¹ Quetlhencap elialheng'a, meliasqueiam Jesucristo apuesque engancoc acnema apmopuana, ca ncanec mancolatsema aptanco la melhnescamo mo'oc apquellanei'o po'oc. ^{2 3} Malha acto nac ma'a apcacnecjelha la quetlhencap apuo'o la acnema apquetsecama enenlhet, aquietnema la nengatquescama engapjec alienmomo oro, cacpota njan apquetsecama apqueltacmanma apanque apmennawe njan, eltacmelcasoc apquenmaicamoc tacja quetlhencap ma'a, ca etnancoc ellanac jeng: "Elhna ta nque'e actacmelacja nac nentanema" Netamen apuo'o la njan enenlhet metca nac apquetsecama, apjapawoc na apquelentalhnema, ca etnancoc na ellanac jeng: "Etnenwacjo m'a mocje nac, nlho ca la njan elhnacja m'a nalhepop anac" ⁴ Coca mancolatsema etnancoc quetlhencap ma'a, coca acuesai'a mannescamo mo'oc nelanei'o emmo'oc ma'a, malha aptaianquelha nac jengiecpelquemo ngiapma'ac ncolatsecama nac atlhenaicama apualho'oc. ⁵ Eltacmelcaso no apquellailhemo elialheng'a asquellamelaiam, apqueliequiesquec Engiapom Neten enenlhet'awoc anac metca apquelletsecama cacpota ncoitec aquiawai'a meliasqueiam, etnancoc na apquennemolhema aptemacja lhnac nanec apenescamo aplheianma ellancoc jata m'a apquellelto la apquellamelaiam ma'a. ⁶ Quetlhencap coca apqueltemesquesantec coneng ma'a enenlhet'awoc anac metca apquelletsecama. ¿Jawe nlho nema apquetsecama nac apquellaiancoc aquientalhnema apquenmacmecama, quetsec coca apquelianmonquescama m'a, je? ¿Jawe nlho njan nema apquetsecama nac eliengiosocja quetlhencap napaqtawec apquelientalhnemo nac, je? ⁷ ¿Jawe nlho njan nema apquetsecama nac apqueltacnoncoma mota apuesai'a Apuesquel ¹ apanco'oc quetlhencap, je? ⁸ Ntasec apquelleliajacjo la'a quetlhencap jenganemacja acto neten anque aquiaspommalhca aquietno nac ma'a waccajac Engiapom Neten apaioma, ca ntemac jenque'e: «Engiamelemma po'oc ca cto nac apcamelammacpo panque' nac lheiapm» ^{2 9} Coca mancolatsecama melneso la mo'oc apquellanei'o po'oc quetlhencap, ncolhenec jata njan jenganemacja apquellelto quetlhencap apquetselhnanemmap aniem'o apqueliecai'a aclheianma m'a. ¹⁰ Apno la enenlhet apqueliejecjo jenganemacja atlhenquescama njan esaujojo', wanlha coca lhema alcama nquec jenganemacja meliejecjo, jenganemacja ta njan ncolhenec ma'a apto apselhnanemmap aniem'o apiecai'a m'a aclheianma. ¹¹ Ca aptemac na Engiapom Neten jenque'e: «Menaqtewaso apnacteianca'a» Ca aptemac mocjom ma'a: «Mellaqja po'oc» Lhema enenlhet metuascamo la aptawa', apcaqjac coca po'oc, apieca'ac na jenganemacja m'a. ¹² Ca ncanec ntasec ellanco mota actacmanma apaioma po'oc quetlhencap, canjan eltacmelcasacpojo ncanec ncolhec jata aliecpelcoc quetlhencap ma'a aniem'o jenganemacja acmowana jengelpaqnencasecja mangeliamolhma. ¹³ Enenlhet la meietnai'o napa'at po'oc, mancolhec jata njan aquietno napa'at ma'a, coca apietno la napa'at po'oc, eiepjomwomjoc jata njan ma'a acuo'o la acnem nema aquiecpelquemelha.