¹ Mula Paulus, rasul Yesus Kristus laie kahona Hatalla. Akan urang-urang barasih ka Efesus, urang-urang baiman lalam Yesus Kristus. ² Kuasa umakan ranang sanang mula Hatalla, Ompai diri umakan Tuhan Yesus Kristus. (Tuah Rajaki Rohani lalam Kristus) ³ Tapujie Hatalla umakan Ompai mula Tuhan dirie Kristus Yesus, am jarie manuah dirie lalam Kristus umakan satiap tuah rohani kahoman surga. ⁴ Sabab, Inya mamilih dirie lalam Kristus sahompan samulanya dunia nyaman dirie jarie barasih umakan honta tahina ka paharap-Nya. Lalam sayang, ⁵ nya manotap dirie mula sulanya akan diincang jarie ana-ana-Nya malalu Kristus Yesus am pas umakan kaungang kahona-Nya. ⁶ Inya mangawi iyah akan kapuji kuasa kamulia kuasa-Nya, am jarie diborie-Nya sacara cuma-cuma kadirie lalam ana-Nya Yesus Kristus. ⁷ Lalam Inya, dirie baulih panowus malalu darah-Nya, iyah pangampunan laie dusa-dusa dirie pas umakan kasugih kuasa-Nya, ⁸ am Hatalla borie ka dirie lalam uras akal budie umakan katahu. ⁹ Inya mamarah ka dirie rahasia kahona-Nya am pas umakan maksud baie am Inya rancana lalam Kristus, ¹⁰ am akan digawie katika waktu mangaruhnya datang akan mampauma uras am tege lalam Kristus, am tege ka surga umakan am tege ka bumi. ¹¹ Lalam Kristus, dirie jam jarie jatah mula waris am jarie ditotap-Nya mula sulanya am pas umakan rancana-Nya, am mangawi uras am tege lalam kahona-Nya ¹² nyaman dirie am nampara mangora baharap ka Kristus tahu jarie pujian akan kamuli-Nya. ¹³ Lalam Inya, kolai jam jadi limah manongar firman ambujur, iyaham Injil' amanyalamat kolai, lalu parcayakan-Nya, dimatrai laie Roh Kudus am dijanjieyah. ¹⁴ Roh Kudus iyah jaminan warisan diri, datang malopos akan pamanya am jadi dihompue laie Hatalla kanirie~puji Tuhan laie kakuasa-Nya. ¹⁵ Laie iyah, sota aku manongar malaie imanmu lalam Tuhan Yesus umakan kasayangmu ka uras urang barasih, ¹⁶ aku honta bahontie baucap syukur akan kolai metuh aku ingat kolai lalam doa-doaku. ¹⁷ Aku badoa nyaman Hatalla mula Tuhan dirie, Kristus Yesus, Ompai mula kamulia, mamori kolai roh akal budie umakan panamplalam palajaran akan Inya. ¹⁸ Aku badoa nyaman mata hatimu ditorang nyaman kolai ulilh paham baharap am takanung lalam panimai-Nya, kasugih am takanung lalam warisan-Nya, am mulia akan urang-urang barasih, ¹⁹ umakan kaonya am honta taukur akan dirie am yakin, bera apa am di tunyu lalam pamakah paonya-Nya. ²⁰ Pamakah paonya-Nya itie Inya tunyu katika Inya mahuas Kristus mula antara urang matie umakan manuru-Nya kasorap kanan-Nya ka homan surga, ²¹ am jauh lobih tingie mula uras aturan, kakuasaan, paonya, pamarentah, umakan lobih tingie mula uras nama am tege, honta kali keken itie, tapi jam akan kaharapnya nona. ²² Inya mangalah uras am tege kalowa kaki-Nya umakan mamori arep-Nya jarie palae katingie uras am tege akan ungkup, ²³ iyah am tuwuh-Nya, ka manih gawinya mamonuh urasnya umakan uras am tege.