¹ Laie iyah, anaku, jadie kuat lalam pamorie am tege ka lalam Yesus Kristus, ² Apa am jarie kolaie dongar mulae aku kapaharap banya saksi, parcayakan iyah ka urang-urang am satiae, am ulih jam ma ajar urang bukan. ³ Umae mandarita sabagai prajurit Yesus Kristus am baie. ⁴ Hontae arae prajurit am sibuk akan urusan hirupnya saarie-arie nyaman inya ulih manyonangkan katuanya. ⁵ Berae jam sikue urang olahragawan am batanding, inya hontae dapat baulih mahkota kamonangan kacuali inya batanding ma umae paraturan am balaku. ⁶ Sikue urang am bahuma jarie bagawie borat inya am manjadi urang partama am baulih hak mulae hasil panennya. ⁷ Pikirkan apa am aku paner laie Tuhan akan mamorie kolai pengertian lalam sagala hal. ⁸ Ingatlah Kristus Yesus, am jarie hirup mulae antara urang matie, katurunan Daud, macam am jarie aku paner lalam Injilku, ⁹ am laienya aku keken tie manderita sampai konae panjara sabagai urang am hontae baik, tapie firman Hatalla hontae tapenjara! ¹⁰ Laie iyah, aku batahan lalam sagala sasuatu akan urang-urang pilihan Hatalla nyaman urang jam baulih kaselamatan am tege kalalam Yesus Kristus lalam kamuliaan am kekal. ¹¹ Paner itie bujur: "Amun dirie matie basamah-sama dengan Inya, maka dirie jam akan hirup basamah-samah dengan Inya. ¹² Amun dirie rajin, dirie jam ulih mamarintah basamah Inya. Amun dirie manyangkal Inya, Inya jam manyangkal dirie. ¹³ Amun dirie hontae satiae, Inya jam hontae satiae, laie Inya hontae dapat manyangkal dirie-Nya kanirie." (Pengawie am Manyonangkan Hatalla) ¹⁴ Ingatkan urangnya kan hal-hal itie. Nasihatkan urang ka paharap Tuhan nyaman hontae arae perdebatan laie kata-kata, laie hontae arae gunanya malah mahancurkan urang-urang am mandongarnya. ¹⁵ Gawie apa am baie akan mampersembahkan bahkan diriemu dengan layak ka paharap Hatalla sabagai pegawie am hontae perlu malue, lalu am jarie ma ajarkan paner akan kabujur am baie. ¹⁶ Tapie, baik bajauh mulae paner am mayan buktinya lalue am sia-sia laie hal iyah hontae manaing akan am hontae barasih am lobih parah. ¹⁷ Paner rang nya akan manyebar berae panyakit gangren. Ka antara urangnya yah am Himeneus umakan Filetus, ¹⁸ am jarie manyimpang mulae kabujur, dengan mamaner amun pahirup am jarie tajadie. Urang marusak iman sabagian urang. ¹⁹ Tapie, dasar Hatalla am kuat totap badirie dengan matrai tie: "Tuhan mangonal sapae am jarie hempue-Nya," lalue "Satiap urang am maakue nama Tuhan harus maningal kajahatan." ²⁰ Ka lalam dangaue am bakah, hontae baya tege perabot mula amas umakan perak, tapie jam mulae kayu umakan tanah liat. Sabagian dihonie akan tujuan am tahormat, tapie sabagian jam akan tujuan am hinae. ²¹ Laie iyah, amun sikue urang mambarasihkan dirie mulae hal-hal am hina, inya akan manjarie perabot akan tujuan am tahormat, dikhususkan, baguna akan tuannya, lalue di siapkan akan satiap pegawie am baie. ²² Bajauh kolai mulae nafsu urang babiae, lalue kejar jam kabujur, iman, kasih, umakan damai sejahtera basamah-samah dengan irang am manimat Tuhan dengan hatie am murnie. ²³ Jauh kan mulae basual am bungul lalue hontae bakapintar laie kolai ingat amun hal iyah manatang kalahie. ²⁴ Pagawie Tuhan sabujurnya hontae bakalahie, tapi ramah ka uras urang, tarampil maajar umakan sabar, ²⁵ lomah lomue mangoreksi lawannya. Samoga Hatalla manganugerahi urang batobat nyaman manuntun ka kapintar am bujur ²⁶ nyaman urang manjarie sadar lalue malopaskan dirie mulae jebakan Iblis am jarie mangakap urang nyaman maumakan kahonanya.