¹ Quetlhencap elialheng'a, apquelliawec jenganemacja nac nietnec acmowana tacjaplhet'oc apquellelto nac mocjom apjalhnanco'oc, coca apquelletsepo la'a, mmasquec na acmowana jenganemacja. ² Ca actonac lhema nqueluana la apnema la atawa', malha nja ntac acnaqtetemmalhco lhemec atawa' la'a aniem'o jenganemacja, coca apquetsepo la atawa m'a, mmasquec na m'a malha actetema lhemec atawa aniem'o jenganemacja. ³ Coca apno la mocjom atawa, ncomecjac po'oc, ntewasquec atawa. Coca apquetsepo la atawa, mmasquec na acmowana tacjalhet jenganemacja m'a, awanquec ncotengiecjac po'oc atawa, jawe njan acuesai'a m'a actewascama la atawa. ⁴ Nnawec na quetlhencap ma'a elialheng'a, mamma acmowana jenganemacja tacjaplhet'oc ncanec malha apqueletsepmo lheme lhta Cristo, apto njan nema aclhatecjasqueiam apiesecsec apquenmasquenwaiacmo, colhua coca aptancocjac apquelpasmecjac Cristo, apuanca'ac na ellanancoc caselha acleclemelha la apualhoc Engiapom Neten. ⁵ Lhennenga lhta ennenco'o nengellaneianque mota caselha ncolatsecama, jengenmaicama lhta aliasponcomacja nac engellualho'oc, jengelliateianque lhta angellieca' jenganemacja, jengellaianco lhta njan nengetsepma. ⁶ Colhua coca mmasquec jennacteto m'a jenganemacja ennenco'o, ncanec malha neletsepmo lhemec Cristo, enwanca'ac angellasennama Engiapom Neten alhnancoc nentemacja, aniem'o njan jengelleltennasecamoc Apualhoc apanquec ma'a, jawe m'a nentaiancolha lhta lhennenga jengelleltennasecamoc alhta jenganemacja. ⁷ Nquetlheianmec quelha apualho'oc quetlhencap acto ncolatsecama jenganemacja nac, coca jawe niecje m'a, wanlha coca niecje jengascama caselha ncolatsecama m'a. Ma lhta angeliamoc secje lhta ennenco'o mancolatsecama atsepaicama nac ennengiec, coca acuai'o jenganemacja, lhta ntac jengellano': «Mellanamonque mota caselha nac alletsepaicamoc apnengio'oc» ca ntema mota m'a. ⁸ Nelleng'a ennenco'o jenganemacja nac, colhuawec anque lhta njan jengelliatencoc aliasponcomacja nac engellualho'oc cacpota ncoletsepoc ennengio'oc caselha cacpota njan angeliecac jenganemacja, coca mancoietno la jengellascama jenganemacja nac, manjengelliatanque na engellualho'oc aliasponcomacja nac cacpota njan mangelliequec na jenganemacja nac. ⁹ Lhennenga tep nac nanec mamma ennenco'o jenganemacja nac, netamen acuai'o m'a jengescamacja, ca actepo njan jengiatecamoc angeliecac ma'a aliasponcomacja nac engellualho'oc, ¹⁰ malha lhta nelletsepma ntemac ma'a. Ca jenganemacja nac mmajai'a lhta niecje jengellancoc nengelliennactema, coca nsoiacmec ma'a nengetsepma nac, ¹¹ ncanec nellengai'a mota jengellascamacja nac, ca aliasponcomacja nac engellualho'oc jengelliatenquec angelliecac ma'a, netamen ma'a nlhenalhquec antequiewecjac ma'a. ¹² Jai, jawe ngiapac anquec jenganemacja nac aniem'o Engiapom Neten, acpeiwomo m'a canjan actacmanma, aclheianma mota wanlha apqueltemacja mota antec Engiapom Neten. ¹³ Quelha ncotnec atlheianma apualho'oc quetlhencap jawe actacmelo jenganemacja nac ncanec nlhenquec anmatnecja aniem'o nellanai'a ncolatsecama , quelha ncotnec ma'a. Coca mancoietoc etnancoc ma'a, coca acto jengeliantemecja nengetsepmacja acuesai'a nac mongeliamolhma, acto njan jengeliatecamoc cacpota angellanancoc caselha ncolatsecama, jengeliecascama njan jenganemacja acto niecje njan actacmelo. Atlhenquesquecjo njan engellualho'oc mancolatsecama nquec ma'a maniamolhma nac. ¹⁴ Nengelliawec ennenco'o jenganemacja acto actacmelo, aniem'o nac Engiapom Neten, ennenco'o coca nengellelto nac mongeliamolhma, malha actonac esclavos nema aquiamasma la emoc po'oc apuesque acuesai'a m'a moniamolhma cacpota jengellasennama m'a. ¹⁵ Mangelliamoc ennenco'o nenmajai'awec niecje angellanancoc caselha actacmelo, coca netamen nellanenquec caselha ncolatsecama, manconmajai'a niecje angellanancoc ncolatsecama niecje neltacnoncoma m'a, nellanenquec coca. ¹⁶ Nquetlheianwacjec ennenco'o engellualho'oc jenganemacja acto actacmanma, nqueltawec angellanancoc acpeiwomo, coca ennenco'o mongapuanquec angelleliejecjoc ma'a. ¹⁷ Malha niecje jawe aniem'o ennenco'o nellanecamoc ncollatsecama, aniem'o coca jengeliatecamoc mangeliamolhma nac, ¹⁸ aliasponcomacja nac engellualho'oc jengelliatenquec angellanancoc caselha ncolatsecama, niecje mangelleltemo angellanancoc ma'a, coca nellanenquec ma'a. ^{19 20} Nenmac'awec niecje angellanancoc caselha altacmelo, coca mongellanencoc. Mang coca njan niecje nconmac'ac angellanancoc ncolatsecama, ncacjoc coca nellanenquec ma'a. Ca atlheianwacjo ennenco'o engellualhoc ma'a jawe ennenco'o nelleniemai'a, coca aniem'o m'a maniamolhma aquietnema ennenco'o engellualho'oc. ²¹ Jai', nenmac'awe niecje angellanancoc caselha altacmelo, nanquec coca moniamolhma engellualho'oc, ²² awanje niecje nellamelaiam jenganemacja nac Engiapom Neten, ²³ coca engellualho'oc anac ennenco'o nnanquec jenganemacja ncoc maniamolhma nac, nquennapelhquec na jenganemacja apancoc anac Engiapom Neten, jengelliatenquec angellanancoc caselha ncolatsecama. ²⁴ ¡Ennenco'o la ie, se lha jengelpaqnencasquesecja mongeliamolhma malha aquiennactema nquec jengenmaicamoc la'a! ²⁵ Wanlha coca niecje Engiapom Neten apuanquec ma'a aniem'o njan apuesque engancoc Jesucristo, jai', ntase canquec ma'a, gracias Engiapom Neten. Nwacmec actacja nnelha jenque'e, jawe ngiapac anque nenmac'ac angelleliejecjoc jenganemacja Engiapom Neten, coca engellualho'oc anac acmaicama jenganemacja ancoc maniamolhma.