¹ Kede muhaba ta akuwana akuwana istemir. ² Matakum nesitu amulu kuwes le nas tanin. Ashan zede, tanin amulu kuwes le malaikat wa humon ma aruf. ³ Zekiru takum masajin ze kanu robutu intakum ma humon. Zekiru takum del al zulumu ze kanu intakum sawa ma humon fi jisim. ⁴ Kede nas kulu ehteramu jowuzu, wa kede hafizu serir ta jowuzu nedif, ashan Allah bi ja hukumu nas ta daara wa bita zina. ⁵ Kede intakum geni beid min muhaba ta gurush. iktanatakum be haja al intakum indu, ashan Allah zatu kelim, "Ana ma bi sibu inta, wa ma bi wasa beid min inta." ⁶ kede nina iktana ashan nina bi kun indu teshji wa bi kelim gali, "Rabuna yau musada bitai, Ana ma bi kafu. Shunu al zol bi agder amulu le ana?" ⁷ Wodi takum tegdir le kada bitakum, del al bi wonusu kalam ta Allah le intakum. Aynu takum teriga al humon bi dowru fogo, jeribu takum iman bitomon. ⁸ Yesuah Al mesih Huwo yau sawa umbari, alela, wa lel abad. ⁹ Kede ma shilu intakum bara be talim tanin al barau barau. Ashan bikun kuwes kan geliba geni sabit be neima , ma be akil al ma bi saudu del al bi douru ba humon. ¹⁰ Nina indana masbah mafi sulta le del al bi akhdim fi kheima ashan bi akulu min fogo. ¹¹ Ashan dom bita haywanat al bi katulu le afi katiya reis bita kahana yau bi jibu fi juwa mahal al mukadas, wa bagi jisim bita haywanat del bi hargu bara min kheima. ¹² Zede kaman Yesuah azibu bara fi bab medina, ashan bi kedisu nas be dom Bito. ¹³ Kede nina tala bara le Huwo fi kheima hinak, wa nina bi arfa fadiya Bito. ¹⁴ Ashan mafi medina sabit hini, wa nina bi istena dak al bi ja. ¹⁵ Be wasit Huwo, kede nina daiman gedimu zebiha bita tesbih le Allah, tesbih de yau simar bita kasama ta nina al bi iterif be isim Bito. ¹⁶ Kede nina ma nesito amulu haja al kues wa saudu badu, ashan be shikil zebiha de Allah bi kun mokosut. ¹⁷ Ihterimu wa asuma takum le kada bitakum, ashan humon kulu zaman bi aynu le nufus bitakum ze zol al bi ja dafa hisab. Ihterimu takum ashan kada bitakum bi amulu zede be mokosut, ma be nenge nenge, al ma bi indu faida le intakum. ¹⁸ Seli takum le nina, ashan nina ektana gali nina indu demir al nedif, wa niya bita nina ashan nina bi geni adil fi kulu hajat. ¹⁹ Ana bi sheja intakum ketir ashan kede amulu kida., ashan bi rijau ana le intakum be sura. ²⁰ Kede Allah ta salam, al goumu min mutu raai al azim bita korufan, Rabuna Yesuah, be dom ta ahad al abadiya, ²¹ kede jahizu intakum be kulu hajat al kues ashan bi amulu mashia Bito, ashan bi amulu fina haja al Huwo deiru, be wasit Yesuah Al mesih, mejid kede rija le Huwo le nihaya. Amen. ²² Biga ana bi shejau intum ya akuwana, ashan kede intum ithamal kelima ta teshji al besit al ana katibu le intakum. ²³ kede intakum aruf gali aku bita nina Timatayos fiku, nina bi ja sawa le intakum kan huwo ja be sura. ²⁴ Selimu takum kulu kada bitakum wa kulu nas ta Allah al kudusin. Del al fi Italiya bi selim le .intakum. ²⁵ Kede neima kun ma intakum kulu