Capítulo 2
Ania'a apasammalhca apcacnecjelha Jesucristo apquennemolhema aquieto Efeso
1
Etalhes no colhuawe nac ania'a cacpota eniapasquesec enenlhet neten apno m'a Efeso, apcacnecjelha nac Jesucristo apquennemolhema, ca ntac jengque'e: Co'o asto nac asmaicama emec 7 iau'a aquiennacja nac ejectong, asiaijema co mota aisecsec nemacja acjescamacja la nema alaponmatquescama, alienmoma ngcoie'.
2
Asiawe co lhamacjo aptemacja apquelanai'a lheiap, asiawec na aquientalhnema apmacmecama metca apiamasanweiam, asiawec na mepasengwacmoc aptaiancolha la enenlhet meliamolhma, apqueliepconque lhta njan lheiap apqueltemacja enenlhet la apquelleltammacpo apancawec apostoles, coca jawe lhta ntaniapac apuetai'ac lheiap ma'a, apquenmopuanca ania'a m'a.
3
Metca apecjescama lhta lheiap ca njan apuascapma necsa aquientalhnema aniem'o jeiasennaicama, malhtoca jeiamasangwacmoc jeieplecama.
4
Lhema caselha coca mangcoleclemo ewalhoc apquelanai'a lheiap, nwaiwentaniec jeiamelaiam, mangcolhnoc secje lhta.
5
Colheianwacjo no apualhoc secjec anque lhta awanjec anquec lhta jeiamelaiam, eniempanwacjo ta mocjom, elanecja apualhoc, coca metno ta jeng, aniantac jata jam annaqtenwacjac jata candelabro.
6
Coca nleiawec ewalhoc lheiap mepasengwacmoc allanecamoc caselha ngcolatsecama nicolaitas, co'o
njan moujanengwacmoc ma'a.
7
Eltacmelcaso ta apquellailhemo apmac'acja etnec aplheianma Engiapom Neten Apualhoc aplhamacjo apanquec apcacnecjelha la Jesucristo apquennemolhema jam:
—Apquellelto ta apqueliepjonweiacmo allancoc jata aptecamoc aquielhna iamet jengaicamoc aquiennactema ennengiec, amjamo m'a iocjalhma actacmanma ngcoie'
apnacja Engiapom Neten—
Ania'a apasammalhca apcacnecjelha Jesucristo apquennemolhema aquieto Esmirna
8
Etalhes no colhuawe nac ania'a cacpota eniapasquesec enenlhet neten apno m'a Esmirna, apcacnecjelha nac Jesucristo apquennemolhema, ca ntac jengque'e: Co'o asto mangcotnengwaiam annelha ascaniemjaicama
, asquetsepme lhta, astaiecjo njan ejalhnancoc apiesecsec apquenmasquenwaiacmo.
9
Asiawe co'o aplengaianco lheiap, niecje metca apquetsecama, coca malha nema apquetsecama lheiap aniem'o apieploma Engiapom Neten. Asiawec na apiematquesammap lheiap aniem'o m'a apquellelto apquelleltammacpo pancawe nac judios, coca apquenmopuanca ania'a m'a, apquellelto apquelieploma satanas ma'a.
10
Coca meniaga nquec acmac'o ta ngcowac aplengaianco lheiap, moclhem'a ta apiesecsec anac quetlhengcap ngcolhec jata allaclhencaso nemmammalhquelha aniem'o queliaqjameioc, ellengancoc jata acuacmo 10 acnem, nlho ca la njan elleltsepoc jata, coca enenlhet apuascapo la'a, anwancoc jata aquiaqmoiecja apcaniemjaicama aquiennactema apnengiec.
11
Eltacmelcaso ta apquellailhemo apmac'acja etnec aplheianma Engiapom Neten Apualhoc aplhamacjo apanquec apcacnecjelha la Jesucristo apquennemolhema jam:
—Apquellelto ta apqueliepjonweiacmo mangconactewacsec jata mocjom mangcotnescasocjec jata janet apqueletsepma—
Ania'a apasammalhca apcacnecjelha Jesucristo apquennemolhema aquieto Pergamo
12
Etalhes no colhuawe nac ania'a cacpota eniapasquesec enenlhet neten apno m'a Pergamo, apcacnecjelha nac Jesucristo apquennemolhema, ca ntac jengque'e: Co'o asto nac aquietnema pelettaw janet ajanto'oc nema anmalhnoncoma.
13
Asiawe co'o apcawacja nac lheiap mantec ngcolatsecama m'a, ntemengquec awesque satanas jam, nnengquec aqjemo m'a ascasennaicama apuesai'a Antipas, awanjec anque lhta jeliejecjo m'a, apaiescamo mota ania'a asuesai'a co'o. Lheiap coca apuascapquec necsa aquientalhnema, mangcoca eluatesac aptema manjeiasqueiam.
14
Coca mangcolcoc ewalhoc lheiap apquenmo tacja apquellelto nac apquelieplauquescama jengetlhecmoscama Balaam, apiatenque lhta m'a apcanco apaioma Balac elleltennacsec ania'a co Israelitas, ntasec etawancoc nentoma nema acmescama caselha aquiocja alanemmalhca nac, eliepetcasancoc na apqueltacnescasecamoc asuesai'a co'o.
15
Mangcoleclemoc na ewalhoc aquenmamo tacja lheiap apquellelto nac apquelieplauquescama jengetlhecmoscama nicolaitas, momamac co'o tacja m'a jengetlhecmoscama nac.
16
Elanecja ta apualhoc, coca melanacjo la apualhoc lheiap jeng, awatac jata jam annapalhcac jata enenlhet'awoc anac meliamolhma aquieplomo pelettaw acteiapma ejetong anac.
17
Eltacmelcaso ta apquellailhemo apmac'acja etnec aplheianma Engiapom Neten Apualhoc aplhamacjo apanquec apcacnecjelha la Jesucristo apquennemolhema jam:
—Apquellelto ta apqueliepjonweiacmo allancoc jata aptecamoc nentoma alielhanmoma m'a neten, mana apuesai'a m'a. Allancoc jata njan metaimong atcoc aquietno actalhesammalhca nengwesai'a alhnancoc meliojo' mocjom, wanlha coca enenlhet apto aplhewai'a apiawec jata m'a—
Ania'a apasammalhca apcacnecjelha Jesucristo apquennemolhema aquieto Tiatira
18
Etalhes no colhuawe nac ania'a cacpota eniapasquesec enenlhet neten apno m'a Tiatira, apcacnecjelha nac Jesucristo apquennemolhema, ca ntac jengque'e: Co'o asto Engiapom Neten apquetca, aquietno malha talha alaponmatema ejaqto'oc, emancoc coca alaponmatema ncoie' malha ctonac tawa nenmalhnongcoma ajantec colhua'
.
19
Asiawe co'o lhamacjo caselha apquelanai'a lheiap, asiawec na manjeiasqueiam co'o, jeiamelaiam najan, asiawec na ngcanantaiangquec apmacmecama, mangcolhnoc ma'a secjec anque lhta, metca nnelha apmacmecama lheiap cacpota eltacmelquesquesec apquellaniemjaicama po'oc.
20
Coca mangcoleclemoc ewalhoc apmamo tacja lheiap Jezabel, aclhenammalhco nque lhta acto secama ania'a acpaiescama asuesai'a co'o, coca acmowana ania'a m'a, wanlha coca actengiaicama ngcoliennengquesec asquellasennaicama co'o, aliateianco njan ntasec etawancoc nentoma nema acmescama nac caselha aquiocja alanemmalhca, apqueliepetcaseianco lhta njan apqueltacnescasecamoc asuesai'a co m'a.
21
Ascanque lhta co'o acnem asquelailhema cacpota ngcolanecjac au'alhoc, coca mangcomac'o la ngcoluatacsec ngcoijamolhma,
22
23
anwapasquesec jata aquiawai'a acmasca aiempec, annapoc jata njan atcac.
Coca apquellelto nac apquelieplauquescama atlhecmosecamoc ma'a mellanacjo la njan apualho'oc, allapasquesec jata njan aquientalhnema tacjaplhet'oc ma'a. Eluetac jata aplhamacjo engellialheng'a m'a, ngcotlheiangwacjoc jata apualho'oc asto asiojo njan apualho'oc apancawe ca njan atlheianma apualho'oc aplhamacjo enenlhet'awoc.
Enenlhet apto la apquelanai'a actacmanma, actacmanma njan ascancoc ma'a, coca apquelan'o la ngcolatsecama, ngcolatsecama njan ascancoc ma'a.
24
Coca quetlhengcap jam co Tiatira, apquelleltonac melieplauquescama atlhecmosecamoc nqueluana nac, apquellelto la njan metengiaicamoc casecapoc au'alho'oc Satanas, wanlha asqueltawec co allancoc lhema aspaioma.
25
¡Etlhenques manjeliasqueiam anac aquiennactema acuacmo asuacta mota mocjom jam!
26
27
28
Apquellelto ta apqueliepjonweiacmo, apquetlhencaso la jelleliejecjo njan, allancoc jata iau'a sosecje na apteiapma, allancoc jata njan apquelientalhnemo etnancoc apqueluescai'e apiesecsec lhamacjo apquellawacja, ca stonac co'o jeiaiangco nac asientalhnemo co'o Tata, etnancoc jata apqueluescai'e apiesecsec enenlhet aquiennactema ngcoie', elpalhcatecjac jata apquellammelhma malha acto nac ietanwalhwa nelpalhcatma.
29
¡Eltacmelcasamo ta aptacja aplheianma lhquec Engiapom Neten Apualhoc apcacnecjelha nac Jesucristo apquennemolhema jam!