Capítulo 19

1 Netamen asleng'o lhta mocjom aquiennoma lhma neten, malha lhta aptonac aplhamacma apanquec la enenlhet'awoc aquiennactema nquec ma'a, lhta aptancoc: —Eltacnescasamoc apuesque engancoc, Engiapom Neten apto acnema apmopuana apanque', jengelwoncasque lhta tep, ietawec antacnescasancoc apuesai'a m'a, 2 ncanec apqueliecpelquec aptaiancolha enenlhet'awoc aquietemo ngquec ma'a cacpota njan acto jawe ngiapac anquec, awanjec apiaqmoncasecaja actemacja nqueluana alanactema, atlhecmoscamo lhta mota enenlhet'awoc eltacnescasancoc caselha aquiocja alanemmalhca, apiaqmoncasacjec na actemacja aniem'o lhta annapma apquellasennaicama m'a—lhta ntac aquiennoma lhma m'a. 3 Apqueliennactesque lhta mocjom apquelpaqmeiasma aquiennoma lhma lhquec, lhta aptancoc: —¡Aleluya, angeltacnescasancoc nenlhamacjo Engiapom Neten ncanec mancoluatacsec jata anmecja neten eten ancoc acmeta nqueluana alanactema nac ma'a!—lhta aptancoc ma'a. 4 Apqueljalhantamo lhta 24 metno apquetcoc alhta cacpota njan 4 caselha newjac alhta, apqueltacnescasenco Engiapom Neten apnemo aquieto aptanema, lhta aptancoc: —Ntase', amen, aleluya, ietawec angeltacnescasancoc apuesai'a m'a—lhta aptancoc ma'a. 5 Netamen asleng'o mocjom nema aliatecama aniem'o aquieto nema actanema, lhta nna acto: —Eltacnescasamoc Engiapom Neten apuesque engancoc aplhamacjo quetlhengcap, melientalhnemo, apquelientalhnemo, apquellelto apquellasennaicama, apquellelto njan apquellai'o m'a, ietawec eltacnescasancoc apuesai'a m'a—lhta ntac nema aliatecama. 6 Asleng'o lhta mocjom ngquescama apquelpaqmeiasma enenlhet'awoc, malha lhta ntac aliepioma iemmen acsepcanmacja la'a, malha njan apiennactema la apquelhtengioma, lhta ntac: —¡Aleluya, ietawec angeltacnescasancoc Engiapom Neten acno apmopuana, ncanec nquenawec aptema apuesque colhuawe nac, 7 ncolpaijecjac engellualho'oc, angelletsewasojo, angetlhenec apto neten apanquec apiaspommap apuesai'a m'a ncanec ngwa'a cnem acmajai'a ngcoliemjapoc Nepquesec Apquetcoc, mpenesawec apmajai'acja alanecja actacja, 8 nnec alto ngcotalhnecjac actalhnema apmennawe lino, acmopai'a apanque, apcaponmatemo njan, ca actalhnema nac lino aquietquesammalhca apqueltemacja apquelpeiwomo apquennemolhema Engiapom Neten—lhta aptancoc ma'a 9 Netamen, lhta ptac jeiano Enenlhet Neten: —Etalhes, apquenmapseiwac'a apquellelto apquellanemmap elpasenwomoc tacmelaicama lhma aliemjapma Nepquesec Apquetcoc, ca stacja nac co'o alheianma aniem'o Engiapom Neten, apto jawe ngiapac anquec mota apaioma—lhta ptac jeiano Enenlhet Neten. 10 Ca asquelteclheio' lhta etapno'oc napaqtec Enenlhet Neten cacpota anwajo niecje, coca lhta ptac jeiano: —Jawe', metne jam, coca nietawec engiajoc ma'a Engiapom Neten, co'o njan asto jeiasennaicama m'a, snnawec co lheiap ca njan apquelialheng'a nac, ngjetlhe mota nengelieplauquescama jengetlhecmoscama lhta Jesus, coca ania'a actacmanma nac actemacja lhta aplheianma Jesus ngquellangque mota apquelliennactema apquetsecama ania'a cacpota etlhenquesec apquetlheianma ania'a nac—lhta ptac jeiano Enenlhet Neten.

Enenlhet apiepjonweiacmo etanlheng acmopai'a apcanantema
11 Asuet'a lhta acmaijacjo neten, apianque lhta lhema etanlheng acmopai'a, apto lhta apcanantema m'a apuesai'a apeiwomo cacpota njan apto iocjalhme', apte lhta mota apuesque apeiwomo panque aptemacja, apquennapecpo la njan apquellelto nac meliamolhma. 12 Ngquelaponmatque lhta apaqto'oc malha lhta nta ctonac talha, malhta ntec aptetema apqatec corona, nietne lhta actalhesammalhca apuesai'a apanque mongiojo' mocjom, wanlha coca apiawec ma'a. 13 Aptalhnema lhtoca nema aquielhuasescama ema, apuesai'a apancoc coca Engiapom Neten apaioma. 14 Neptamen alhtoca apquetlheiam quempocjacme apancoc apquelleniem'o neten, etanlheng apquenmopai'a apquelcanantema, apquenmopai'a apanque lhta apquelentalhnema m'a lino apmennawe, apquenmopei'o panque. 15 Asuet'o lhta mocjom apuesque lhquec, ntepque lhta apatong pelletaw janet necja'a ajanto'oc cacpota eliensasancoc lhamacjo apquellawacja lhmangquec jam, etnec jata apuesque apiennactema apanquec ma'a, elteianmoc jata apanquec na uva apquelietsemongama apquelanai'a vino, coca aquietquesammalhca aquiawai'a nquec aploma Engiapom Neten acnema apmopuana apanque'. 16 Apqaclammap alhtoca acuecjo nepua'ac aptepio'oc, nietne lhta aptalhesammap ma'a alqama, lhta ntac: Apuesque neten apanquec aquietnema apmopuana melhno lhmangquec jam, lhta ntac actalhesammalhca m'a. 17 Netamen asuet'o Enenlhet Neten apquenmanca neten acnem, apiennacteso lhta apaioma apquelpaqmetqueso anata actoma enjapetec allelto aliaijecama netne canque, lhta ptac: —Cotlheng jalep, conmeiacja ja'e acnanquelha nac actecamoc, apquelpenescasquec Engiapom Neten actecamoc quetlhengca', 18 cotawamoc apjapetec apqueluescai'e, apuesque quempocjacme, enenlhet apqueliennactema, etanlheng apjapetec, apquellelto njan apquelcanantema, apjapetec enenlhet'awoc aplhamacjo, esclavo, metno esclavo, metca apquelletsecama, nema apquelletsecama—lhta aptac Enenlhet Neten apquellano anata jentoma. 19 Netamen asuet'o lhta caselha newjac alhta acloma, anquesacjo apqueluescaie lhmangquec jam cacpota njan quempocjacme apanco'oc, ngquenmac'a lhta ngconnapalhca apuesque apto lhta apcanantema etanlheng apmopai'a aquieplomo quempocjacme apancoc ma'a. 20 Coca mpatjetalhque lhta caselha newjac acloma aquieplomo apsecama ania'a anco lhta apmopuana ania'a, apquelanai'a lhta mota caselha mongwetai'o naqtec ma'a, apqueliennenquescanque lhta njan apquellaianco lhta nema acnactalhescama alpaijacja napaqta'a, apqueltacnescaseianco lhta njan nema aquietquescamo aquiocja m'a caselha newjac acloma nac. Coca nquelpatjetalhque lhta lhemec ma'a caselha newjac acloma cacpota njan secama ania'a ancoc, nne lhta aquiengiewo aquieto pangcalhwa aquietnemacja talha aimenec azufre. 21 Netamen apquennapque lhta aplhamacjo quempocjacme ancoc caselha newjac acloma, apto lhta apuesque apcanantema etanlheng apmopia'a, apquennapque lhta aquieplomo acteiapma apatong pelletaw acuenactema janet necja'ac ajanto'oc. Ngquellempawe lhta anata jentoma actawenco apjapetec enelhet'awoc acuacmo aliaqcanacmo lhta m'a.