¹ Co'o Pablo ascaclhencasemmalhquec aniem'o jeisennaicama Apuesque, asqueltawec eltacmelcasacpoc aquietemo ncoie ncanec Engiapom Neten alhta apqueliequiesaicamoc quetlhencap cacpota etnancoc apquennemolhema apancoie'. ² Etnamoc coca coneng apancawec quetlhencap, anmomjapac'a apualho'oc ellanjoc po'oc, metnamoc na nau'a apuajei'oc, ellamelemma ta njan po'oc apiesecsec anac quetlhencap. ³ Elloca ta njan metca acmasca, etlhenques jata apquelpasmommacpo aniem'o lhta Engiapom Neten Apualhoc altemesquescama ⁴ ca actemacja nac apquelpasmommacpo malha ntac ma'a lhema nac nengiocja, nnanquec na malha lhema Apualhoc anac ma'a, nnanquec na lhema aljalhnecama enwalhoc ncowac jata. ⁵ Apnec na lhema Apuesque, nietnec na malha lhema mongiasqueiam, lhema njan apquellauquesammap iemmen. ⁶ Apnec na wanlha lhema Engiapom Neten apto apqueliapom aplhamacjo enenlhet'awoc, apto njan apquemjama apmanie, apquellanai'a njan lhamacjo caselha apquellaianco njan enenlhet'awoc, aptaianco njan apquetlhelhma'a mota m'a. ⁷ Nelpasmecja nentancoc ennenco'o malha lhema neliocja ntacja, coca Cristo jengellanquec alpalhcammalhca nenmopuanca'a nenmacmecama moclhema ennenco'o, ⁸ ca ctemo nac aclheianma waccajac Engiapom Neten apaioma: «Apmeiecjec neten aplaqlecjec na enenlhet apquenmammap, apquellaianco njan apquenmopuanca'a enenlhet'awoc» ¹ ca nnena actemo m'a. ⁹ Jai, apmeiecjec neten coca amanie apuaiwentanie lhta nalhepop anac, ¹⁰ ca apto lhta apuaiwenta nalhepop anac, apto lhta njan apmeiecjo lhta netne cancoie, aptemo njan malha aplanenwecja lhma nquec jam. ¹¹ Ca enenlhet anac ma'a apquellaianco lhta njan apquenmopuanca'a moclhema apostoles, po'oc na apquelleltsecama ania'a, po'oc na apqueltennaicama ania'a actacmanma, po'oc na pastores cacpota njan jengetlhecmoscama. ¹² Enenlhet anac ma'a apquelpenesquescanque lhta njan Engiapom neten apquennemolhema cacpota etnancoc apquellasennaicama, eluanenquesquesec meliasqueiam apquennemolhema m'a, ntacjec malha apiocja la Cristo, ¹³ acuacmo acuo'o ta nelpasmommalhco nentaicamoc aniem'o mongeliasqueiam cacpota njan nelianweiacmo Jesucristo apto Engiapom Neten apquetca, acuacmo njan nentanco alienno engellualho'oc malha nenwaneiam la'a, malha njan Cristo la'a. ¹⁴ Ncomascoc ma'a nentangco malha nematca nac mangcolliennactema nac apualho'oc, colhuawec ncolhec aliennencaso apquellailho la nematlhecmoscama ncolatsecama, enenlhet anac apquenmopuanca'a jeniennengquesec. ¹⁵ Ennenco'o ta mota antancoc metca nenmopuana ania'a angellanjoc emmo'oc, angellamelemmac jata njan cacpota ncowanamoc acuacmo nennacjo Cristo, apto malha apqatec. ¹⁶ Ennenco'o coca neliocja nac malha alpasmecja m'a aniem'o Cristo cacpota angellanancoc actacmanma nenmacmecama, ncowanamoc meliennactema njan nelpasmommalhco njan aniem'o nengamelaiam.

Eliaqmoncasecja mo'oc apualho'oc

¹⁷ Asmac'acja atnec allanac aniem'o Engiapom Neten apmopuana jeiaicamoc, ¡metnamo nquec quetlhencap aptaiancolha nac meliojo nac Engiapom Neten! Apquelieplaucasquec aptaianquelha apancawec acmowana nac manietec nentacja. ¹⁸ Malha alpaiseiam na alquetamecama apualho'oc ma'a, meliojoc na aptemacja Engiapom Neten aniem'o aliennactema apualho'oc. ¹⁹ Menmanquec na apquellanenco la ncolatsecama alenteiapma apualho'oc ma'a, metca apquenmanweiam apquellanenco la apquenmensanweiam alhma. ²⁰ Quetlhencap coca apqueliawec jawe apcanemacja antec Cristo m'a, ²¹ jawe ngiapac anquec na apquellengai'o apquetlhecmosecamoc ma'a, apquelianweiacmo njan apquelleliejecjo apquellaneianco caselha acpeiwomo. ²² Ca nqueniemai'ac na quetlhencap ntasec eliengiecjac ncolatsecma nac apquellanecamoc, eljatsosamoc coca lhennenga apualho'oc malha tawa pac la anie la acteiapma m'a aniem'o aliasponcomacja nac apualho'oc ellanancoc. ²³ Eliaqmoncasecja njan alhnanco'oc alquetamecama apualho'oc anac apcanemacja nac na Engiapom Neten etnancoc. ²⁴ Etlhatmecja coca alhnancoc apualho'oc apcanemacja nac etnancoc Engiapom Neten, caselha nac acpeiwomo, caselha njan altacmelo cacpota njan acto iocjalhmec anquec. ²⁵ Ca apquelpasmecja nac quetlhencap malha lhema apqueliocja ntacjac ma'a, ca nqueniemai'ac na metnanquec apquenmopuanca'a ania'a apiesecsec anac quetlhencap, etnamoc jatoca njan iocjalhmec anquec apqueltheianma. ²⁶ Apquellawo la njan quetlhencap, melliawencaso ncoie, metca acuaiacmo mo'oc acnem la'a, enmasques jata colhuawoie ²⁷ cacpota mancoujec queliacjameioc ncoliatancoc apualho'oc quetlhencap ma'a. ²⁸ Enenlhet apto apmenielhma la'a, eluates, etengiama coca apmacmecama cacpota ncoitec pataccom apancoc, cacpota epasmoc alaimelhquelha la'a enenlhet anac metca apquelletsecama. ²⁹ Melpaqmet ncollatsecama la'a apquelpameiasma, ntasec coca elpaqmetama altacmanma cacpota ncoltacmelquesec apquellaniemjaicama po'oc, ncollianwesquescamjoc najan. ³⁰ Meltemesques na acmaiose apualhoc Engiapom Neten anac Apualhoc, malha mongenatquescama la apiempeioc apqueltemesquescamo lhta Engiapom Neten quetlhencap cacpota eliecpelcoc apquellelto apquennemolhema apanco ie' acuo'o ta acnem jata njan ncosaujalhcoc apqueluoncasemmap tep ma'a. ³¹ Eliengiecja anmaiosac'a apualho'oc cacpota njan eluatesamoc annatjesaicama, mellelpalhemamaja', melliematquesama njan po'oc, eliengiecja njan lhamacjo actemacja ncolatsecama. ³² Ellanamoc coca altacmelo caselha, elietnajo napaqta'a po'oc, enmecjo mocjom tacja njan po'oc ca aptemacja lhta Engiapom Neten apquenmecjo lhta mocjom tacja quetlhencap aniem'o Cristo.