¹ Malalue Yudas, palayan Yesus Kristus* lalue manyari Yakobus, ka urang am dipilih lalue dikasihi Hatalla Bapa, lalue am diurus akan Yesus Kristus. ² Kiranya belas kasih, damai sejahtera, lalue kasih malimpah tingi kolai. ³ Kawan manyari takasih, panehan aku bausaha karas manulis ka kolai tuntang kasalamatan dirie barota, aku mansai sakit hatie manulis ka kolai lalue maminta kolai nyaman kolai bajuang bujur-bujur akan iman am diparah sakali akan salamanya ka urang-urang barasih.* ⁴ Laie, urang-urang batantu jadie tama hinta dirie ingat, iyah am urang am metuh holu jadie ditentukan akan dihukum, urang-urang hinta baiman am salah mahoni anugerah Hatalla dirie akan mamuaskan nafsu lalue manolak suti-sutinya Panguasa lalue Tuhan dirie, Yesus Kristus. ⁵ Aku hona maingat kolai biarpun kolai jadie maingat saponuhnya, amun Tuhan jadie manyalamatkan umat-Nya lalue maluarkan urang mula tanah Mesir, tapie limah Inya mamati urang am hinta percaya. ⁶ Lalue, malaikat-malaikat am hinta patuh ka batas-batas ka kuasaan urang, lalue matie homan paniam urang, metuh Inya kobat honie rantai abadi lalam kapotang am paling potang akan penghakiman metuh arie bakah nona. ⁷ Bira iyah jam Sodom* lalue Gamora* lalue kota-kota ka damping iyah, am mamuaskan kaniri lalam dosa seksual lalue manasah nafsu am hinta wajar, jadie manangung hukuman apie kekal jadie contoh. ⁸ Bira iyah jam urang-urang itie, maandalkan mimpi-mimpi urang, mancemarkan tuwuh, hinta hona kekuasaan, lalue mahina uras am mulia. ⁹ Mikahael jam, sang penghulu malaikat, metuh bakalahi akan Hantu* tuntang bangkai Musa*, hinta barani mamaner buti bawa hinaan ka inya, lalue baya bapaner, "Golanya Tuhan mangusar kolai!" ¹⁰ Tapie, para panyosat itie mahina hal-hal am hinta urang ingat, am baya urang ingat bahoni naluri, bira lau jolu am hinta bagora akal. Laie hal-hal itie am urang akan dihancurkan. ¹¹ Celakalah urang! Urang am mairing jalan am ditempuh Kain, lalue manasah honi kacakah kasalahan am dikaruh Bileam, lalue matie laie parusuh bira Korah. ¹² Urang itie bera noda lalam perjamuan kasihmu, am laha museh malaie barota kolai mayan ara pangola, peduli baya akan kaniri. Urang bira awan am hinta manaing hujan, am ditiup riwut kpya kotie. Urang bira puhun-puhun am hinta babuah metuh musimnya, matie dua kali, lalue dicabut ka urat-uratnya. ¹³ Urang bera galumang laut am ganas, am mangesah kaburu urang kaniri. Urang bira bintang-bintang am bacahaya, am akan inya bapotang am pekat am jadie disadia akan salamanya. ¹⁴ Jam tuntang urang-urang itie am Henokh, katurunan katujuh mula Adam, bernubuat, "Ila, Tuhan datang barota baribu-ribu urang barasih-Nya, ¹⁵ akan manjalankan penghakiman tingi uras urang; mahukum uras urang fasik tingi uras pangawi fasik am urang karuh honie cara am fasik, lalue tingi uras paner kasar am jadie dipaner laie urang-urang badosa am fasik taharap Hatalla." ¹⁶ Urang iyah am urang-urang am suka mungkir, mangau-ngau kasalah, lalue mauma hawa nafsu, urang kaniri; urang banyawa bakah lalue mangingat urang bukan demi manapat kauntungan. Manyalu lalue Nasihat ¹⁷ Kawan manyari am ku kasihi, kolai harus maingat apa am jadie diparah rasul-rasul* Tuhan dirie, Yesus Kris. ¹⁸ Urang jadie bapaner ka kolai, "Metuh zaman akhir, akan tege para penghina am baya mauma nafsu, urang am fasik." ¹⁹ Urang iyah am urang-urang am mangaruh pamisah, mauma hawa nafsu duniawi, lalue hinta mahompu Roh*. ²⁰ Tapie, kolai, Kawan manyari am ku kasihi, huas kanirimu katingi imanmu am paling barasih lalue badoa lalam Roh Barasih*. ²¹ Jaga uras kanirimu lalam kasih Hatalla samil mananti rahmat Tuhan dirie, Yesus Kristus, am manuntun ka hirup kekal. ²² Hompulah kemurahan hatie akan urang am ragu-ragu, ²³ selamatkan urang bukan lalue marobut urang mula apie. Ka am bukan, ila belas kasih am dirota asa gola, lalue pangili akan pakaian urang am dicemari hawa nafsu duniawi. Puji-Pujian ka Hatalla ²⁴ Akan Inya, am bakuasa manyaga kolai hinta jatu lalue manatang kolai mayan ara cacat ka paharap takhta kemuliaan-Nya lalue sukacita bakah. ²⁵ Akan suti-sutinya Hatalla, Juru Selamat dirie, malalue Kristus Yesus, Tuhan dirie, kemuliaan, keagungan, ka onya, lalue kuasa sapanyang masa: holu, wayah itie, sampai salama-lamanya. Amin*.