¹ Lelo bo vyapululila ivi, u Chala akasala sevenite(70) bamo, sona akabatuma babilibabili kunthanzi kukwache kukaya kalikonsi nu buyo bo yuyo mwene akalondanga ukuya. ² Akanena kukwabo, '' U mufunjo winji, loli ababomba mbombo banandi. Pachifukwa chino lenga kwa Chala uwanyinulo abatumile ababomba mbombo kunyinulo yache. ³ Buka munzila yinu. Linga, nkhubatuma ngati ng'onzi mukasi mubakambwe. ⁴ Mutakasende ichikwama cha ndalama, pamo ichola chapabulendo, pamo insapato, sona mutakamulamuke nayumo mumusebo. ⁵ Mu nyumba yonsi yo mwinjilamo, ichabwandilo munene ukuti, ' Umutende wube mnyuma iyi!' ⁶ Nanthi umunthu uwa mtende alipo, umtende wako wuzukuba papache, loli nanthi hagha, wuzukunyokela kukwako. ⁷ Mwikale mnyumba yilanyene, ukulya nukung'wa vyo babapa, pakuti uwambombo abaghile pakupokela umuvwalo wache. Mutakende inyumba ni nyumba. ⁸ Akaya konsi ko mukuya pakwinjila, nanthi babapokela, mulye vyo babasenganizya ⁹ sona mupozye ababine bo bali panapo. babuzye, Ichinamwene cha Chala chafika kupipi numwe. ¹⁰ Ponsi po mukwingila mukaya inga batakubapokela, fumamo buka mutunzila nukunena ukuti, ' ¹¹ Nulufumbi ulwa mukaya kinu lulo lwakakatile ku nyayo zyitu tukubakung'unthila! Loli manya chino: ichinamwene cha Chala chapalamila.' ¹² Nkhubuzya ukuti pisiku lya bulongi kulipeleliwa ichisa ku ba Sodomu ukulusya naba kaya kala. ¹³ Zya mukosi kukwinu, soka ku uwe, Kolazini! mukosi ku uwe Betisayida nanthi iviswigho vivyo vibombiwe pala vikabombiwanga mu Tyre na Mu Sidoni, nge bakapinduka kale, nge bikalite mumyenda ya masaka namwitoyi. ¹⁴ Loli chikwiza ukuba chipepeko kwa Tyre nu Sidoni, pakubalonga ukuchila umwe. ¹⁵ Uwe, kaperenawumu, ka ukwinong'ona ukuti ukwiza pakukweziwa mpaka kumwanya? Awe, loli ukwiza ukusumbiwa pansi kubafwe. ¹⁶ Wensi yo akubivwisya, akunivwisya nune poka, sona wensi yo akubakana akunkhana Nene, sona yo akunkhana une akumukana yuyo akanthuma une. ¹⁷ Abanthu sevenite(70) bakanyokelako nubuhobosu, bakuti, '' Mwene, nimizimu iyibibi yikatwivwila po twayisamizya mwi Zina lyako.'' ¹⁸ U Yesu akanena kukwabo, '' Nkhamulinga usatana akuwa ukufuma kumwanya ngati kamesya. ¹⁹ Linga, nkhubapa ubulaghili ubwakuti Mulikanya injoka nabakalizya, nukupotwa amaka agha mulwani winu, sona nachimo munzira yonsi chochikwiza ukubavulazya. ²⁰ Loli mutakahoboke pachifukwa ichi, ukuti imizimu imibibi yikabivwira, loli muhoboke nkhani pakuti amazina ghinu ghasimbiwe Kumwanya. ²¹ Pakabalilo kalakala akizula nubuhosu ubukulu mwambepo mwikemo, nukunena, '' nkhukukwezya, Tata, mwene wa kumwanya na pansi, pachifukwa chakuti ukavifisa vino ku bamahala nukabavumbulila babo bo batamanyisiwe, ngati bana abanandi. Yes, Tata, pa ichi chikaba chiza nichakuhobosya mukalinile kako. ²² '' Ivinthu vyonsi ivi vipeghiwe kukwane ukufuma kwa Tata , sona patalipo nayumo yo amumenye umwana ukufumiako u Tata, sona ataliko nayumo yo amumenye u Tata, ukufumyako umwana sona nayo mwana akabasala ukuti amuvumbule.'' ²³ Po akang'anamukila ku bamanyili bache nukunena kubufisamu, '' Basayiwa bo bakulinga ivinthu vyo mukuvilinga. ²⁴ Nkhunena kukwinu, abawonela abinji nabamwene abinji bakalondanga nkhani ukulinga ivinthu vyo mukuvilinga, loli batakavilinga, Sona bakalondanga bivwe ivinthu vyo mukwivwa loli batakwivwa.'' ²⁵ Lolela, ukaswili wa ndaghilo akimilila nifundo yakumuyezya, '' Manyisi, ningapanga ichoni ukuti nize mphyane ubumi bwambula kumala?'' ²⁶ U Yesu akanena kukwache, '' chochoni cho chisimbiwe mundaghilo?'' Ukubelenga bulibuli? '' ²⁷ Akamula akati,'' Mukamumanye uchala numuyo winu wonsi, numuzimu wako wonsi, namaka ghako ghonsi, ninyinong'ono zyako zyonsi, sona numupalamani wako ngati wewe.'' ²⁸ U Yesu akanena nawe, '' wamula akiza. Bomba izinyene, po ukwiza po ukwiza pakuba nubumi.'' ²⁹ Loli umwene, akalondanga ukwinena mwene pakuba muwolosu, akanena kwa Yesu, '' Ka umupalamani wane wewenu?'' ³⁰ U Yesu akamwamula akati, '' Umunthu yumo akayanga ku Yeliko ukufuma mu Yerusalemu. Akakomana nabiba, bobakamupoka vyonsi vyo akaba navyo sona bakamuma, nukumuleka papipi nukufwa. ³¹ Mulusako umuputi akenda kunzila yilanyene, po bo amulinga akamupambata, akenda kulubazu ulunji. ³² Umwakuyana bwaka, pakiza umu Levi, bo afika pamalo pala nukumulinga, akamupambata. ³³ Loli umusamaliya yumo, yo akaba pabulendo bo afika pamalo gho akabapo. ³⁴ Bo amulinga akamupelela ichisa. Akapalamila papipi pache nukumupuputa ivilonda, nukupungulila amafuta nu vinyo. Po akamukwezya pamphunda yache, nukubuka nawe kunyumba iyabayeni, ko bakamusungilila akiza. ³⁵ Kundabi lyache, akasenda insalabazya zibili nukumupa umwenencho wa nyumba, nukuti amusungilile akiza, nanthi ungatagha izyakupululilapo, pala nabwelako, nkhwiza pakunyosezyapo.' ³⁶ Wewenu pa banthu batatu aba yo mupalamani wache wayo akawila munyobe izya biba?'' ³⁷ Akamula, '' Yo akamupelela ichisa.'' U Yesu akamubuzga akati, '' buka uye ubombe ubonyene.'' ³⁸ Bo bakwenda, bakingila mukaya kamo, umwanakazi yumo yo izina lyache akaba we Malita akamupokela munyumba yache. ³⁹ Akaba nu munyabo u Maliya, yo akikala muvinama vya Mwene nukuteghelezya amazyu. ⁴⁰ Loli uMalita akatangwanika pakuyania ichakulya. Akiza kwa Yesu nukuti, '' we Mwene, ka utakumphasikizya ukuti uwamwitu uwamwitu andekile nemwene imbombo yonsi? Po mubuzye ukuti ize anavwe.'' ⁴¹ Loli u Mwene akamwamula nukuti, '' we Malita, wilumbusya nukutamiwa nivinthu ivinji. ⁴² Loli ichinthu choka chikulondiwa. U Maliya asala ichinthu ichiza, chochitakwiza ukufyuliwapo.