¹ Polelo mumasiku ghala, ukayisala ogasitasi akati inthi kube ukubelenga kwa banthu babo bakwikala muchisu. ² Kano kakaba kabwandilo ukubelenga abanthu po u Kwiliniyasi akaba mulongozi wa Siliya. ³ Po wensi akabuka kukaya kache pakuti aye asimbisye. ⁴ U Jozefu wepe akabuka ku Galileya, mu kaya ka Nazareti, ukuya ku Yudeya, kukaya ka Daveti, kokakitiziwanga ukuti Betelehemu, chifukwa akaba wa lunyungu lwa Daveti. ⁵ Akabuka pakulembesya poka nu Mariya yo aka muzingilila sona ninthumbo. ⁶ Popakiza akabalilo bobali kulanyene, kakafika akabalilo akakuti u Mariya apape umwana. ⁷ Akapapa umwana umulumendo, umwana wache uwabwandilo sona akamunienga mumyenda nukumubika muchipondo, chifukwa chakuti ghatakabako amalo aghakuti bamuwoneke umwana. ⁸ Bakabako abadima ng'onzi mukaya kala babo bakikalanga munkholongo, bakalindililanga ivinyamana vyabo nubusiku. ⁹ Uwanthumi wachala akababonekela, po ubuchindami bwa Chala bukabazyungulila pobakizula nubogha. ¹⁰ Po uwanthumi akanena nabo, ''mutakowopenge, chifukwa niza namazyu aghiza, ghagho inthi ghabike ulusekero ulukulu pa banthu bonsi. ¹¹ Ilelo umupoki apapwa kukwinu mukaya aka Deveti! we Kilisitu umwene! ¹² Ichi chochimanisyo cho inthi chipeghiwe kukwinu: Inthi muye mumwaghe u bonda bamuzingite mumienda awonite muchipondo.'' ¹³ Umwakuchenukizya kukiza uwanthumi nichilundilo chabanthu ukufuma kumwanya, chikumutunvia uChala nukuti, ¹⁴ ''Ubuchindamu bwachala uwakumwanya, sona umutende wube pachisu mubanthu babo akuhoboka nabo,'' ¹⁵ Kakiza akabalilo bo abanthumi bakafuma papabo nukuya kumwanya, abadimi bakabuzania benebene, '' apa za tubuke ku Betelehemu tuye tulinge chochabombwa, cho u Mwene atumanyisya,'' ¹⁶ Bakendelezya nukubuka nukuya ukumwagha u Maria, u Jozefu, sona numwana, yuyo akawona muchipondo. ¹⁷ Bobamulinga, bakachinena chicho bakabuziwa nizya mwana uyu. ¹⁸ Bonsi bobakivwa bakaswigha kuzyozikaneniwa kukwabo nabadimang'onzi. ¹⁹ Loli u Maria akendelela ukwinong'nona pavinthu vyonsi vyo akivwa, akavisunga mumoyo. ²⁰ Abadimi bakanyokela, ukumukwezya nukumwimbila uchala ku vyonsi vyobakivwa sona bakavilinga, ngati mumo vikaneneliwa kukwabo. ²¹ Bolyakwana isiku lya nambala eyiti, bo adumuliwa, akitiziwa ukuti Yesu, izina lilyo akapeghiwa nuwanthumi bo achili atingile munthumbo yanyina. ²² Pobakabuzikizyanga ubwingi bwamasiku ghakuswepa boghapululila ukuyana nindaghilo zya Mozesi bakabuka nawe kwi Tempeli ku Yerusalemu ukuti bamutwale kwa Chala. ²³ Ngati mumo zikasimbiliwa mundaghilo zya Chala, '' Umwana wensi umwanalume yo akwiwula inthumbo alipatulisiwanga kwa Chala.'' ²⁴ Pobakapeleka isembe ukulinga namumo vikaneneliwa mundaghilo zyala Chala,'' inkhunda zibili pamo abana ba nthozi babili.'' ²⁵ Linga, pakabako umunthu yumo mu Yerusalemu yuyo izina lyache akaba we Simiyoni, sona umunthu uyu akaba muwolosu nuwakwipeleka. Akalondanga mumo angachinyosezya ichisu cha Izirayeli, sona umbepo wa Chala akaba papache. ²⁶ Vikavumbuliwa kukwache numbepo mwikemo ukuti te akabulinge ubufwe bo achili atamubweni u Mwene u Kilisiti. ²⁷ Umwakulongoziwa numbepo, u Simiyoni akiza mwa Tempel. Bo abapapi biza numwana u Yesu, ukuti bamubombele ukulingana nindaghilo, ²⁸ akamusenda ukumubika munyobe zyache sona nukumupalizya uchala, sona po akati, '' ²⁹ Polelo leke umubombeli wako abuke mumutende, Mwene ukulingana nizyu lyako. ³⁰ Pakuti amaso ghane ghabulinga ubupoki, ³¹ bubo wabusengania pamaso gha banthu bonsi: ³² Ubwelu bwabusetuli kubakunzi sona ubuchindamu nakubanthu bako aba Izirayeli'' ³³ Uwise nu nyina bakaswigha pazizyo zikaneniwa nayu. ³⁴ U Simiyoni akabasaya sona akanena kwa nyina ukuti, '' Linga, u mwana uyu asebiwe ukuwa nukukwela kwa banthu abinji mu Iziraeli sona nichimanyikwilo chicho chikaniwe- sona ichipeni chililasa umoyo wako- ³⁵ pakuti inyinong'ono zya myoyo iyinji zingavumbuliwa.'' ³⁶ Umuwonela yuyo akitiziwanga Anna akabapo. Akaba mwana umwanakazi uwa Fanuweli ukufumila mu luko lwa Asha. Akaba mugosi hee. Akikala nu mulume kumyaka seveni ukusita ukumumanya umwanalume, ³⁷ sona akaba mufwilwe ku myaka eyitefolo. Atakalilekapo i Tempeli loli akabombanga pakufunga sona ninyiputo, ubusiku nu musanya. ³⁸ Pakabalilo kalanyene akiza kupipi nabo nukwanda ukumuslifya u Chala, sona akanena nizyamwana ku bonsi babo bakalindlilanga ukung'anamuka kwa Yerusalemu. ³⁹ Bobamalizya vyonsi bakenelela ukubomba ukuyana nululaghilo lwa Chala, bakanyokela ku Galileya, kukaya kabo aka Nazareti. ⁴⁰ Umwana akakula sona akiza aba wamaka, uwakongeleziwa amahala, poka nu bwila bwa Chala bukaba papache. ⁴¹ Abapapi bache bakabukanga umwaka wuli wonsi ku Yerusalemu ku lusekero lwa pamwaka. ⁴² Bo aba nimyaka twelovu, bakabuka sona ukukonkhezya imyiko yabo bo akabalilo kakwana akalusekero. ⁴³ Bobikala amasiku paphwando, bakanda ukunyokela kunyumba . Loli umulumendo u Yesu akasyalikila kwisinda ku Yerusalemu loli abapapi bache batakamanya. ⁴⁴ Bakinong'onanga pakuti ali nabanthu bo bakendanga nabo, po bakenda musanya wonsi. Bakanda ukulonda mubakamu bonsi namubamanyani. ⁴⁵ Bobatamwagha, bakanyokela ku Yerusalemu nukwada ukumulonda kulanyenyene. ⁴⁶ Bopendapo amasiku matatu bakaya bamwagha mwa Tempeli, Ikalite pakasi pa bamasi akabivwanga nukubalalusya amalalusyo. ⁴⁷ Bonsi babo bakivwanga bakaswighanga bakaswighanga mo akabivwisisyanga nukulalusya amalalusyo. ⁴⁸ Bobamulinga, ichitenthe chikabakola. Unyina akamubuzya akati, '' wemwanawe, choni chicho watubomba ubonyene? Linga utata wako nune twapasyanga pakukulondo.'' ⁴⁹ Akababuzya akati? '' Choni chicho mwandondelanga? Kamutazimenye pakuti indi papipi pakuya pambombo ya Tata? ⁵⁰ Loli bakapotwa ukumwivwisya chicho akang'anamulanga mumazyu ghala. ⁵¹ Pobakanyokela ukubuka mukaya kabo mu Nazareti sona akabivwilanga, Unyina akasengulanga ivinthu vyonsi vinonyene mumoyo wache. ⁵² Loli u Yesu akendelela pakukula mumahala namukikalile sona nukwendelela ukuba nu lusako lwa Chala na banthu.