¹ Paulus, hamba Yesus Kristus, am ditimai jadi rasul dengan mangabar Injil Hatalla; ² am holunya jadi dijanyi Hatalla malalu nabi-nabi-Nya lalam Buku Barasih ³ kesah Anak-Nya,am lahir mula katurunan Daud, ⁴ dengan am ditampa jadi Anak Hatalla am bakuasa malalu huasnya mula antara urang mati manurut Roh Kudus, iyah Kristus Yesus, Tuhan diri. ⁵ Malalu Inya, kami baulih Kasih dengan golar rasul nyaman manaing kapatuh iman antara uras bangsa honta Yahudi gona akan nama-Nya, ⁶ kolai jam am ditimai akan jadi hompu Kristus Yesus. ⁷ Ka kolai uras am tege ka roma, am disayang Hatalla, dengan am jadi ditimai jadi urang-urang barasih: Kuasa dengan damai pahirup kan kolai mula Hatalla, Ompai diri, dengan mula Tuhan Yesus Kristus! (Paulus Hona Manapat Ungkup ka Roma) ⁸ Saholunya, aku basyukur ka Hatallaku malalu Kristus Yesus kan kolai urasnya laie imanmu jadi ditampa ka uras dunia. ⁹ Sabab, Hatalla, am kulayan honi rohku lalam Injil Anak-Nya, jadi saksiku laie aku honta bahonti maingat kolai urasnya; ¹⁰ ka lalam doaku, aku tarus maminta nyaman sakiranya keken itie, laie kahona Hatalla, aku ulih koca kolai. ¹¹ Aku puna hona badapat kan kolai nyaman aku ulih mamori kasih honi manguat kolai, ¹² iyah am nyaman diri ulih ditotap barota laie iman kaniri, baie imanhemu baienya imanheku ¹³ Manyari-manyari, aku hona kolai ingat aku ti rancak hona bakoca kolai, tapie masih tahalang sampai keken itie, nyaman aku jam baulih hasil mula kolai samah bera bangsa-bangsa bukan Yahudi. ¹⁴ Aku bahutang ka urang Yunani dengan ka urang Barbar, ka am maharotie baienya jam ka am paleng. ¹⁵ Laie iyah, aku puna hona mangabar Injil ka kolai am tege ka Roma. ¹⁶ Aku honta malu kan Injil, sabab Injil iyah am Kuasa Hatalla honi manyalamat satiap kalunen am yakin; saholunya kan urang Yahudi, limah iyah jam kan urang Yunani. ¹⁷ Sabab kalalamnya, kabujur Hatalla ditampa mula iman ka iman, bera am tege jadi tatulis: "Urang am bujur akan hirup laie iman." (Pangusar Hatalla laie Gawi Dusa Kalunen) ¹⁸ Sabab, pangusar Hatalla ditampa mula surga ka uras am fasik dengan kajahat kalunen am mamonya kabaie honi kajahat rang. ¹⁹ Laie iyah, apa am ulih di ingat kan kesah Hatalla jadi nampa ka urang laie Hatalla jadi manampainya ka urang. ²⁰ Au jam, tampara dunia tie di karuh, hadat-hadat Hatalla am honta ulih di ila, yah am kuasa-Nya am abadi dengan hadat ketuhanan-Nya, jadi nampa ulih di lajar malalu hal-hal am di karuh-Nya nyaman rang mangaku. ²¹ Tapie, biarnya rang kasene Hatalla, urang honta maroga-Nya jadi Hatalla lalu basyukur ka-Inya; kabaliknya, unta rang honta baguna dengan hati rang am paleng jadi potang. ²² Rang manyoku arepnya pintar,tapie jadi paleng, ²³ kaagung Hatalla am barasih tukar rang kan hampatung kalunen am honta abadi, burung-burung, satua am bakaki ompat, kan ular jam. ²⁴ Laie iyah, Hatalla manyorah rang ka kahona hati rang am hona marusak laie iyah rang marusak tuwuh arep rang kaniri. ²⁵ Sabab, tukar rang kabujur Hatalla honi parongka,sota sujud manyomah ka am di karuh kalunen, Hontanya Hatalla am di puji sapalamatnya. Amin! ²⁶ Laie iyah,Hatalla manyorah rang ka am honta baie, sabab pangawi kawan labinie am baie tukar rang ka am honta baie. ²⁷ Bera iyah jam am kalakie tingal rang labinie am baie,hona kan samah kalakie; kalakie samah kalakie mangaruh gawi am honta batek nya; lalam tuwuh rang kaniri, rang bulih hukuman laie dusa-dusa rang. ²⁸ Lalu, laie rang honta hona mangaku Hatalla lalam unta rang, laie iyah Hatalla manyorah rang ka pikiran-pikiran am salah jadi rang mangaruh hal-hal am honta patut rang ngawinya. ²⁹ Rang ponuh laie bamacam panyalah, am jahat, am sarakah, pangili, palaie, pamarongka, dengan kadangki, pampatie, hasual, panipu, dengan kagili; rang jam panahiu, ³⁰ pangutu, pangili kan Hatalla, pangusar, sombong, banya paner, mangaruh gawi am jahat, honta patuh kan urang tuha, ³¹ paleng, honta satia, honta bapansaie, tuntang kejam. ³² Lalu, biarnya rang ingat aturan Hatalla am babungie urang am ngaruh gawi bera iyah patut matie, rang hontanya masih mangaruhnya tapie jam mandukung urang am mangaruh hal-hal iyah.