¹ Mukabalilo kala, po amasawuzandi aminji aghabanthu bakabungana poka nukukanyana weka nuyunji, po akanda ukunena kubasaliwa bache tasi akati, '' muchebe nichilungo chaba Falisi, bobakwilangizya. ² Loli patalipo nachimo cho chivwinkhililiwe cho chitalivwinkhuliwa, sona nachimo cho chifisiwe chicho chitalivwinkhuliwa. ³ Po chosi cho wanena ku chisi chikwiza ukwivwika pabwelu, sona chom mwateketa mumakutu mukasi muchipinda chikwiza ukufumusiwa pabwelu. ⁴ Bakamu bane, nkhubabuzya ukuti, manyi mowope umunthu yo akukoma umubili, loli pisinda pache atangabomba nachimo ichinji. ⁵ Loli nkhubasoka ukuyana nayo mungamowopanga. Mumowopenge, yo pala akukoma, ali nubulaghili ubwakubasumbila umwe mumoto. Naloli, weyo abaghile mumowope. ⁶ Ka utwatiti fayivi tutangawuliziwa ninsalabazya zibili, loli nakamo kako u Chala angakaluvya pamaso ghache. ⁷ Pakuti nisisi lya ku mutu kwinu libelengiwe. Mutakowope. Umwe mwebapamwanya nkhani ukuchila utwa titi utwnji. ⁸ Nkhubabuzya, wensi yo akunitika une pamaso ghabanthu, u Mwana wamunthu akwiza ukumwitika pamaso ghabangelo ba Chala, ⁹ loli yo akaumukana pamaso ghabanthu wepe ali kaniwa pamaso gha bangelo aba chala. ¹⁰ Wensi yo akunena amazyu aghakususania nu Mwana wa munthu, akwiza ukuhobokeliwa, loli yo akuwusamula umzimu uwuswepu, atakwiza ukuhobokeliwa. ¹¹ Pala babasitaka munyumba zya kwiputilamo, pamo pabasongo, napa balaghili, utakapasyenge ukuti naya pakunena ichoni ukuti nivikilile, pamo vyo ukuya pakunena, ¹² pakuti umuzimu umuwepu wukuza pakubamanyisya ivyakunena pakabalilo kalanyene.'' ¹³ Uwabamo ukufuma mwibumba, akanena akati, '' Manyisi, umubuzye uwamwitu ukuti agabile ichuma cho chikasyala.'' ¹⁴ Po u Yesu akati kukwache, '' we munthu, ka wewenu yo akampha imbombo iya kulonga pamo iyakuba wapakasi papinu?'' ¹⁵ Akati kukwabo, '' mulinge pakuti mutali nichinyenywa ichabupafu, chifukwa chakuti umunthu angaba nivyuma ivyinji loli vitangamupoka ubumi bwache. ¹⁶ Po u Yesu akababuzya ichili, nukuti, '' kukabako umunthu yumo umukabi, akaba numuwunda wo vikelanga nkhani ivyakulya, ¹⁷ po akanda pakwinong'ona mwene akati, '' Inthi mbombe ichoni chifukwa chakuti nthenamalo aghakusengulilamo ivyakulya vyane?' ¹⁸ po akati, ' naya pakubomba chino. Nkhuya pakuvongolania inthamba nukuzengelapo inkhulu, momo nkhwiza pakusengulamo imbeyu nukatundu uyunji. ¹⁹ Nkhwiza pakunena ku moyo wane, '' Moyo, uli nivyuma ivyinji vyo vingakusunga ku myaka iyinji. Bupepule, lyanga, ng'wanga, nukwihobosya wemwene.''' ^{20 21} Loli u Chala akanena nawe, ' Wemupunganu uwe, ubusiku bunonyene umuyo wako wukuya pakupokiwa, nivinthu vyo usenganizye, vikwizukuba vya wenu?' Momo vibelile nabanthu abakwilundikila bene ivyuma loli te bakabi pamaso gha Chala.'' ²² U Yesu akanena kubamanyili bache, '' Nkhubabuzya, mutakapasyenge nizyabumi bwinu, vyo mukwiza pakulya, ivyamubili winu, vyo mukwiza pakuvwala. ²³ Pakuti ubumi bwapamwanya ukupota ichakulya, sona umubili wapamwanya ukulusya imyenda. ²⁴ Inong'ona abachigobe, batakupesa pamo ukwinula. Sona bate ninyumba pamo inthamba izyakusengulilamo ivyakulya, loli u Chala akubalyesya. Umwe mwebakuchindikiwa ukupota iviyuni vyonsi! ²⁵ Ka alipo umunthu pakasi papinu yo angongelezya isiku lyoka pabumi bwache? ²⁶ Nanthi mutangabomba akanthu akanandi bwaka ngati ko kano, choni cho mukupasya nivinthu ivinji? ²⁷ Inong'ona amaluba-mo ghakukulila, ghatakubomba, pamo ukwipangila imyenda. Loli nkhubabuzya ukuti u mwene u Solomoni nubuchindamu bwache bonsi atakavwalanga ngati vimo mwa ivi. ²⁸ Pala u Chala akughavwika amasote agha mumuwunda, ghoghaliko ilelo, indabi ghakwiza ukusumbiwa mumoto, ka atangabavwika umwe, mwebanthu balusubilo ulunandi! ²⁹ Mutakalingenge cho mukwiza pakulyachi pamo cho mukwiza pakung'wachi, sona mutakapasyenge. ³⁰ Pakuti ivisu vyonsi ivya muchisu vikulonda ivinthu ivi, sona nu Tata winu akumanya ukuti mukuvilonds. ³¹ Loli mulonde ubumwene, po ivinthu ivi vikwiza ukongeleziwa papinu. ³² Mutakowopenge, akalundilo akanandi akang'ozi chifukwa chikamuhobosya u Tata ukubapa ubumwene. ³³ Wulizya vyonsi vyo muli navyo nukubapa abapina. Mwinozyele ivikwama vya masalabazya vyo vitakuzepeka nukwilundikila ubukabi kumwanya, bo tebukamalepo, pakuti abiba batangiza papipi, sona uluswa lutangakomania. ³⁴ Pakuti kuko kuli ichuma chako koko nu moyo wako wukuzukuba. ³⁵ '' Za imyenda yinu iyitali yisotiwe mwalamba winu, sona za inyali zyinu zyendelele ukwaka, ³⁶ sona mube ngati banthu babo bakulonda uwakubatangilila po akubwela ku lusekelo lwa nyegha, ukuti pala akwiza nukukong'onsya, bangamwiwulila umulyango lubilolubilo. ³⁷ Basayiwa bobala ababombi babo u Mwene alibagha bakulingilila po akwiza. Naloli nkhubabuzya, alisota ichizwalo chache ichitali mwalamba wache sona nukuba nabo ukwikala poka pitebulo, po ayukwiza nukubabombela. ³⁸ Pala u Mwene ayukwizanga ulwabubili nukulinga ubusiku, pamo nukubalinga akabutatu, nukwagha bisenganizye, basayiwa ababombeli abonyene. ³⁹ Loli ivwisya chino, nanthi usongo wa nyumba akamanyanga akabalilo kako umwiba akwizila, atangitikizya inyumba yache ukuti yikomanike. ⁴⁰ Po isengania pakuti mutakamenye akabalilo ko u Mwana wa Munthu akwizila.'' ⁴¹ U Pitala akati, '' Mwene, ka ukutubuzya ichili chino uswe twebene, pamo ku wensi?'' ⁴² U Mwene akamula, '' Wewenu yuyo musubaliwa, sona umubombi uwamahala yuyo u Mwene alimusenganizya ababombeli abanji ukubapa ichigaba chabo achachakulya icha pakabalilo aka busiku? ⁴³ Musayiwa we mubombeli yula yuyo u Mwene wache yo u Mwene alimwagha akubomba po akwiza. ⁴⁴ Naloli nkhubabuzya alimusenganizya vyonsi ivyakatundu. ⁴⁵ Loli nanthi umubombeli yula akunena ku moyo wache, ' U Mwene wane akuchedwa pakwiza; sona akwanda ukuma umubombeli umwanalume numwanakazi sona ukulya nukung'wa nukukolwa, ⁴⁶ U Mwene wa mubombi yula inthi akize pisiku lyo atinong'onelanga sona pakabalilo kako atakamenye sona alimudumulania muvipambu muvipambu nukumusalila amalo ghache pabusitabusubaliwa bwache. ⁴⁷ U mubombeli yula, ukuba wakumanya ubwighane bwa Chala sona nukuba musitakwisengania pamo ukubomba ukuyana nubwighane bwache, aliyumiwa namapi aghinji. ⁴⁸ Loli kuyuyo yo atakazimanya nukubomba zyo zikamubaghila ukumwa, aliyumiwa namapi ghanandi. Loli wensi yuyo apeghiwe ivyinji, ukufumila kukwabo vyinji vyo vilibombiwa, sona wensi yo ali musubaliwa pavinandi, navyinji alilalusiwa. ⁴⁹ '' Nkhiza pakusumbila umoto pachisu, sona nkhalondanga ukuti nge wakite kale. ⁵⁰ Loli ndi nu lozyo lulo mbaghile ukoziwa nalo, sona mumo nkhutitililiwa mpaka vimalilike! ⁵¹ Ka mukwinong'ona ukuti nkhizila ukubika umutende muchisu chapasi? Awe, Nkhubabuzya, loli ukugabinkhana. ⁵² Pakuti pakufuma ulu balibanga fayivi munyumba yoka abakugabinkhana- abanthu batatu ukubasambulila babili, po nabanthu babili ukubasambukila abanthu batatu. ⁵³ Baligabinkhana, u tata ukumunyamukila umwana sona umwana ukumunyamukila uwise, umama ukumunyamukila umwana wache umwanakazi, numwana wache ukumunyamukila unyina, umayivyala ukumunyamukila umulasagha sona umulasagha ukumunyamukila unyinavyala.'' ⁵⁴ U Yesu akanenaga nichilundilo, '' Pala mukulinga ibingu likukwela kundabindabi, mwalubilolubilo nena ukuti, ' ukogha kwiza,' sona mo vikubombeliwa. ⁵⁵ Pala imphepo ya kunthende yikuputa, umwe muti, ' Inthi kube ubutukizu,' sona vikubombwa. ⁵⁶ Bapusikizyi, mumenye akang'anamulile kakabonekele kansi sona nakumwanya, ngapo choni chicho mutamenye ukung'anamula akabalilo kano? ⁵⁷ Ngachoni chicho cho mutakuloga vyoviza kukwinu? ⁵⁸ Po nanthi ukuya ninfundo zyako ku mulongi, mnzila wipe nkhani akatenganizye kanongwa nayuyo ukuti vitakakupote ku mulongi, sona ukuti umulongi atakakutwale kuwandaghilo, sona ukuti uwandaghilo atakakutwale kubukayidi. ⁵⁹ Nkhunena kukwinu, utalifuma lumo mulanyene mpaka papo po walipila indalama iyakumalizya.''