¹ Bulus, rusul ta yesua al mesih bi wasat irada ta Allah, le nas ta Allah al kudusiin fi Efesus, al homon aminiin fi yesua al mesih. ² Neima le intum wa salam min Allah Al ab wa rabana yesua al mesih. ³ Keli shukuru Allah abu rabana yesua al mesih, al howo bariku nina bi kulu barakat al rohiya fi al samawat fi al mesih. ⁴ Min bedaya ta alam allah Ikhtar nina le howo.inu nina bi kun kudusiin wa bi dun luom fi gidam tuo. ⁵ Allah ihktar nina min bidaya le tabeni ze iyal bi wasat yesua al mesih, hasab irada ta farah tuo al kwes. ⁶ Tabeni ta nina le yesua almesih ja bi shukur ta mejid neima tuo al hwo wodi majani le nina fi zol al howo hibu. ⁷ Fi yesua al mesih nina ligo kulasa bi wasat doom bi tuo wa maghfra al kataya, Hasab ghena ta neima tuo. ⁸ Howo wodi neima tuo le nina ma kulu hikma wa fehim. ⁹ Allah wori le nina hadaf ta irada tuo al kan fi siir, hasab hajat al bi keli howo farhan, Wa al howo amulu fi al mesih, ¹⁰ Ashan bi katit le hajat al bi hasil fi mustagbal. Ashan bi jebu kulu hajat sawa, kulu hajat fi samawat wa al arid, tehit keyada wahid, hata al mesih. ¹¹ Fi al mesih ainu nina ze murisiin. gedmu nina min bedaya hasab kuta ta tuo al howo amulu kulu hajat hasab hadaf ta irada tuo. ¹² Allah ikhtar nina ze murisiin ashan nina bi kun awil nas al indu raja al mudmon fi al mesih, ashan nina bi shukuru howo fi mejiid tuo. ¹³ Kaman intum, fi al mesih, kan intum asuma kelima al hak, al injil ta kulasa takum, intum amiin fi howo wa khatimu bi waad ta rohu al kudus, ¹⁴ Al howo damana ta wurisa ta nina lahadi nina ligo, ashan bi shokuru mejid tuo. ¹⁵ Le sabab de, kulu ma ana asuma an iman takum fi rabana yesua wa muhaba takum le kulu nas ta Allah al kudusiin, ¹⁶ Ana ma wogif shukuru Allah min ajil intum ze ma ana gi zekir intum fi salawat tia. ¹⁷ Ana gi seli inu Allah ta rabuna ta nina yesua al mesih, Al Abu ta mejid, bi wodi le intum rohu ta hikma wa ruaya ta arufu howo. ¹⁸ Ana gi seli inu intum bi fahim, inu intum bi arufu raja al mudmon al howo nadi intum wa ghina ta mejid towo al wariso wasat kulu nas ta Allah al kudusiin. ¹⁹ Fi salawat tai ana gi asalu intum ashan bi arufu guwa bitu al azim al ma mahdud fi nina al amin, hasab shukul ta guwa towo al kebir. ²⁰ De yahu nefsa guwa al Allah amulu fi al mesih fi zaman ali howo guomu yesua min amuwat wahid marra wa kutu howo fi ida tuo al yemin fi samawat. ²¹ Howo kutu al mesih fok kulu hukum wa sultat wa guwa wa seitara, wa kulu isim al zekiru.al mesih bi hakimu, ma bis fi zaman de, lakin kaman fi zaman al gi ja. ²² Allah kutu kulu hajat tehit kura ta al mesih wa wodi how le kenisa ze ras fok kulu hajat. ²³ Al kenisa yahu .jasad tuo, al howo maliyan wa al bi mala al kul fi kul