¹ Jetro, palijni xuanit nak Madian, xputitlat Moisés, kgaxmatli xlipaks tu xtlawanit Puchiná xpalakata Moisés chu Israel xkachikin. Wa xla kgaxmatli pi wa Puchiná katamakxtulh Israel nak Egipto. ² Jetro, xputitlat Moisés, makgamakglhtinalh Séfora, xpuskat Moisés, alistalh akxni xla ey xmalakgachanit nak chiki, ³ chu chatiy xkamanan, chatum xwanikan Gersón, sampi Moisés tiwa: "Akit kaxamini nak akgtum pulataman tu nikinkachikín." ⁴ xli chatiy xwanikan Eliezer, sampi Moisés tiwampá: "xDioskan ki natlatna kimakgtaya. Wa ki lakgmaxtulh nak xespada Faraón." ⁵ Jetro, xputitlat Moisés, kalimilh xkamán Moisés chu xpuskat nak xakaskajni tiyat tani xla lakgtankuwima nak sipij xla Puchiná. ⁶ Wa xla wanilh Moisés: "Akit, mi puwititlat Jetro, kliminiman mi puskat chu chatiy min kamanan" ⁷ Moisés alh tatanokglha xpuwititlat, takilhputalh chu tsukli. Lakgalhaskinilh laku xuilakgolh chatunu chu alistalh tanukgolh nak xa akgstilhakgat chiki. ⁸ Moisés wanikgolh xpuwititlat paks tu Puchiná tlawanilh Farón chu egipcios xpalakata tlan maxtulh Israel, na lixakgatlilh tu kaokgspulalh nak tiji, chu lantla Puchiná kalakgmaxtulh. ⁹ Jetro lipaxawa xlipaks tu lakuan xtlawanit Puchiná xpalakata Israel, akxni xla xkalakgmaxtunit xmakankan egipcios. ¹⁰ Jetro wa: "katatlankilh Puchiná, sampi Wa kalakgmaxtunitan nak xmakankan egipcios chu nak kxmakan Faraón, lakgmaxtunit kachikin nak xmakankan egipcios." ¹¹ lanchiyu kakgatakgsa pi Wa Puchiná tlakg tlanka ni xtachuná xlipaks tamakanitlaw, sampi akxni egipcios ni tu liukxilhkgolh israelitas, Dios lakgmaxtulh xkachikin." ¹² Jetro, xpuwititlat Moisés, liminilh Dios akgtum tatakin tu lhkuyukan chu tu tlakg kgalhiy xtapalh. Aarón chu xlipaks lakgolutsin xalak Israel minkgolh wakgoy akgtun liwat xlakatin Dios akxtum tawayankgolh xpuwititlat Moisés. ¹³ xlichali Moisés kuluks tawi tsukulh lakaxtlaway takglhuwit nak kachikín. Tachixkuwitat minkgolh chu stilikgolh, puntsisa hasta katsisni. ¹⁴ akxni xpuwititlat Moisés ukxilhi tu xtlawama nak kachikin, wanilh: '¿Tuku chun'a litlawapat nak kachikin? ¿misakstu tawilay chu xlipaks tachixkuwitat lakgminkgoyan puntsisa chu ey katsisni taspitkgoy?" ¹⁵ Moisés wanilh xpuwititlat: "kachikin kilakgmin sampi minnkgoy skinkgoy xtastakyaw Dios. ¹⁶ akxni kgalhikgoy takglhuwit, kilakgminkgoy. Akit kawaniy tu na tlaway chatunu chatunu, chu akit kamasiyuniy xtastakyaw chu xlimapekgsin Dios." ¹⁷ xpuwititlat Moisés wa: ''wa tu tlawapat ni tlan. ¹⁸ Wix na tlakgwana, wix chu kachikin ti lakgminkgoyan. Uma takuka lu tsinka minpalakata. Ni lay katitlawakgoy misakstu. ¹⁹ Kakgaxpatti. Akit nak stakyawayan, chu Dios natatawilayan, sampi wix xpalakachiwina uma kachikin xlakatin Dios, chu wix nalipina xtakglhuwitkan xlakatin Dios. ²⁰ Wix kakamasiyuni tastakyaw chu limapekgsin. Wix nakamisiyuniya tiji tani na tlawankgoy chu taskujut tu natatlaway. ²¹ mililaksakat lakgskgalalan chixkuwin nak kachikin, chixkuwin ti kakninanikgoy Dios, chixkuwin ti xlikana ni lakgatikgoy tumin. Wix nakawiliya napekgsinankgoy kachikin, laki napuxkunikgoy aktum mil, akgtum ciento, itat ciento, chu kgalhakaw latamani. ²² Xlakán nalakaxtlawakgoy takglhuwit wa tu ni lu tuwa, wampi tu laktuwa wix na liminikgoyan. Xlipaks laktsu takglhuwit, xman nalakaxtlawakgoy. Chuna chu ni tuwa ka ti makgkatsi, chu xlakan natakukalenkgoyan uma takuka. ²³ pala chuna na tlawaya, chu pala Dios chuná limapekgsiyan, tlan nalipina uma taskujut, chu kachikin chapaxawa nataspitkgoy akgatunu xchikikán. ²⁴ Moisés kgaxmatli xtachiwín xpuwititlat chu tlawa xlipaks tu chiwinalh. ²⁵ Moisés kalaksakli chixkuwin ti lakgskgalalán xlakgstipan kachikín chu kamapuxkilh nak kachikin, puxkun ti kuentajlakgolh akgtum mil, akgtum ciento, itat ciento, chu kgalhakaw. ²⁶ Xlakán xlakaxtlawakgoy takglhuwit tu nilaktuwa. Wa tu laktuwa xliminikgoy Moisés, wampi tu ka laktsu takglhuwit man xlakaxtlawakgoy. ²⁷ Chuna chu Moisés maxkilh talakaskín xpuwititlat na an, chu Jetro taspitli nak xpulataman.