¹ Co'o Pablo ascaqlhencasemmalhquec aniem'o jeiasennaicama Cristo, alhelhma njan jenque'e stema eialheng Timoteo, nquetlhenquec engellualho'oc lheiap Filemón apto nentemo lhemec nellamelammalhco mota nenmacmecama, ² nquetlhenquec na engellualho'oc Jesucristo apquennemolhema apcaqnecja na mota apnemacja lheiap, engialheng nqueluana Apia canja Arquipo apto lhta netlhelhma'ac amota necsa malha nennapommalhca nelleltennaicama ania'a actacmanma. ³ Asqueltawec Engiapom Neten apto engiapma'ac cacpota njan apuesque Jesucristo eluaiwesentac metca acmasca canjan nengamelaiam tacjaplhet'oc quetlhencap jam. ⁴ Lhamacjo acnem amota njan necsa asquenmalhnoncoma la'a nlhenque mota ewalhoc lheiap, astec na gracias Engiapom Neten ⁵ ncanec asleng'a lhta apuesai'a lheiap awanjec na lhta apcamelaiam, mei'asqueiam najan apuesque engancoc Jesús, canjan apquellamelaiam na lhta Egiapom Neten apquennemolhema nac. ⁶ Asquenmalhnescasquec na Engiapom Neten lheiap meiasqueiam anac ncotlhecmosecjac jata nquec lheiap ma'a lhamacjo caselha nac altacmelo, apuanquec jata elanac ma'a aniem'o lheiap apcamelaiacmo Cristo. ⁷ Stema eialheng, awanjec acpaijecja' ewalhoc, nieplawawec na atsecja ewalhoc ncanec asleng'o lhta apquelpaiescaiam apualho'oc Engiapom Neten apquennemolhema lheiap aniem'o apquellamelaiam ma'a. ⁸ Ewanque niecje co'o altoc almalhnama lheiap aquiennactema nquec lhema caselha la aniem'o aquietnema asientalhnemo jeiaicamoc Cristo, ⁹ coca mancomac'ac atnec asiennai'o, wanlha coca asqueltawec jeiasecjo la'a aniem'o jeiamelaiam lheiap ncanec asuaneiam co'o, ascaclhencasemmalhquec najan aniem'o jeiasennaicama Cristo Jesús. ¹⁰ Asqueltawec co elanac lheiap lhema caselha ncotacmelecjac apcaniemjaicama Onesimo ncanec malha eietca co'o jenque'e, alhenquec co'o njan ania'a actacmanma jenque'e aquieto nac nellaqlhencasemmalhquelha, co'o njan asto malha apiapom jenque'e. ¹¹ Escalvo apancoc alhta lheiap, mang na lhta ncolatsecama apmacmesaianca lheiap, colhua coca aptase panquec ascasennaianca mota jenque'e, jatelha njan aptasec jata etnec apcasennanca ta lheiap jam. ¹² Anwapacse ta jam cacpota engiasennama mocjom lheiap, ema ta tacja ncanec malha njan asuecta la co'o jam. ¹³ Asqueltawec niecje elhec mocjom jenque'e cacpota anwasennama mota necsa ascaclhencasemmalhca aniem'o aspaiescama ania'a actacmanma. Asqueltawec na niecje etnec malha apcapascama la mota lheiap jenque'e cacpota jepasmoc, ¹⁴ asqueltawec coca lheiap eijo panquec etnesquesec, momac'ac aiennajo', wanlha coca asqueltawec apmac'acja la etne panquec lheiap. ¹⁵ Apiengiecjec quelha iacuatacjo lheiap jenque'e, coca apuactamo ta jam ntasec elhec acuancacjo jam, ¹⁶ eluatacsec quelha njan aptema esclavo, etnecjac quelha njan apquellanei'o lheiap malha apialheng la'a apcamelaiacmo, ntasec anquec engialheng la'a melhnoc esclavo nac. Awanjec co'o ascamelaiam jenque'e, lheiap coca ntasec jata njan etnec neten anquec apcamelaiam, ca apto nac esclavo la'a apiamolhma angamelemmac ma'a, coca apto njan ma'a malha apialheng aniem'o Apuesque. ¹⁷ Ca jeiamelacmo la lheiap aniem'o stema eialheng mongiasqueiam anac, ntasec na emoc tacja jenque'e malha acto la co'o. ¹⁸ Coca aquietno la aptewascamo lheiap, nlhco la njan apqueliaqmoma la'a, ntasec jenmalhnenwata aquianmoma asianmonquescama la'a. ¹⁹ Co'o Pablo ai'anmonquesec jata, jawe ngiapac anquec astacja anac, astalhescasquec aquieplomo firma ejencoc waccajac anac. Coca ntasec quelha niecje manjenmalhnama aquianmoma ncanec lhamacjo caselha apanco'oc anac alleniem'o aspasmoma lhta mota co'o. ²⁰ Eialheng, ntasec eliejecjoc asqueltacja etnec lheiap cacpota ncotacmelecjac asnema co'o jenque'e, etne ta ncanec apcamelaiacmo Cristo lheiap, aniem'o njan malha engelialheng'a. ²¹ Astalhescasquec co'o lheiap asiawec jeliejecjoc jata, neten anquec jata etnec lheiap apquellanai'a caselha asqueltacja nac etnejec. ²² Jepenescaso ta njan lheiap asnemacja la'a, awatac jatelha jam astema amaica'a, engiatemmonjoc jatelha Engiapom Neten apquelelmalhnoncoma mota quetlhencap jam. ²³ Nlhenquec na apualhoc lheiap jenque'e asquelaqlhencasemmalhco nac lhemec Epafras aniem'o nellasennaicama Cristo Jesús, ²⁴ nquetlhenquec na apualho'oc lheiap jenque'e Marcos, Aristarco, Demas cacpota njan Lucas apquellelto asquenmacmecama lhemec. ²⁵ Asqueltawec na apuesque engancoc Jesucristo ewaiwesentac tacjaplhet'oc quetlhencap nengamelaiam anac.