Capítulo 6

1 —Jata apquellan'o ta caselha actacmanma quetlhencap, mellanamo nquec napaqtawec enenlhet cacpota eluetac ma'a, meiacmoncasecjec jata aquianmoma Engiapom Neten aniem'o m'a apqueltacja quetlhencap. 2 Jata apquelpasmo ta enenlhet metca nac apquelletsecama, metlhenama nque' apcacnecjelha nac judios cacpota njan apqueliecai'acja na mota enenlhet apqueleltemo ncolhec allanenca, ca aptaianquelha nac ma'a janet napaqta'a nac, apqueleltemo mota ncolhec allamelanca cacpota njan etlhewancoc nema allamelaicama la'a, apqueluetacjec coca m'a, coca metlhoquiec jata aquianmoma aniem'o m'a Engiapom Neten. 3 Coca apquelpasmo ta quetlhencap metca apquelletsecama nac, meleltennasama nquec enenlhet, 4 elielhacpota. Engiapom Neten coca apiawec ma'a, ellancoc jata lhema caselha aquiaqmecja' quetlhencap ma'a—lhna aptemac Jesus ma'a
Apquetlhecmoscama Jesus actemacja nempacmetquescama Engiapom Neten
5 —Jata apquelpacmetcaso ta Engiapom Neten, metnamo nquec napaqtawec enenlhet, ca aptaianquelha nac ma'a janet napaqta'a, apquellacnacje mota neten, apquelpacmetcaso Engiapom Neten aquieto apcacnecjelha na mota judios cacpota njan apqueliecai'acja nac enenlhet, apqueleltemo ncolhec eluetacpoc ma'a. Apqueluetacjec coca enenlhet'awoc ma'a, coca metlhoquiec jata aquianmoma aniem'o m'a Engiapom Neten. 6 Jato ca apquelpacmetcaso ta Engiapom Neten quetlhencap, elentalhnenwacja ta conne apcacjaianquelha, ellapecja ta njan atong cacpota mancolhec allanenca quetlhencap ma'a, Engiapom Neten coca apiawec ma'a, ellancoc jata njan aquiaqmecja m'a. 7 Jata apquelpacmetcaso ta Engiapom Neten quetlhencap, metlhamasamo nquec apaioma, ca aptaianquelha nac meliamo nac Engiapom Neten, apquellanenquec ma'a apquetlhamascama nac apquelpacmeiasma cacpota engiailho' Engiapom Neten ma'a. 8 Mancaimelhcac etnancoc quetlhencap ma'a, amanie apquenmajai'a la elpacmetquesec Engiapom Neten, apiawec alaimelhquelha la quetlhencap m'a. 9 Jata etnancoc apquelpacmetcaso ta Engiapom Neten jenque'e: Engiapom Neten, nengeltawe eliojo' aplhamacjo enenlhet'awoc wanlha apuesque apanquec lheiap. 10 !Elheng, etne ta apiau'acja apuesque engancoc lheiap! Lhamacjo alloma nac nalhepop, ncolleliejecjo ta mota'a, ca actemacja nac alloma nac neten alleliejecjo nac m'a. 11 Jengellamoc jata nentoma aimelhquelha acnem anac. 12 Emasques jata lhamacjo nellanai'a caselha ncolatsecama, jengenmecjo ta mocjom tacja, ca acto nac ennenco'o nengenmacjawe lhta tacja mocjom apquellelto lhta jengellanesquescama ncolatsecama. 13 Jengellaso ta necsa acuai'a jengeliepconma, jengellaso ta njan acuo'o la ncolatsecama— 14 Ca apquenmacjo la tacja po'oc mocjom apquellelto lhta apquelanesquescama ncolatsecama, Engiapom Neten jata njan enmecjoc tacja quetlhencap ma'a. 15 Coca menmacjo la tacja po'oc, Engiapom Neten jata njan menmecjec tacja quetlhencap ma'a—
Apquetlhecmoscama Jesus actemacja nengaqjasquesammalhca mec
16 —Jata apquellaqjasquesacpo ta mec 1 quetlhencap, metnamo nquec malha almaiosac'a napaqta'a napaqtawec enenlhet, ca aptaiancolha nac enenlhet janet napaqta'a, wanlha apquelleltemo ncolhec aluet'o apquellaqjasquesacpo la mec. Apqueluetacjec coca m'a, coca metlhoquiec jata aquianmoma aniem'o m'a Engiapom Neten. 17 Coca apquellaqjasquesacpo la mec quetlhencap, eljatsosamoc jata napaqta'a, elalhnasap jata cacpota eltacmelecjojo 18 cacpota meliecpelquec enenlhet actemacja apquellaqjasquesammap mec quetlhencap. Coca apiawec Engiapom Neten, ellancoc jata aquiacmecja m'a—
Caselha acto jawe ngiapac anque acmennawe aquieto m'a neten
19 —Melhamasamo nquec caselha apanco'oc acmennawe quetlhencap necsa apquelloma mocjom jenque'e nalhepop anac, ascoc weneng jata nconactewacsec, ncolhec na anmenielho m'a. 20 Coca ntasec ma'a neten eliecasacpoc caselha acmennawe apanco'oc, mancotnec jata apawoc ma'a, manconactewacsec jata weneng ma'a, mancolhec na anmenielho m'a. 21 Ca aquietno la caselha acmennawe apanco'oc quetlhencap nalhepop anac, nietnec na apualho'oc jenque'e, coca aquietno la caselha acmennawe apanco'oc neten, nietnec na apualho'oc ma'a—
Engaqto'oc atsasquescama lhma nengiocja'
22 —Apaqto'oc acto atsascama lhma apqueliocja nac quetlhencap, nqueltasec jata nquec apaqto'oc anac, lhamacjo apqueliocja njan allaponmatema. 23 Mang jata nque ncollatsema apaqto'oc anac, nietnec na ienactesalhma apqueliocja nac. Apquellano la quetlhencap ncoietnac atsai'o lhma apqueliocja nac, coca ncoietna ienactesalhma, ncoiawancoc jata njan aquiawai'a ienactescama lhma' m'a—
Manmopuana antec apcanet apuesque enganco'oc
24 —Mancollapuanquec etnancoc apcanet apuesque apanco'oc, ncanec wanlha ta eltacnewac lhema, po'oc jato ca ellamelemma, wanlha ta ellasecjoc lhema, mellasecjec jata po'oc lhec. Mancollapuanquec na etnancoc apuesque apanco'oc Engiapom Neten cacpota njan pataccom 2 —
Metca actaicama enwalhoc, Engiapom Neten jata jengellancoc aimelhquelha la'a
25 —Moltama nquec apualho'oc selha etawancoc, se lha einancoc que' cacpota njan se lha elentalhnecjac ietamopai'a ie', ncanec apqueltema nac apjalhnanco'oc acto neten anquec aquiaspommalhca, manco lhnoc nentoma nac. Ca apqueliocja nac neten anquec aquiaspommalhca, mancolhnoc ma'a apquelentalhnema nac. 26 Ellanjo no anata tco'oc allempaicama mota'a, mamma acnaclhecamoc aquielhna annaicamoc la'a, mamma njan acnencanuecjelha la aquielhna nco'oc, Engiapom Neten coca apquellaianque mota actecamoc ma'a. Tep anquec jatoca ellancoc caselha Engiapom Neten quetlhencap, ncanec tep anquec apquellelto apqueliaspommap, metlhoc anata atco'oc anac. 27 Acjemo ncoltama apualho'oc ncanec mancawanque ncowenque pancoc tep atquetsec anque apqueliaijecama. 28 Moltama apualho'oc se lha ellentalhnecjac ietamopai'a ie', ellanjo no elhnemoc alanmo nac iocjalhma, mamma anmacmecama la'a cacpota ncotengiancoc alentalhnema ietamopai'a, 29 coca nqueltasec elhnemoc malha alentalhnema la ietamopai'a, meltetesammacpoc apiau'acja apuesque Salomon, nquescama lhta niecje altacmanma apquetsecamaja. 30 Engiapom neten apquellaicamoc altacmanma m'a elhnemoc anac malha alentalhnema ietamopai'a, wanlha coca aquiacuatacjo alenteiapma m'a, tep anquec jatoca ellancoc apquellentalhnema ietamopai'a quetlhengcap ma'a. ¡Malha niecje mancoietnema la meliasqueiam Engiapom Neten quetlhencap! 31 Ca stac asquellano mocjom quetlhencap, moltama nquec apualho'oc selha etawancoc que, cacpota njan einancoc, apquelentalhnema njan. 32 Ca apqueltemacja nac meliecpelquemo nac Engiapom Neten, nqueltama mota apualho'oc caselha aimommalhca. Coca quetlhencap apnec Apqueliapom ma'a neten, apiawec caselha aimommalhca m'a. 33 Ntasec coca etnancoc apuesque apanco'oc ma'a Engiapom Neten, etnancoc na apquelpeiwomo, elleliejecjo najan, cacpota Engiapom Neten ellancoc lhamacjo caselha nac alaimommalhca quetlhencap. 34 Moltama nquec apualho'oc acmac'acja ta ncotnec sosecja', nietnec lhamacjo acnem nenwetai'a aquientalhnema— lhna aptemac Jesus ma'a
1Poner nota de pie
2Mamon