¹ Asmac'ac aleltennacsec lhema aspaioma, enmamoc jata tacja engialheng Febe acto nema asennaicama ¹ mota apiesecsec Jesucristo apquennemolhema m'a aquieto na natemma Cencreas, ² eltacmelcaso ta apquellanei'o aptaiancolha na mota apiesecsec Engiapom Neten apquennemolhema ellanjoc po'oc, ellamoc jata aimelhquelha la'a caselha m'a ncanec aplhanie mota alpasmoma enenlhet'awoc ma'a acuacjo lhta njan co lha'. ³ Ascapasquec na aclheianma ewalhoc Priscila cacpota njan Aquila, jelpasmoma lhta necsa asqueltennaicama ania'a actacmanma aplhenammap Cristo Jesus, ⁴ niecje alletlhenquescama ncotequio'oc aniem'o lhta anmajai'a jeluonquesec tep ma'a, gracia njan co squeltemac ma'a, gracias na aptaiancoc engellialheng'a metnanco nac judios. ⁵ Cacpota njan ascapasquec aclheianma ewalhoc engelialheng'a apcaqnecjelha na mota aquieto acjaiancolha nquec ma'a. Ca njan nlhenquec ewalhoc stema emo'oc ascamelaianlha apuesai'a Epeneto, apto lhta apmanie apanquec meiasqueiam ania'a actacmanma aplhenammap Jesús apiesecsec enenlhet aquieto m'a iocjalhma Asia. ⁶ Nlhenquec na ewalhoc Maria, awanje lhta acmacmecama cacpota ncoltacmelec apquellaniemjaicama quetlhencap jam. ⁷ Nlhenquec na ewalhoc aspaioma lheme Andronico cacpota njan Junias, allelto lhta amania ie ncawec ncoliasqueiam Jesus, alhaiec coca co'o, asnactemommalhco lhta njan lhemec co m'a, awanjec anque lhta njan apquelleliejecjo mota apostoles ma'a. ⁸ Nlhenquec na ewalhoc astema eialheng aniem'o Engiapom Neten, Ampliato apuesai'a. ⁹ Nlhenquec na ewalhoc Urbano, apto njan netlhelhma'ac nenmacmesaicama Cristo, cacpota njan nlhenquec ewalhoc ascamelaianlha Estaquis. ¹⁰ Nlhenquec na ewalhoc Apeles, aplhenammacpo lhta mota apto jawe ngiapac anquec meiasqueiam Cristo, nlhenquec na ewalhoc apquennemolhema apanquec Aristobulo. ¹¹ Nlhenquec na ewalhoc aspaioma lheme' Herodion cacpota njan apquennemolhema apanquec Narciso, apquellelto nac meliasqueiam Apuesque. ¹² Nlhenquec na ewalhoc Trifena cacpota njan Trifosa, awanje canque lhta anmacmesaicama Apuesque, nlhenquec na ewalhoc eialheng Perside, awanjec anque lhta acmacmesaicama Apuesque m'a. ¹³ Nlhenquec na ewalhoc Rufo, apto lhta apqueliequiescama Apuesque, ca njan nquen acto m'a malha meme ejencoc. ¹⁴ Nlhenquec na ewalhoc Asincrito, Flegonte, Hermes, Patrobas, Hermas cacpota njan engellialheng'a apcacjanco lhemec ma'a. ¹⁵ Asmac'ac na ncolhenec ewalhoc Filologo, Julia, Nereo cacpota njan apialheng nqueluana. Nlhenquec na ewalhoc Olimpas cacpota njan aplhamacjo Jesucristo apquennemolhem'a apcacjanco lhemec ma'a. ¹⁶ Elpaiwesacpo ta apancawec apiesecsec quetlhencap jam aquieplomo apquelpetsesammap apmalhempenoc apquelialheng'a, ca apquellapasac na atlheianma apualho'oc jam aplhamacjo apquellelto nac meliasqueiam apquelloma nac jenque'e. ¹⁷ Quetlhencap elialheng'a', ellajo ta mota enenlhet'awoc anac apquenmajai'a la elhpanquesec, apquenmajai'o nac na eliepconec jam, apquenmajai'a njan ellammelhec nema atlhecmoscama lhta apquetlhewai'a quetlhencap. ¡Melpalhcama ncoie'! ¹⁸ Ncanec jawe apquellasennaicama apuesque engancoc Cristo m'a enenlhet'awoc anac, wanlha aptengiaicamo mota anmajai'elha la apualho'oc apanco'oc apancawec, apqueltacmelcasawe mota apquelpaqmetquesaicama apquellelto nac melianweiacmo cacpota elliennenquesec ma'a. ¹⁹ Coca aplhamacjo enenlhet apqueluet'ac quetlhencap apquellelto apquelleliejecjo apuesque engancoc, awanjec anquec apquelpaiesecja ewalhoc. ¡Etnamoc jata mota nema apqueliamo elieplauquesec caselha altacmelo nac, meltamoc coca m'a nema apqueliamo elieplauquesec caselha ncolatsecama nac. ²⁰ Quetse ncaimelhca Engiapom Neten apto metca acmasca ngiapom etnescasecja coneng awesque queliacjamei'o acmowana cacpota elteianmancoc quetlhencap ma'a. Jai', asqueltawec co'o ellamelemma apuesque engancoc Jesucristo quetlhencap, etnanco ta mota njan apquetlhelhma'ac ma'a. ²¹ Nlhenquec na apualhoc quetlhencap alhelhma nac apuesai'a Timoteo, nquetlhenquec na apualho'oc jenque'e aspaiomo lhema nac apqueluesai'a Lucio, Jason cacpota njan Sosipatro. ²² Co'o njan Tercio, asto astalhesquescama waccajac anac aptacja la aplheianma Pablo, nlhenquec na ewalhoc quetlhencap jam apquellelto nac jengellasennaicama lhemec Apuesque engancoc. ^{23 24} Nlhenquec na apualhoc quetlhencap jenque'e Gayo apto apnemacja asnema, apcaqnecjelha nja mota engelialheng'a jenque'e. Nlhenquec na apualhoc quetlhencap apto apqueltacmelquescama pataccom apquellawacja nac jenque'e apuesai'a Erasto, ca njan apcapasac aclheianma apualhoc jenque'e engialheng anac apuesai'a Cuarto. ²⁵ Angeltacnescasancoc jata ennenco'o Engiapom Neten apto apmopuana jengelliennactecsec, ca actemacja nac asquetlhecmoscama ania'a actacmanma aplhemammap Jesucristo. Lhennenga tep nac na nec apenescamo lhema caselha Engiapom Neten apmac'acja ta etnec, malha aposcama coca ntemac, ²⁶ colhua coca aplecuacje jengeluetascasquec najan, apquetlheianmec nac nane mota apquelletsecama ania'a nnenga. ¡Jai! Engiapom Neten apto mengietsepmac aplecuacjec colhua jengeluetascasque alhnacjo ncoie apmajai'acja lhta etnejec cacpota elleliejecjoc, meliascamec najan enenlhet'awoc lhmanquec jam. ²⁷ ¡Ntasec angeltacnescasancoc jata mota metca nnelha apuesai'a Engiapom Neten apto acnema apiamo, wanlha njan apto lhema apjapac apuesque engancoc aniem'o Jesucristo. Amen!