¹ Co'o Pablo cacpota njan Timoteo, nengellelto jengelasennaicama Jesucristo, nquetlhenquec engellualho'oc engelialheng'a apcacjanco jam aquieto natemma Filipos, apquellelto Engiapom Neten apquennemolhema aniem'o apquelpasmecja Cristo Jesus. Ca njan nquetlhenac na engellualho'oc ennenco'o apquelemjama apmaniaie' jam cacpota njan nema allasennaicama ¹ nac. ² Nengelleltawec Engiapom Neten cacpota njan apuesque Jesucristo ewaiwesentac apquellamelaiam cacpota njan metca altaicama apualho'oc jam. ³ Gracias co'o astajac Engiapom Neten necsa aclheianma mota ewalhoc quetlhencap, ⁴ asquenmalhnescasquec na m'a aquieplomo acpaijecja ewalhoc cacpota eltacmelquesec moclhem'a quetlhengcap ma'a, ⁵ ca ncanec ampai'acjasecja lhta apquellengai'o secjec ania'a actacmanma acuacmo nenwanlha nac, jelpasmonque lhta mota asmacmecama nac. ⁶ Ampaiosecja lhta apquelanai'a Engiapom Neten apqueltacmelquesquescaiam apualho'oc apiesecsec anac quetlhencap, jawe ngiapac anquec epenacsec jatoca m'a apmacmecama nac acuacmo apuactamo ta Jesucristo jenque'e. ⁷ Nietawec atnec aclheianma ewalhoc quetlhencap aquieplomo acpaijecja ewalhoc ncanec jelpasmoma mota nesca asmacmecama aniem'o Engiapom Neten jeiaicamoc aniem'o njan jeiamelaiam ma'a. Jai, niecje asnema conne nengaqjencasemmalhquelha canjan napaqtawec apqueluescai'e cacpota anwasennalhco ejenque aniem'o ascanemmalhca moiecacsec aspaiescama ania'a actacmanma, jelpasmonque mota njan quetlhencap ma'a. ⁸ Apiawec coca Engiapom Neten awanjec jeliepuaiam asmajai'a aluetecjac quetlhencap jam aniem'o aquiawai'a asquellamelaiam aniem'o njan Cristo Jesus. ⁹ Asquenmalhnema njan Engiapom Neten eluanenquesquesec apquellamelammacpo apiesecsec anac quetlhencap, cacpota njan ellanco acnema apqueliamo cacpota elianwomjoc na ¹⁰ aquietemo nque nac nentemacja. Netamen ma'a elloca ta metca apquellanecamoc caselha ncolatsecama, mancolhec jata njan apquetselhnanemmap napaqtec Cristo apuactamo ta mocjom. ¹¹ Jai, ellanancoc jata nquescama caselha altacmelo quetlhencap jam aniem'o apquelpasmoma Jesucristo, netamen jata njan eltacnescasancoc, ellajoc jata njan Engiapom Neten apuesai'a apquellelto la apqueluetai'a enenlhet'awoc jam. ¹² Quetlhencap ellialheng'a, smac'ac aleltennacsec colhuawe nac niecje asnema conne' nengaqlhencasemmalhquelha', ntasec coca njan mpaijenquec ania'a ctacmanma ¹³ jenque'e napactawec apqueluescai'e apcajaiancolha nac pa'at aquiawai'a, cacpota njan aplhamacjo enenlhet'awoc anac jenque'e. ¹⁴ Necsa apquelengai'a lhnac engelialheng'a asnema jenque'e nengaqlhencasemmalhquelha' nac, awanjec na lhta apqueluascapejo apquelpaiescama ania'a actacmanma metca apquellai'a aquieplomo njan meliasqueiam Apuesque. ¹⁵ Moclhem'a lhta apquelpaiesac ania'a aplhenammap Cristo aniem'o jeliasepquescama co'o aptengianque lhta njan apquenmajai'a jellammelhecja, napocja alhtoca apquelpaiesquec ania'a aplhenammap Cristo altacmanma apualho'oc ¹⁶ aniem'o aquietnema apquellamelaiam, apquelliawec na apto Engiapom Neten jeiaicamoc asmacmecama nac cacpota anwasennalhco anio'oc ania'a actacmanma. ¹⁷ Coca napocja apquelpaiesquec ania'a actacmanma aniem'o apquenmajai'a etnancoc neten apancawec napaqtawec enenlhet, jawe iocjalhmoie', wanlha coca apquenmajai'a jenactewacsec co'o necsa asnema jenque'e nengaqlhencasemmalhquelha nac ¹⁸ Coca ncacjojo, niecje jawe iocjalhme, nlho ca la iocjalhme, mpaijacjec ewalhoc co'o ncanec nnec acpaieso ania'a aplhenammap Cristo. Coca ncopaijecjac jata mocjom ewalhoc ma'a ¹⁹ ncanec asiawec co'o ncolhec jata ewoncaso tep aniem'o jelelmalhnesquescama quetlhencap, aniem'o jepasmoc jata njan Apualhoc Jesucristo. ²⁰ Jai', nietnec aljalhanma ewalhoc manjenmancacsec jata njan enenlhet'awoc, jawe ngiapac anquec, eluetac jata aplhamacjo aquietnema asmopuana aniem'o Cristo, niecje astema ejalhnancoc mocjom nlho ca la amasquenwomoc jatelhaja. ²¹ Ca asto la mocjom ejalhnancoc, anwasennama ta mota mocjom Cristo, coca asmasquenwacmo la'a ntasec na ncotnec ma'a. ²² Coca asto la mocjom ejalhnancoc ewanquec apasmoc mocjom cacpota altacmelquesquesec apquellaniemjaicama aplhamacjo enenlhet'awoc jenque'e, moijoc actemacja janet caselha nac co la actacmelacja atnec ma'a. ²³ Nientelhec anquec angeliequiacsec ma'a, asqueltawe niecje amasquenwomoc cacpota amjamcoc ma'a alhnemoc napocja Cristo, coca m'a neten anquec actacmanma. ²⁴ Coca ntasec na atnec ejalhnancoc mocjom jenque'e cacpota alhenquesec asquelpasmoma quetlhencap. ²⁵ Jai', asiawec co'o ascaimelhque mota apiesecsec anac quetlhencap jam, ca ncanec momasquenwacmoc, alpasmoc jata mocjom cacpota ncowanamoc meliasqueiam, elloca ta njan alpaijecja apualho'oc. ²⁶ Aniantac jata mocjom jam apiesecsec anac quetlhencap, ncolpaijecjac jata apualho'oc jelueto ta aptemacja Cristo jepasmoma m'a. ²⁷ Wanlha asqueltawec allancoc lhema aspaioma asquellanemacja etnancoc quetlhencap, ellanamo mota caselha acpeiwomo ncoie actemacja nac jengetlhecmoscama ania'a actacmanma aniem'o Cristo, ncacjoc mongiacje' nlhoca la angiacjac jam asqueltawec coca aijo ejenque njeclhec quelha aliennactema meliasqueiam, acnemo njan mo'oc apualho'oc apquellammelhma la njan aquientalhnema acuai'a la'a aniem'o m'a meliasquiam ania'a actacmanma. ²⁸ ¡Mellaga nquec alammelhaicama nac! Ncotlhenec jata au'alho'oc nconaqtewasalhcac ma'a, ncotlhenec jata njan au'alho'oc eluonquesec jata tep Engiapom Neten quetlhencap ma'a. ²⁹ Engiapom Neten apquellaicamoc quetlhencap caselha actacmanma nquec acuesai'a meliasqueiam Cristo, apquellaicamoc na apquellengaianco aquientalhnema aniem'o apquelleliejecjo Cristo. ³⁰ Ca ctemo lhta co'o ascaniemjaicama aslengaianco lhta aquientalhnema, acuacmo njan colhuawe nac, apquelliawec quetlhencap ma'a.