¹ U Yakobo, yo mubombi wa Chala sona nu Mwne u Yeso Kilisitu, ku maluko twelovu ghamunsata: Nkulamuka! ² Mumanye ulusekelo lwene, ba wamwitu, po mukukomana ni nthamyo zyakupambana pambana. ³ Mumenye ukuti ukuyesiwa kwa lwitiko kukupanga ulufwililikilo. ⁴ Leka ulufwililikilo lumalizye imbombo ukuti mube mwe bakwinuka nkani sona nukumala, ukusita kusobela chimo. ⁵ Loli pala yumo mwa umwe akulonda amahala, leka alalusye ukufuma kwa Chala, yo akupa mubwighane sona ukusita kutamya ku bonsi bo bakulalusya, sona inti ize ape kukwabo. ⁶ Loli leka alalusye mu lwitiko, ukusita ukwilamwa, pakuti wensi yo akwilamwa ali ngati liyigha lya pa nyanja lyo likwendeziwa ni mphepo sona likuzyungulila. ⁷ Papo umunthu uyo atakinong'onenge pakuti inthi ize apokele chimo ukufuma kwa Mwene; ⁸ we munthu wa myoyo yibili, atakwikalisya mu nzila zyache zyonsi. ⁹ Leka aba wamwitu aba kabele ka pansi bitumvye pakubikiwa pamwanya, ¹⁰ loli umunthu umukabi uwa buyo bwa pansi, chifukwa inti ize amale ngati liluba lya munkolongo mwi sote. ¹¹ Pakuti izuba likufuma ni chilungula cha kocha nu kumika isote. Iluba likuwa sona nu bwiza bwache bukumala. Mwakuyana bwaka, umunthu umukabi akufoka mukasi mu lwendo lwache ¹² Musayiwa u munthu yo akufwililikira mu kuyesiwa. Pakuti pala akwera amayeso azupokela imphumphu ya bumi, yo yikalaghiziwa kubo bamughanite u Chala. ¹³ Patakabe nayumo yo akuti pala nayeziwa, ''Nayeziwa nu Chala,'' chifukwa u Chala akuyeziwa nu bubibi, papo wepe umwene atayezizyepo nayumo. ¹⁴ Loli umunthu wensi akuyeziwa nu kulonda kwache, cho chikumukopa nu kupusikika. ¹⁵ Po pala ukulonda ukwimilila, kukupa ukupapa imbibi, po pala imbibi zyizula zyakula, zikupapa imfwa. ¹⁶ Mutakapusikiwe, baghaniwa ba wamwitu. ¹⁷ Chonsi ichabupi ichiza sona ichabupi cha kufikapo chikufuma kumwanya.Chikwiza pansi ukufuma kwa Tata wa buswepu. Mumwache kutaliko ukupinduka pamo umuzyezye chifukwa cha kung'anamuka. ¹⁸ Pakuti u Chala akasala ukutupa imphapo na mazwi gha bwanaloli, ukuti tube twe vikomwa vyabwandilo pa vinthu vyonsi vyo akapela. ¹⁹ Mumenye ichi, baghaniwa ba wamwitu: Leka umunthu wensi abe wa changwi pakwivwa, wakuchedwa pakunena, sona wakuchedwa pakukalala. ²⁰ Pakuti ukukalala kwa munthu kutakufisya ubugholosu bwa Chala. ²¹ Polelo fumya ubunyali bwa mbibi sona nu bwinji bwa vyakunanga. Mubunthu mupokele izwi lyakubyaliwa, lyo lingapoka imyoyo yinu. ²² Iba mwe bakubomba amazwi sona ukusita kuba bakwivwa kwene, mukwipusika mwebene. ²³ Pakuti nanthi yumo akwivwa amazwi loli atakubomba, ali ngati munthu yo akwilinga icheni chache pa galasi. ²⁴ Akwilinga mwene sona nanthi afumapo nakalinga akuluvya mo abelile. ²⁵ Loli umunthu yo nanthi akulingisya akiza mwilamulo lyakufikapo lya bwabuke, nukubukilila ukubomba ubonye, ukusita ukuba wakwivwa yo akukuluvya, umunthu uyu azukuba wakusayiwa mu mbombo zyache. ²⁶ Nanthi yumo akwinong'onela ukuba wa kwiputa sona atakwikola ululimi lwache, akwipusika mu moyo sona nukwiputa kwache kwa bwaka. ²⁷ Ukwiputa ukwiza sona ukusita kunangika panthanzi pa Chala u Tata witu kakwavwa abafwilwe mu nthamyo zyabo, sona nu kwisunga mu kusita bunyali bwa mu chisu.