¹ U Simoni Petulo, umuzya sona umutumizya wa Yesu Kilisitu, ku mwebonsi mwe mupokelite ulwitiko ulupala ngati lo tukapokela, lo lwitiko mu bugholosu bwa Chala witu sona numupoki wa Yesu Kilisitu. ² Po ichisa sona nu mutende ghukule umwakufika mu mahala gha Chala nu Yesu u Mwene witu. ³ Ukufumila mu maka ghache, ivinthu vyonsi vya bumi nu kumoghopa uChala yo akapighiwa kukwitu ukwizila mu mahala ghache gha yo akatwiwizya uswe ukwendela mu buchindamu nu bukulu bwache. ⁴ Ukwendela mu ivi mo umwene akatupela uswe ivikulu sona ivya pamwanya vyo akatatulaghizya umwakuti umwe mugabane ivya bwikazi, ukuti mupone kubupyutiwa bwa vinyonywa vya mu chisu. ⁵ Pa chifukwa ichi, bomba ubwiza bwinu pakongelezya ubwiza nkhani ku lwitiko lwinu, ⁶ sona ubwiza nkhani ukongelezya amahala, pa kongelezya amahala gha kwikola, mukwikola wemwene munyiputo, ⁷ munyiputo mukongelezya ubukamu ubukulu, sona ubukamu bukongelezya ulughano. ⁸ Nanthi ivi vili mu mwinu sona nukukula mu mwinu, mutakwiza ukuba mwe bachumba pamo nukusita ukuba na mahala gha Mwene u Yesu Kilisitu. ⁹ Loli nanthi yo ate navyo ivinthu ivi akulinga papipi bo mufwa maso, umwene aluvizye ukuti aswefiwe ukufuma ku mbibi zyache izyakale. ¹⁰ Polelo, ba wamwitu, bomba iviza umwakuti ulwito lwinu sona uksebia kwa bwanaloli, pakuti nanthi mukubomba ivinthu ivi, mutakwiza ukuba mu kuyesiwa. ¹¹ Mu nzila iyi mukwiza pakupeghiwa ubukabi ukuba bwinjililo bwa bwilebwille mu bu Mwene sona nu mupoki u Yesu Kilisitu. ¹² Polelo mukabalilo konsi ne wakwisengania pakubakumbusya umwe vyonsi ivi, napo ubamenye abene, napo mwe ba maka mu bwanaloli bo lonsulu muli nalo. ¹³ Nkhwinong'ona ukuti vigholokite bwaka kukwane, bo ntchili indi mu chisakasa ichi, ukubayingania mumwanya munzila ya kubakumbusya. ¹⁴ Pakuti muzimenye ukuti kufuma kwa mu chisakasa chane kuli papipi, chifukwa u Mwene witu u Yesu Kilisitu avumbula ivi kukwane. ¹⁵ Nkhwiza pakwiyula pakulingisya ukuti nanthi nafumapo akabalilo konsi mwize mukumbukenge ivinthu ivi. ¹⁶ Pakuti uswe tutakakonkha utupango to bwaka bo uswe tukababuzyanga umwe izya maka nukwiza kwa Mwene witu u Yesu Kilisitu, loli amaso ghitu bwakamboni pa bukulu bwache. ¹⁷ Bo u Mwene apokela ubukulu sona nu buchindamu ukufuma kwa Tata u Chala, bo izyu likwiza ku kwache mu buchindamu ubukulu, likati, ''Uyu weyo Mwana wane umughaniwa, yo une hobokite nawe.'' ¹⁸ Uswe swebene tukivwa izyu ili lyo likiza ukufuma kumwanya bo tuli poka nawe ku chipili ichiswepu. ¹⁹ Pakuti tuli nalyo ilizyu lyo lipangiwe pakulu, pacho mungabomba akiza pakwivwisya ngati yo nyale yo yikwaka mu malo gha chisi ukufika ku buche nu lunthondwa ulwa ndabindabi lwabala mu myoyo yinu. ²⁰ Pa mwanya pa vyonsi, mubaghile mwivwisye ukuti nabumo ubughonela bwa masimbo gha yumo yo akughasanusya. ²¹ Pakuti nabumo ubughonela nu bwighane bwa munthu, loli abanthu bakanena ukufuma kwa Chala po bakasendiwa nu Muzimu Ughuswepu.