¹ Asquetlhecmosquec co'o alhnacjo actemacja apquetsepma' Jesucristo neten iamet actennescama cacpota antancocjac nengelpeiwomo napaqtec Engiapom Neten, coca quetlhengcap apqueluatesaianquec ania'a actacmanma nac. Malha apiolhma meijamolhma ntemac apnaqtewascama apqatco'oc anac quetlhengcap co Galacia, mamma apqatco'oc! ² ¡Cotlheianwacjo no apualho'oc quetlhengcap! Apquetlhewaianque lhta Engiapom Neten Apualhoc aniem'o m'a meliasqueiam Jesucristo, jawe aniem'o apquellasecjai'o jenganemacja nac Moises. ³ Necsa aptaicamoc alhta Jesucristo apquennemolhema quetlhengcap ma'a, Engiapom neten Apualhoc alhta anmaicama, colhua coca apquelleltawec eliawencasancoc niecje mocjom tep anquec aptaicamoc apquelpeiwomo aniem'o apquelieplauquescama jenganemacaja Moises. ¡Metnamongquec ma'a, mamma apqatco'oc quetlhengcap! ⁴ Malha nac acjemo ntemac apquelluetai'a lhta caselha altacmelo quetlhengcap ma'a, coca jawe acjemo m'a. ⁵ Apquellaianque lhta Apualhoc apanque' Engiapom Neten ma'a, apquelanai'ac na jempelapquescama apiesecsec quetlhengcap ncanec ma lhta eliasqueiacmoc Cristo m'a, jawe aniem'o jenganemacja nac Moises. ⁶ Abraham man nac nanec eiasqueiacmoc Engiapom Neten ma'a, ca ncanec Engiapom Neten aptemesquescamo apeiwomo. ⁷ Ca ctonac ma'a, lhamacjo enenlhet'awoc meliasqueiam anac Engiapom Neten, coca m'a apquelelto jawe ngiapac anque Abraham aptawana'ac neptamen ma'a. ⁸ Alhnacjo ngquec aclheianma jenganemacja lhennenga, enenlhet'awoc metno judios meiascacmo la Jesus, ngolhec jata altemescaso apquelpeiwomo. Lhnac na nec aptemac Engiapom Neten apcanemo Abraham: «Lheiap jata ngcompac allenteiapma altacmanma caselha alhma nquec apquellawacja enenlhet'awoc» ^{1 9} Ca ctonac ma'a, enenlhet apquellelto nac meliasqueiam Engiapom Neten, etlhewancoc jata actacmanma aniem'o Engiapom Neten, ca actemo lhnac nanec Engiapom Neten apquelanei'o Abraham annenga, ¹⁰ coca enenlhet apquellelto la eluoncasacpoc tep aniem'o jenganemcacja Moises, etselhnanacpoc jata m'a. Ca ntac na actalhesammalhca jenganemacja lhennenga: «Enenlhet apquellelto la apqueiam lhema apquelieplauquescama jenganemacja Moises ² , ennaqtewasacpoc jata » ¹¹ Coca acto nac ma'a, mancawangquec jentemesquesec nempeiwomo jenganemacja nac, Jesucristo coca apuanque. Alhnacjo ngquec aclheianma jenganemacja lhennenga: «Ngcaimelhquec metca apqueliasqueiam Engiapom Neten cacpota eltec apquelpeiwomo, elloca ta acuancacjo m'a » ¹² Coca aclheianma jenganemacja Moises: «Enenlhet apquellelto apquelieplauquescama la jenganemacja, elloca ta acuancacjo ³ » lhna ntemac jenganemacja. Coca jenganemacja nac mangcawangquec jengellancoc aliennactema ennengio'oc, ncanec mangellapuanquec ansaujoc angellieplauquesec lhamacjo jenganemacja nac, ca ncanec angetselhnanalhca niecje m'a. ¹³ Cristo coca apata ngquec aquientalhnema nac cacpota jengeluonquesec tep ennenco'o necsa aquientalhnema jenganemacja nac Moises. Ca ntac na actalhesammalhca ania'a lhennenga: « Enenlhet apquetsepma nac neten iamet ⁴ , Engiapom neten aptewascama m'a ⁵ » ¹⁴ Ca actemo nac Jesus apquetsepmec neten iamet actennescama m'a cacpota ngcolluacjoc na metno judios aptemacja lhnac nanec apcanemo Engiapom Neten Abraham. Mang jata ngquec angeliascacmoc Jesucristo, angetlhewancoc jata Engiapom Neten Apualhoc aplheianmo lhnac nanec jengellangcoc. ¹⁵ Ketlhengkap elialheng'a, smak'ak aietkesek lhema kaselha aktemo nak nenieseksa ennengko'o. Apto la lhema enenlhet apkelanai'a vakkahak aktemakha apkelhpankesekha kaselha apanko'ok, netamen na etnek firma kakpota ngkolhek aiempek ma'a, netamen mankollapvankek na enmaskeksek ma'a kakpota nhan etalhesekhak mo'ok alqama la'a. ¹⁶ Lhnak nanek na aptemak Eniapom Neten ma'a apeneskamo aplheianma lhema apaivoma nkovak hata takhaplhet Abraham kanhan aptaven neptamen, have aplheianmo m'a aplhamakho aptavana'ak anak, vanlha lhema, lhna aptemak: «Lheiap aptavenq», lhna aptemak ma'a. ¹⁷ Koka m'a Cristo. Askeltavek ko'o eliohok ketlhengkap ley anak mankavankek nkomaskeksek aktemakha apaivoma apeneskamo aplheianma Eniapom Neten ellangkok kaselha Abraham. Amanie nkek nak akvaiam apaivoma apeneskamo aplheianma Eniapom Neten, netamen 430 anio lhna ngvaiakmok ma'a, akvai'o nhan ley, ka ngkanek ley anak mankavankek nkomaskeksek ma'a. ¹⁸ Ka kaselha apeneskamo lhnak nanek aplheianma hengellangkok hata Eniapom Neten have aniem'o m'a ley anak, koka nkeniemai'ak ma'a apaivoma apeneskamo aplheianma Eniapom Neten apkeltennaskamo m'a Abraham. ¹⁹ Malha niecje acjemo m'a jenganemacja nac, coca apquetlhewai'ac cacpota eluetac enenlhet ngcollatsecama apquellanecamoc apanco'oc apancawe', coca mmasquemac aquientalhnema m'a jenganemacja nac apuai'o m'a Abraham aptawen neptamen. Enenlhet neten lhnac nanec apquenmama tacja jenganemacja, netamen apquellanconwaiacmo Moises ma'a, ca Moises apquellanconwaiacmo enenlhet'awoc ma'a. ²⁰ Coca Engiapom Neten apcaiancosecja lhnac apaioma Abraham annenga, napaqtec anquec na aptemac ma'a, mamma lhnac apquennencasecama m'a. ²¹ Molhenac co'o jenganemacja nac ngcammelhec Engiapom Neten apqueltennascamo lhnac nanec Abraham annenga, molhenac ma'a, wanlha alheianmo jenganemacja mancawangquec jengangcoc aquiennactema enengiec, mangcawangquec na jentemesquesec nempeiwomo napaqtec Engiapom Neten. ²² Ca ntac na actalhesammalhca jenganemacja lhennenga, jengenmaicama mangeliamolhma nenlhamacjo nac, coca apenescamo lhnac nanec Engiapom neten apaioma cacpota jengelpaqnencasecjac necsa mongeliamolhma m'a, coca ngcaimelhquec amanie nquec mongeliascame Jesucristo. ²³ Jengenmaicama lhta jenganemacja nac acuacmo apuo'o Cristo, ^{24 25} malha jengellanecama actemacja necsa nellaniemjaicama m'a, acuacmo apuo'o Cristo, mongeliascacmoc na ennenco'o m'a, jengeltemesqueso njan negelpeiwomo m'a. Colhua mangcaimelhcac jengellanecama jenganemacja nac, ²⁶ ncanec mongeliascacmoc Jesucristo. Engiapom Neten apquetcac coca nentangcoc colhuawe nac. ²⁷ Apquellauquesacpe lhta quetlhengcap conne iemmen, apquelpasmacjec Cristo m'a, aptanquec aptemacja nac Cristo. ²⁸ Colhua coca nennacjec enmo'oc nenlhamacjo m'a napaqte Engiapom Neten, judios, metno judios, esclavos, metno esclavos, apquellennawa'ac, ngqueluana'ac, nenlhamacjo nennacjec enmo'oc ncanec nengeliepetcacjec Cristo Jesus. ²⁹ Cacpota njan Abraham apquennemolhema aptaiancoc quetlhengcap, etlhewancoc jata njan lhamacjo Engiapom Neten actemacja lhnac nanec apaioma apqueltennascamo engiancoc jata Abraham annenga.