¹ Lori ukuyana namasiku nutubalilo,ba wamwitu, mutakulonda ukuti chimo chibasimbiliwe. ² Pakuti umwe mwe benencho mukumanya akiza ukuti isiku lya Mwene likwiza ngati mwivi mu busiku. ³ Pakuti nanthi bakuti, ''Mutende nu busatuke,'' po mwakuchenusya ulupyuto lukwiza papabo. kuzukuba ngati bubavu bwa kupapa ukwa mama wa nthumbo. sona batazukuba napamo apakuleghela. ⁴ Loli umwe, bawamwitu mute muchisi umwakuti umusanya ughu ghutakabachile ngati bobiba. ⁵ Pakuti mwebonsi mwe bana ba bwelu sona bana ba musanya. Tetwe bana babusiku pamo ba chisi. ⁶ Polelo leka tutakaghone ngati mo abanji bakupangila, Mumalo mwache za tube maso sona tutakakolwe. ⁷ Pakuti bo bakughona bakughona nu busiku, sona bo bakukolwa bakolwa nu busiku. ⁸ Loli leka uswe swetwe bamusanya tutakakolwe sona pakuvwala ingigha iya lwitiko pachifuba sona nu lusubilo lwa bupoki ngati chisote, ⁹ Pakuti uchala atakatusebela uswe kubukali loli ukuti tube nu bupoki ukwendela mwa Mwene witu Yesu Kilisitu. ¹⁰ We yuyo yo akatufwila uswe ukuti, kali tuli maso pamo tughonite twikalenge poka nawe. ¹¹ Polelo sasamusyanga weka nu yunji sona nukughomyana weka nu yunji ngati mo mumubombela kale. ¹² Sona tukulenga umwe, ba wamwitu, ukuti mubamanye bobakubomba pakasi pinu, sona bali pamwanya pinu mwa Mwene nukuti babachevye umwe. ¹³ Tukuba buzya sona ukuti mubachindike nkhani hee mulughano chifukwa cha mbombo zyabo. Banga numutende pakasi pinu. ¹⁴ Tukubaghomya, ba wamwitu: Muchenjezye bo batakoghopa, baghomye abakufoka, bavwe abadedebazu, sona mube bakufwasa na wensi. ¹⁵ Mulingiswe ukuti nayumo akunyokezia ububibi kwa yunji. Loli mulangizye chochiza ku weka nu yunji sona naku wensi. ¹⁶ Hobokanga bwile, ¹⁷ Iputanga nukusita kulekelezya. ¹⁸ Muvyonsi mupalizyenge. Pakuti uku koko kulonda kwa Chala mwa Kilisitu Yesu ku kwinu. ¹⁹ Mutakazimyenge umuzimu. ²⁰ Mutakasule amazyu gha buchimi. ²¹ Yezya ivinthu vyonsi. kolesya ku chochiza. ²² Fumamo mukabilo konsi akabibi. ²³ Zanga u Chala wa mutende abapange umwe ukuba bakufikapo nkhanila. Leka umuzimu winu ghonsi, nu moyo, sona nu mubili visungike visita kalema pisiku lya kwiza kwa Mwene witu Yesu Kilisitu. ²⁴ Yo akubitizya umwe musubiliwa, sona ithi achibombe. ²⁵ Ba wamwitu, mutwiputilenge. ²⁶ Mulamuke aba wamwitu bonsi nu mufyofyonto umuswepu. ²⁷ Une nkhubalaghizya mwa Mwene ukuti ukalata uyu abelengiwe na ba wamwitu abaswepu bonsi. ²⁸ Ichisa cha Mwene witu u Yesu Kilisitu chibenge numwe.