1 De kan Meliksadik, melik ta Salim, kahin ta Allah al fok, al kan limu ma Ibrahim wokit kan bi rija min mahal al kan dabau fogo muluk wa bariku huwo. 2 Wa kan Ibrahim wodi le Huwo ushur ta ai haja. Awel haja, terjima ta maana ta isim Bito, "Melik ta bir"; wa biga Huwo kaman "Melik ta Salim," de yani, "Melik ta Salam." 3 Huwo ma indu Abu, wa ma indu Uma, wa ma indu Judud, wa ma indu bidaya ta ayam Bito wole nihaya ta haya Bito. Bidal kida, shabehu Huwo be Jena ta Allah, ashan Huwo fadulu Kahin lel abad. 4 Aynu zol de kan azim kef lahadi abuna Ibrahim agder wodi le Huwo ushur ta hajat al huwo shilu fi harb. 5 Ganun bi asalu iyal ta Lawi del al biga kahana ashan bi limu ushur min shaab, aw, min akuwana tomon, shala kan humon kaman, iyal ta Ibrahim. 6 Lakin Meliksadik, al ma kan indu nasab bi limu ma humon. agder ligo ushur min Ibrahim, wa bariku huwo, de Huwo al indu wuud. 7 Ma bi agder anguru gali zol al suker bi ligo baraka min zol al kebir. 8 Fi mushkila de, nas al meitin ligo ushur, lakin fi mushkila dak agder shahidu gali Huwo hai. 9 Wa, be teriga ta kalam, Lawi, al ligo ushur, kaman dafau le Huwo ushur be wasit Ibrahim. 10 Ashan Lawi de kan fi jisim ta judud Bito wokit Meliksadik limu ma Ibrahim. 11 Hasa kan shokol kamal be wasat kahnut ta Lawi (ashan tehet huwo nas bi ligo ganun), shunu, de shunu tani al aju kede kahin tani ashan bi gum fi rutba ta Meliksadik, wa ma bi hasibu fi rutba ta Harun? 12 Ashan kan kahanut biga geiru, ganun kaman lazim bi geiru. 13 Ashan zol al kelimu hajat del be kalam towo de zol ta gebila tani, min al mafi wahid kulu kulu kadimu fi mazbah. 14 Hasa biga beinu tarau min Yahuza al Rabuna ta nina weledu, gebila al Musa ma wonusu fogo be kalam kahin. 15 Al nina kelimu biga wadeh kan gali kahin tani kutu ze Meliksadik. 16 Ma kan ashan ganun al gali lazim kede kun min nasab ta jisim Huwo biga kahin, lakin kan ashan guwa ta haya al abadiya. 17 Wa al kitab yau shuhud Bito: "Inta kahin lel abad fi rutba ta Meliksadik." 18 Ashan talimat al gedim dak kutu fi taraf ashan biga kafif wa ma shakal. 19 (ashan ganun ma timu amulu haja), wa raja al ahsen talau, be wasit Bito nina bi ja gerib min Allah. 20 Wa ma kan bidun halifa! Tanin biga kahana bidun ai halifa, 21 lakin Huwo biga kahin wokit Allah kelim le Huwo, "Rabuna halifu wa Huwo ma bi geiru muk Bito: 'Inta kahin lel abad." 22 Kida kaman Yesuah wodi daman bita ahsen tifagiya. 23 Kahana al gudam del humon kutar, min zaman mutu abusu humon ashan kede istemir genin fi maktab. 24 Ashan Yesuah lisa bi istemir hai lel abad, Huwo indu kahnut al sabit. 25 Ashan kida huwo kaman bi agder kalisu tamam del al bi ja gerib min Allah be wasit Huwo, ashan Huwo daiman bi hai ashan bi hin le humon. 26 Ashan kan munasib kede nina indu shikil reis bita kahana ze de. Kudus wa ma indu galat, nedif, fasilu min nas ta katiya, wa fok min samawat. 27 Huwo ma muhtaj ashan, ze reis kahana muktelif ashan bi gedimu zabaih kulu yom, awel le katiya bito, wa baad dak le katiya ta bagi nas. Huwo amulu kida mara wahid le nas kulu wokit Huwo gedimu jisim Bito. 28 Ashan ganun bi kutu reis kahana min nas al indu dofat, lakin kelima ta halifa, al ja .baad ganun, kutu Jena al Huwo kamil lel abad