¹ David lakapastakli nak xnakú: “Namín kilhtamakú nakimakgniy Saúl; xatlan naktsalay nak xtiyatkan Filisteos; Saúl natlakgwan nialh kakintiputsalh tlakg pekgenacha xkilhpan kachikin Israel; chuna tlan naktsalamakgan Saúl.” ² David tayalh chu akchaxan ciento lakchixkuwin ta ankgolh, lakgminkgolh Aquis xkgawasa Maoc, xpuxkukan Gat. ³ David talatamalh Aquis nak Gat, David chu amakgolh lakchixkuwin, chatunu, chatunu paks xkgalhikgoy xpuskat chu xkamankan chu David chatiy xlakpuskatni, Ahinoam Jezreelita, chu Abigail xalak Carmel, xpuskat xwanit Nabal. ⁴ Lakgchilh tachiwin Saúl pi wa David xtsalanit nak xtiyat Gat, nialh lakapastakli para naputsastalay. ⁵ David wanilh Aquis: para kilakgalhamana, kamasta talakaskin kakimaxkikalh putawilh nak kachikín tu wi kpukuxtu laki pi anta nak latamay.: ¿Sampi, tuku xpalakata akxtúm natalatamayán mintasakua nak puchiwin? ⁶ Chuna chu Aquis makamaxkilh Siclag ama kilhtamakú; wa chu xpalakata Siclag waku mapekgsikgoy puxkunín xalak Judá lanchiyu. ⁷ Akgtum kata a akgtati pápa latamalh David nak xtiyatkan Filisteos. ⁸ David chu makgapitsín lakchixkuwin taratlawakgolh lhuwa kachikinín chu kamakglhtikgolh xpulatankán, wa umakgolh kachikinín: gesuritas, gerzitas, chu amalecitas; sampi umakgolh latamanín xlamakgolh nak xtiyat Shur xkitapekgtakgoy nak xtiyat Egipto. Wa xlakan makgán xlamakgolh nak umá katiyatna. ⁹ David xmakasputukgoy tani xankgoy chu ni para chatúm xmakgaxtekga xastakná ni para chixkú, ni para puskat; xkaliyan xtala kalhnilu, wakax, axnu, kgesipijua takgalhín (camello) chu na xkaliyan lhakgat; alistalh xtaspiparay tani wi Aquis. ¹⁰ Chu xwaniy Aquis: “¿Tiku kakitaratlawa uma kiltamakú?” David xkgalhtinán, “nak xpakgalhú Judá, nak xpakgalhú Jerameel, nak xpakgalhú xtiyatkan ceneos, (quenitas)”. ¹¹ David nixmakgaxtekga xastakná para chixkú chi para puskat chu nakalimín nak xtiyat Gat, la uma xwan, “laki ni nakimalakgsiyakgoy chu ni na tawán, David la umá tlawa chu laumá tlawapá.” Ankgalhín chuná xtlaway xlimakgwa xlama xtiyatkan Filisteos. ¹² Aquis kilhkanalh David, chuné wa:” David kamakgasitsima xlitachiki xalak Israel, xlakan makgtúm nalakgmakgankgoy; chu xla ankgalhín kintasakua nawán.”