, akabuka ku bamanyili bache sona akabagha baghonite pakuti bakaba ni chitima ⁴⁶ akabalalusya, ''Ka choni cho mughonite? nyamuka nu kwiputa, ukuti mutakinjile mu ngelo.'' ⁴⁷ Bo achili akunena, teba, ichibukatila chikafika, nu Yudasi, uwa bamo twelovu, abatangilile. Akiza papipi nu Yeso nukumufyofyompha, ⁴⁸ loli u Yeso akanena kukwabo, ''Yudasi, naloli ukumupeleka ku balwani u Mwana wa Munthu pa kumufyofyompha?'' ⁴⁹ Po bo bakamuzingilila u Yeso balinga cho chikabombwanga, bakati, ''Mwene, ka tungabomvya aba panga bithu?'' ⁵⁰ Weka uwabamo akamudumula uwa mbombo wa ba songo wa ba puti, nukudumula ikhutu lya ku ndyelo. ⁵¹ U Yeso akati, ''Mphela leka!'' Akakola ikhutu lyache, nukumupozya. ⁵² U Yeso akati ku basongo ba ba puti, na ku basongo ba tempeli, sona na ku balongozyi bo bakiza pakumukola, ''Ka choni cho mukwiza kukwame ngati ne mwivi na ba panga ni ndugu? ⁵³ Po isiku nu siku nabanga numwe mu tempeli, loli mutakankholanga. Loli ulu aka kabalilo kinu, sona nu mwabi wa chisi.'' ⁵⁴ Bakamukola nukubuka nawe kwa muputi usongo nkhani. Loli u Petulo akamukonkhanga pa butalipo. ⁵⁵ Bo bapemba umoto pakasi mu malo aghakulongelamo inongwa bakikhala pansi poka, u Petulo akikhala pakasi papabo. ⁵⁶ U mulinduyumo uwa mbombo akamulinga ali pakota nabo umoto nukuti, ''U munthu uyu akaba poka nawe.'' ⁵⁷ Loli u Petulo akakana, ''We mwanakazi, nthamumenye.'' ⁵⁸ Bo pendapo akabalilo kanandi yumo sona akamulinga, nukuti, '' Nuwe bwaka we wabamo.'' Loli u Petulo akati, ''Munthu, tenene.'' ⁵⁹ Bopendamo akabalilo umunthu yumo akasimikizya nukuti, ''Naloli u munthu uyu akaba nawe, sona mu Galileya.'' ⁶⁰ Loli u Petulo akati, ''We munthu, Nthavimenye vyo ukunena.'' Aponyene bo achili akunena umukolwe akakokolika. ⁶¹ Akang'anamuka, u Mwene akamulingisya u Petulo, sona u Petulo akakumbukila amazyu gha Mwene, po akanena kukwache ukuti, ''Bo umukolwe atakokolikite ilelo ukwiza ukunkhana katatu.'' ⁶² U Petulo akafumila kunzi nukulila nkhani. ⁶³ A banthu bo bakamulindililanga u Yeso bakamobezyanga nukumuma. ⁶⁴ Bakamuvwinkha ku minso sona nukumulalusya, nukunena, ''Lotela! Ka wewenu yo akuchaya?'' ⁶⁵ Bakanena ivinthu ivi ivyakumutuka u Yeso, nukumutamanthila. ⁶⁶ Bo kwacha abalongozyi ba banthu bakabungana poka, bonsi abaputi abasongo na basimbi. Bakiza nawe pamaso pa balongozyi. Bakamusendela ku nyumba inkhulu ⁶⁷ bakati, nanthi we Kilisiti, tubuzye.'' Loli akati kukwabo, ''Nanthi nababuzya, te mwivwisye, ⁶⁸ sona nanthi ningabalalusya, te mwize mwamule. ⁶⁹ Ukufuma pakabalilo aka, u Mwana wa Munthu akwiza pakwikhala ku nyobe iya ndyelo mu maka gha Chala.'' ⁷⁰ Po bonsi bakati, ''Ka koti po we Mwana wa Chala?'' U Yeso akati kukwabo, ''Mwanena mwebene ukuti nene.'' ⁷¹ Po bakati, ''Ka cho tuchili tukulonda abakaboni abanji? Pakuti twiyivwila swebene ukufuma mu mulomo mwache.''