Capítulo 4
1
Quetlhencap elialheng'a, Engiapom Neten jata ellancoc altacmanma apquellaniemjaicama quetlhencap, ca ncanec na ntasec etlhenquesec aquiennactema nquec apquelleliejecjoc Apuesque. Awanjec niecje njan asqueltemo atnentac amiaca'a jam ncanec apquelpaiesecja mota ewalhoc co'o,
quetlhencap malha asnaqsepma
la'a alhewai'a aniem'o Engiapom Neten jellaicamoc.
2
Asqueltawec co'o Evodia cacpota njan Sintique ncotnancocjac acnemo mo'oc atlheianma au'alho'oc ncanec engelialheng'a aniem'o Apuesque.
3
Lheiap apto alhelhma jeiasecjai'o aptema nengaqte' mota asmacmeca, ntasec elpasmoc jam nqueluana'ac anac ncanec jelpasmonque lhta mota aspaiescamo ania'a actacmanma. Clemente lhta njan netlhelhma'ac ma'a canjan aplhamacja alhta, nnaianquec coca apqueluesai'a m'a lhema waccajac aquiennactema ennengiec ncotnenwaianlha nnelha'.
4
¡Colpaijecja ta mota apualho'oc aniem'o Apuesque, jai, colpaijecja ta mota apualho'oc!
5
Cacpota eluetac enenlhet apquellelto apqueliamolhma quetlhencap ¡Apcanquetuactec apuesque!
6
Molleltama nquec apualho'oc, elelmalhna coca mota Engiapom Neten alaimelhco la caselha apanco'oc, etnamoc jata njan gracias.
7
Netamen ellancoc jata njan Engiapom Neten aquiawai'a nquec manwaiam annelha metca acmasca apquellaniemjaicama, eltacmelquesquesec jata njan apualho'oc cacpota njan alquetansema apualho'oc aniem'o njan Cristo Jesús ma'a.
8
Quetlhencap elialheng'a, asmac'ac aleltennacsec mocjom actacja nnelha, cotlhen jata apquellualho'oc lhamacjo caselha acto jawe ngiapac anque', nentemacja njan acto aquietemo nquec nengai'o emmo'oc anac, caselha acpeiwomo, caselha alhnai'o nquec, caselha acleclema enwalhoc, canjan aclhenammalhca nac caselha altacmelo. Jai', lhamacjo caselha lhquec altacmanma alheianma, caselha aclhenammalhcac altacmelo, ntasec ncotnancoc jata mota atlhenaicama apualho'oc ma'a.
9
Ellanamoc jata mota lhamacjo astemacja lhta mota asquetlhecmoscama apqueluetai'o lhta asquellanai'a, eluanamoc jata mota astemacja nac, netamen Engiapom Neten apto nac metca acmasca ngiapom etnancoc jata mota apquetlhelhma'ac ma'a.
10
Awanjec acpaijecja ewalhoc atlheianmo apualho'oc asnaja' co'o jenque'e ncanec jelpasmec mocjom, manalhmoc la jeleluancamaiancoc quetlhencap, quelha nqueniemai'ac mamma elmesquesec.
11
Niecje aimommalhca caselha co'o, ntasec coca co'o m'a, ewanquec coca aiensepancoc quetsec.
12
Ewanquec na aloca necsa mec jaiaqjema, cacpota njan necsa asiapqaneiamo la'a, necsa metca caselha ejencoc cacpota njan caselha jeiecanweiacmo la'a.
13
Ewanquec coca mota njan aiepjonwomjoc aniem'o Cristo jeiaicamoc asiennactema,
14
coca ntasec na jelpasmomo quetlhencap ma'a necsa aimommalhca caselha ejencoc.
15
Asquempaiacja lhta secjec anquec aspaiescama ania'a actacmanma aquieto m'a Macedonia, wanlha lhta mota quetlhencap co Filipos jellapasquescama pataccom ma'a, mamma mo'oc necja nac engellialheng'a.
16
Ca asnemo lhta njan ma'a Tesalonica nlhamacme lhta njan jellapasquescama pataccom astengia'o lhta njan alaimommalhquelha lhta co m'a.
17
Jawe co'o astengia'a mocjom pataccom asquelleltennaso nac quetlhencap, wanlha coca astengiac etlhewancoc nema aquiaqmoncasecja ta aniem'o jelpasmoma co'o.
18
Alhewanwactec caselha jellapasquescama quetlhencap apsenta coca Epafrodito jenque'e, jeiecanwacme', nlecama njan ewalhoc malha ntac tonac acmases la aimes nema acmescama nac Engiapom Neten cacpota ncolcama njan apualhoc ma'a.
19
Engiapom Neten apto nema netsecama ngiapom aquiawai'a nquec, ellancoc jata lhamacjo caselha alaimommalhquelha la quetlhencap aniem'o njan Cristo Jesus, jawe ngiapac anquec jata ncotnec ma'a.
20
Angeltemesquesancoc jata mota gloria apto Engiapom Neten. Amén.
21
Asqueltawec nac anwapacsec aclheianma ewalhoc aplhamacjo Jesucristo apquennemolhema jam,
apquellapasquec na atlheianma apualho'oc Jesucristo apquennemolhema asquetlhelhma'ac anac jenque'e,
22
ca njan apquellapasac atlheianma apualho'oc apquellelto Jesucristo apquennemolhema apquellawa nac jenque'e, apquellelto nac na apquenmacmesaicama apiau'acja apuesque Roma apquellapascamo na mota atlheianma apualho'oc quetlhencap.
23
Jai', asquenmalhnescasque mota Apuesque Jesucristo cacpota eiengientac actemacja nengiamolhma tacjaplhet'oc quetlhencap.