¹ Nanthi waghe umunthu yumo aghika akomekite mu chisu cho u Yahweh u Chala winu akuya pakubapa umwe ukuba chinu, atambalalite mu chalo, loli chitamanyikizye chochimukomite; ² po abasongo binu naba longi binu babaghile bafume, nukuya pakupima utwaya utukulu to tuzunguliliwe nu munthu yo akomekite. ³ Po abasongo bakaya ko kapalamanite nkhani nu munthu yo afwile babaghile basende ing'ombe imphambali ukufuma kuludimo, yoyitabombitepo lumo imbombo, sona yoyitavyetepo ijoko. ⁴ Po babaghile babuke ni mphambali kwikombe lyo likwenda naminzi, ikombe lyo litalimiwemo lumo pamo ukupesamo lumo, posona mwikombe mulanyene babaghile bayipyole imphambali insingo yache. ⁵ Aba puti, abalunyungu lwa Levi, babaghile babe panthanzi, pakuti u Yahweh uchala winu abasebite abene ukuti bamubombele nukubasaya mwizina lya Yahweh sona nukufwana nimphindano zyonsi namabulwe namazyu ghabo. ⁶ Abasongo bonsi aba kaya ko kapalamanite numunthu yo akomekite babaghile basukusulile pamwanya pa ng'ombe imphambali yo isingo yache yikadumulika mwikombe; ⁷ sona babaghile babuke panongwa nukuti, ' Inyobe zitu zitakupwilepo udaba yuno, sona namaso ghitu ghata chibweni. ⁸ Hobokela, Yahweh, abanthu ba Isreal, bo mwababula, sona mutakababikile inongwa abasita nongwa iyakukupuka kwa daba mukasi mu banthu binu aba ku Isreal.' Po udaba yo akakupuka inthi abahobokele abene. ⁹ Munzila yinu inthi mufumiemo uku kupuka nongwa yakusita daba mukasi mwinu, nanthi mukubomba chochigholosu pamanso gha Yahweh. ¹⁰ Po mukuya pakulwa ubwite nabalwani binu sona u Yahweh u Chala winu akuya pakuba umwe ubupoti nukubabika ukuti babe pansi papinu, nukubasenda ukuti babe ngati bazya, ¹¹ nanthi mwalinga pakasi pazya umwanakazi uwakuyemba, sona mwamughana ukuti mumusende ukuti abe mukazi wako, ¹² po inthi umusendele ku kaya kunyumba yako; inthi amwe isisi nu cheka inzula zyache. ¹³ Po inthi avule ivyakuvwala vyo akavyala po akaba mubuzya sona ithi ikale mu nyumba yako nukulila u wise nu nyina umwezi umupuma. Nanthi chenda chino po ungabuka kukwache nukuba mulime wache, sona wepe inthi abenge mukazi wako. ¹⁴ Loli nanthi utakuhoboka nawe, po ungamuleka abukenge ko akulonda. Loli utakamughulizye umwene ni ndalama, sona mutabaghile pakumubomvya ngati muzya, chifukwa wamusamula. ¹⁵ Nanthi umwanalume ali nabanakazi babili weka aghaniwe uyunji abengiwe, sona bonsi babili bamupapile abana---bonsi abakazi bache yo aghaniwe nayo abengiwe-----nanthi umwana wache umwanalume ukatote wa mumwana kazi yo abengiwe, ¹⁶ po pisiku lyo anozizye ichimu cha kubapa abana bache abanalume pamphyana yache atakapangisye ukuti umwana umwanalume uwa mwanakazi yo aghaniwe ukuba wekatote panthanzi pa mwana umwanalume uwamwanakazi yo abengiwe, umwana yo naloliloli weyo wekatote. ¹⁷ Mubuyo bwache, abaghile itikizye bwaka umwana ukatote uwa mwamu mwanakazi yo abengiwe, pakumupa kabili pa chuma chonsi cho ali nacho, pakuti umwana uyo weyo bwandilo bwamaka ghache vimubaghilile ukatote pakuba vyache. ¹⁸ Nanthi umunthu ali nu mwana umwanalume musita kwivwila sona asangukite nukusita ukwivwila ilizwi lya wise pamo nizwi lya nyina , nayo, akumusunda napo bangamugholosya, atangabivwila; ¹⁹ po u wise nu nyina babaghile bamwimike tasi sona baye nawe kubasongo bachikaya sona napamulyango bwa chikaya chache. ²⁰ Babaghile banene kuba songo bamukaya, 'Umwana witu uyu musita kwivwila sona asangukite; te akatwivye amazyu ghitu; mupafu sona we chakolya.' ²¹ Po abanalume bonsi abamuchikaya bamume namabwe afwe; sona po inthi mufumie ububibi pakasi pinu. Aba Isreal bonsi inthi bachivwe nu koghopa. ²² Nanthi umunthu ananga imbibi yo yibaghile ubufwe, sona bamukoma numupayika pikomo, ²³ po umubili bwache ghutabaghile ukuba bonsi pikomo, Naloliloli mubaghile mumusile isiku lilanyene; pakuti wensi yo bamupayika aghuniwe nu Chala. Manyi mukomanye ichisu cho u Yahweh u Chala winu akabapa umwe ngati mphyana yinu.