¹ ¿Apqueltacnonconque nlho Engiapom Neten apquennemolhema apanque Israel, je? ¡Ma', co'o njan asto israelita, asto njan aptawen neptamen Abraham, asqueniemai'o apqueliaquiaicamoc apquennemolhema Benjamin. ² Tep nac nanec apqueliequiescamo Engiapom Neten Israelitas cacpota etnec apquennemolhema, man coca njan eltacnoncomac colhuawe nac. Cotlheianwacjo no apualho'oc quetlhengcap secama ania'a Elias apquetlheianmo lhnac nanec co Israelitas meliamolha napaqtec Engiapom Neten, lhna aptemac: ³ «Apuesque, apquennapeianquec apquetsecama ania'a apanco'oc lheiap ja'e, apnaqtewaseianquec na aluanlhenmalhquelha caselha nema acmescama nac lheiap, wanlha coca co'o asqueniem'o napaqtawec ma'a, colhua coca jelleliama apquenmajai'a jennapoc ma'a» lhna aptemac Elias. ⁴ Coca apcatemmoicama lhnac Engiapom Neten ma'a, lhna aptemac: «Asquelpocquenque co'o 7.000 enenlhet'awoc ma'a mellelteclheianco aptapno'oc naqte caselha aquiocja alanemmalhca acuesai'a Baal» lhna aptemac. ⁵ Nnawec na nenwanlha nac, apcacjanquec napocja pquetcoc judios apquellelto apqueliequiescama Engiapom Neten aniem'o apiamolhma apanque', ⁶ jawe aniem'o aptaiancolha apancawec la'a. Ca apqueliequieso la Engiapom Neten enenlhet'awoc aniem'o aptaiancolha apancawec la'a, mmasquec ma'a apqueliequieso aniem'o apiamolhma apanquec ma'a. ⁷ Ca ntemac na colhuawe nac co israelitas, niecje aptengiaicamoc apquelleltemo eltacmelquesquesec apquellaniemjaicama Engiapom Neten, coca meluetanweiacmoc ma'a, wanlha coca apqanetec apqueluetanweiam ma'a, apquellelto nac apqueliequiescama Engiapom Neten. Aplhamacja coca nnenquec aliennactesquescamo apualho'oc. ⁸ Ca actemo nac aclheianma actalhesammalhca waccajac Engiapom Neten apaioma: «Apqueltemescasquec Engiapom Neten malha tenn allapecama apualho'oc, malha njan meluetai'a lhma la apaqto'oc, malha mellengai'a lhma njan apaico'oc, acuacmo nenwanlha nac» lhna aptemac. ⁹ Lhnac na nec na aptemac apuesque David: «Ncotnecjac jata malha aljanemmalhca allanquemmalhca ncolatsecama apanco'oc anac, cacpota njan aljanemmalhca tama cacpota ncolpalesemmac aniem'o aliaqmoncasecja ncawe meliamolhma apanco'oc apancawe'. ¹⁰ Ncolhec jata njan altemesqueso metca apaqto'oc, etnesques jata aljalhema apcapo'oc aniem'o aquientalhnema apquelpatama» ¹ lhnac ptemac. ¹¹ Smac'ac alelmalhnama colhuawe nac ¿Wanlha nlho ta ncotnec apnaicamoc nalhepop judíos apquellelto lhta apquellelpelapeiam, je? ¡Ma, elaqnecjac jata neten! Coca apquellelto lhta apalleiam ma'a cacpota ncotnesquesec jata apqueluoncasemmap tep metnanco nac judíos, cacpota eliasepquesec judíos ma'a. ¹² Ca cno la altacmelquescaso apquellaniemjaicama metno judios anac aniem'o melleliejecjo judíos cacpota njan apalleiam, tep anquec jata ncotnec altacmanma apquellaniemjaicama metnanco judíos acuo'o ta acnem Engiapom Neten apquenmecjo tacja m'a judíos. ¹³ ¡Ellailho no quetlhencap metno judios, co'o asto apostol jeiapascama Engiapom Neten cacpota apaiacsec ania'a actacmanma apiesecsec quetlhencap, awanjec anquec ascai'o asmacmecama nac, ¹⁴ asqueltawec co'o aspaiomo lhema nac ennatjama quetlhencap, netamen jata njan jelquetmoc niecje cacpota atlhecmocsec ancoc apqueluoncasemmap tep ma'a. ¹⁵ Apquenmanquec tacja Engiapom Neten metno judios aniem'o apqueltaqnonwecja judios apancawe nac, netamen jata m'a apquenmocjo la tacja Engiapom Neten judios apancawe nac, neten anquec jata ncotnec altacmallueiam apquellaniemjaicama aplhamacjo enenlhet'awoc lhmanquec jam, ncolhec jata njan acnaqlhatecjascacmo mocjom apiesecsec apquenmasquenwaiacmo. ¹⁶ Ca apmaiaie nac pan apquelenteiapma nema acmescama Engiapom Neten ma'a, nnawec ma'a nema aquiaqjapescama nac harina apto njan nema acmescama. Ca aicapmen'oc la iamet nema acmescama Engiapom Neten, nnawec na m'a actengoc anac nema acmescama njan. ¹⁷ Apquellelto nac judíos malha actengoc anac iamet acuesai'a olivo, moclhem'a coca nnemac aliaqtemanmo m'a, ca acno lhta aliepetquescaiacmo quetlhencap ma'a metnanco nac judios, malha actengoc apquelleniem'o m'a mo'oc iamet olivo amjama nalhma.Colhua coca nietnec aliennactema m'a aniem'o alpetsesma iemmen aicapmen'oc cacpota njan aieiwo'oc ma'a iamet anac. ¹⁸ Coca melacponcoie', melluannama njan quetlhencap actengoc alhta aliaqtemenammalhca, ncanec quetlhencap jawe apquelliennactema apancawoie', coca aniem'o m'a aicapmen'oc lhec ma'a. ¹⁹ Quelha ncotnec atlheianma apualho'oc quetlhencap jeng: —Nnenquec jengeliepetquescaiacmo m'a alanmacja lhta niecje actengoc lhennenga aniem'o quelha nengellelto nengeliamolhma—quelha ncotnec atlheianma apualho'oc quetlhencap. ²⁰ Coca ellajo ta quetlhencap ma'a, apqueliaqtemenammacpe lhta malha acteng'oc alhta lhennenga aniem'o aliasqueiam, ca acno aliepetquescacmo njan quetlhencap ma'a aniemai'o njan meliasqueiam, coca apquelacpo la quetlhencap, ²¹ menmecjec jata njan tacja Engiapom Neten ma'a, etlhojoc jata njan ma'a malha actengoc alhta lhennenga nema aliaqtemanma lhta. ²² Jai', Engiapom Neten apto apiamolhma apanque', apqueltacmelcasquec na apquellaniemjaicama quetlhencap metnanco nac judios, apto njan apiaqmoncasecja apqueltemacja melleliejecjo lhta judios. Coca apqueliengiacjo la aptaicamoc meliasqueiam quetlhencap ma'a, ncolhec jata njan aliaqtemenwactamo m'a. ²³ Coca aptancocjo ta mocjom meliasqueiam judios apancawe nac, eliepetquescacjac jata mocjom iamet olivo alanmacja lhta, apuanquec coca Engiapom Neten etnec ma'a. ²⁴ Quetlhencap apquellelto nac metno judíos, malha lhta actengoc olivo aniem'o nalhma, Engiapom Neten alhta apqueliaqtemanwacmoc ma'a, apqueliepetquescactamo iamet olivo anammalhca nac natemma aniem'o lhta njan apmopuana, apuanque panquec jata njan eliepetquescacjac mocjom actengoc alanmacja lhta lhennenga, iamet olivo anammalhca natemma. ²⁵ Quetlhengcap elialheng'a metnanco nac judíos, melacpo nquec ncotlhenec apualho'oc apqueliequiescama Engiapom Neten aniem'o nema apqueliamo apancawe', jawe m'a. Nietne lhta apenescamo Engiapom Neten aquielhammalhca apmac'acja etnejec, napocja israelitas nqueliennacuaiacme lhta apualho'oc acuacmo toca acnem ma'a aptaicamoc meliasqueiam aplhamacjo nac metnanco nac judios. ²⁶ Netamen eluoncasacpoc jata tep aplhamacjo apquellelto nac israelitas. Ca actemo nac actalhesammalhca waccajac Engiapom Neten apaioma jenque'e: «Na temma Sion engiengiemac jata apqueluonquescama tep cacpota eiengiescasecjac ncollatsecama Jacob. ^{2 27} Coca asto ascanemacja etnancoc cacpota njan atnec co'o, anmasquesquesec jata meliamolhma apquellanecamoc» ²⁸ Ellailhono quetlhengcap metnanco nac judios, mantec israelitas colhuawe nac apquellelto apquellammelhecja ania'a actacmanma nenwanlha nac, coca nqueltacmelcasquesacjec apquellaniemjaicama quetlhengcap ma'a, coca apquellamelacmec mocjom Engiapom Neten ma'a israelitas ncanec apqueliequiescama lhta apquelieijenca neptamna'ac, ²⁹ apquellaweianca lhta njan, apquellaianco njan metca aquianmoma caselhaja, metca apquenmasuecja njan, meluancacmoc na apquellelto lhta apquellawecama. ^{30 31} Lhennenga lhta quetlhencap metnanco nac judios ma lhta elleliejecjoc Engiapom Neten, apquelietnai'awec coca napaqta'ac quetlhencap Engiapom Neten aniem'o m'a melleliejecjoc apquennemolhema apancawe, netamen jata njan ma'a elietnajoc napaqta'a apquennemolhema apancoie', ca aptaianco nac na apquellanei'o quetlhencap. ³² Engiapom Neten apqueltemesquescama aplhamacjo melleliejecjo m'a cacpota netamen mocjom ma'a elietnajoc napaqta'a aplhamacjo nac ma'a. ³³ Neten apanquec aquietnema apianweiacmo Engiapom Neten, apiecpelquemo njan lhamacjo caselha, mongapuanquec ennenco'o angeliamwomjoc alquetamecama apualhoc ma'a cacpota njan apquellanai'a caselhaja. ³⁴ Mamma njan enenlhet eijoc aquietnaicama la apaqtec, mancapuanquec na enenlhet eltennasancoc ma'a. ³⁵ Mamma njan enenlhet apcaicamoc caselha apancoc ma'a cacpota njan aptacjesquescamo la caselha apancoc ma'a. ³⁶ Ncanec Engiapom Neten apto apquellanai'a lhamacjo caselha lhmanquec jam, apanco'oc apancawec ma'a, apquellaicamoc na aliennactema m'a caselha lhta apquelentepquescama cacpota ncollocaja. Jai', ntasec ma'a ncolhec actacnescasencoc apuesai'a lhma nquec jam. Amen.