¹ Co'o Pablo, asto apostol jeiapascama Jesucristo cacpota alhenec ania'a actacmanma nac aniem'o aptema Engiapom Neten, Timoteo njan alhelhma jenque'e. ² Nengelleltawec angellapasquesec atlheianma engellualho'oc aplhamacjo apquellelto Jesucristo apquennemolhema aquieto jam Colosas, engelialheng'a jengellasecjai'o aniem'o Cristo. Nengelleltawec na Engiapom Neten eiengientac tacjaplhet'oc nengamelaiam cacpota njan metca actaicama enwalhoc anac. ³ Necsa nelelmalhnesquesquescama mota Engiapom Neten apto njan apiapom apuesque engancoc Jesucristo nentanquec na gracias ⁴ ncanec nelleng'a mota ania'a acnaicamoc aquiawai'a lhnac meliasqueiam quetlhencap Cristo Jesús, awanjec nac na apquellamelaiam apquellelto apquennemolhema apancoc anac ma'a. ⁵ Nnaianquec nac na apqueluascap ma'a aniem'o aleljalhnecama apualho'oc etlhewancoc jata lhema caselha nema alpocquenquescama m'a neten, apquelengai'a lhta quetlhencap aclhenammalhca ania'a nac ⁶ acuai'o secja lhta. Ca ania'a nac mpaijacjec aclengammalhca jalhmanquec jam, aliaqmoncasquesecjo njan mo'oc apualho'oc enenlhet'awoc apquellelto la apquellengai'a, ca actaianco lhta njan quetlhencap ma'a aliaqmoncasquesecjo mo'oc apualho'oc necsa apquenmaicamo lhta tacja aquiawai'a nac jengamelaiam Engiapom Neten, cacpota njan acto jawe ngiapac anac. ⁷ Epafras alhta apto apquetlhecmoscama quetlhencap caselha nac ma'a, apto njan netlhelhma'ac ennenco'o m'a, apto apquennencasema apcasecjai'o Cristo apmacmecama nac apiesecsec quetlhencap jam. ⁸ Jengelletsantenquescamo lhta njan ania'a actemacja apquellaniemjaicama quetlhencap jam, awanjec na lhta njan apquellamelaiam po'oc quetlhencap aniem'o Apualhoc anac najan. ⁹ Necsa nellengai'a lhta ania'a actemacja apquellaniemjaicama quetlhencap jam, lhta nquenoc nelelmalhnesquescama mota metca nnelha Engiapom Neten eltemesquesec apqueliecpelcanweiacmo quiocjo nquec aptemacja m'a, ellancoc na lhamacjo actemacja nema nengiamo cacpota njan nengiecpelquemo aniem'o Apualhoc apanque. ¹⁰ Netamen jata m'a ncowac aquietemo nquec aptaiancolha apcanemacja njan etnancoc Apuesque, cacpota njan ellanancoc metca nnelha caselha acleclemelha la apualhoc ma'a, nquescama caselha altacmelo, acuacmo acuanemo lhamacjo acnem apqueliecpelcanweiam Engiapom Neten. ¹¹ Nelelmalhnescasquec na Engiapom Neten etnesquesancoc apqueliennactema aniem'o aquiawai'a apmopuana m'a, cacpota ellapuanac eluascapoc metca apquelpecjescama acuo'o la aquientalhnema. Netamen jata m'a ncolpaijecjac jata apualho'oc ma'a, ¹² etnancoc jata njan gracias Engiapom Neten ncanec apquellanquec apquenmopuanca'a eluascapoc, jata etlhewancoc na caselha apenescamo Engiapom Neten cacpota ellancoc apquennemolhema apanco'oc apquellelto nac apquelloma atsac'elha lhma. ¹³ Jai, Engiapom Neten jengeljatsosquecjec ma'a necsa acmowana lhta ienactesacja lhma, jengeltemesquescamo lhta njan apquennemolhema tecjenlhet'oc apuesque apquetca apcamelaiam, ¹⁴ apto lhta njan jengeluonquescama tep, apquenmasquescamo njan mongeliamolhma m'a. ¹⁵ Engiapom Neten apto monwetai'a, coca apua'a alhta Cristo apnemo lhtoca njan ma'a, apnenquec nac nanec apnacja m'a amanie apquelentepquescama lhamacjo caselha lhmanquec jam. ¹⁶ Apmaianca lhnac nanec na Engiapom Neten Cristo cacpota ellanac lhamacjo caselha acnaicamo nac ma'a neten cacpota njan nalhepop, caselha neluetai'o nac cacpota njan mangeluetai'o nac, caselha au'alho'oc anac awesque nco'oc, acnema na alientalhnemo cacpota njan acnema nac anmowanca'a, ca lhamacjo caselha nac Engiapom Neten apquellanai'a aniem'o apmaicama Cristo, aptemo njan apanco'oc ma'a. ¹⁷ Apnenquec nac nanec Cristo amanie' allanemmalhco secjec anquec lhamacjo caselha, mancollawanquec na ncolloca metca m'a Cristo. ¹⁸ Cristo njan apto malha apqatec apquennemolhema, coca ntaiejec malha apiocja m'a. Cristo apto apmanie', apto njan apmanie aplhatecjanweiam apiesecsec apquenmasquenwaiacmo, aptemo nja mota apmanie panquec ma'a. ¹⁹ Nietnenque lhta njan apualhoc ma'a Cristo lhamacjo apmopuana m'a aniem'o Engiapom Neten, ²⁰ apquenmecjo lhta njan mocjom tacja enenlhet'awoc lhmanquec jam, apsoiacmawe lhta njan metca acmasca nac aniem'o apquetsepma lhta Cristo aquianquenammalhco ema apancoc neten iamet actennescama. ²¹ Apquellammelhme lhta quetlhencap Engiapom Neten lhennenga, meliamolhma lhta nqueniemai'ac ma'a, ²² coca colhuawe nac apuanca'ac eltetescacjac Engiapom Neten aniem'o m'a Cristo aptaiecjo lhta njan enenlhet apanque, apquetsepmo lhta njan neten iamet actennescama aniem'o quetlhencap, colhua apuanca'ac eluacjac napactec Engiapom Neten metca meliamolhma la'a, metca alpaieseiam apualho'oc, metca apquetselhnanemmap najan. ²³ Ntasec eliennactecsec meliasqueiam anac, metca apqueliengiecja m'a aljalhnecama apualho'oc eluoncasacpoc tep aniem'o Engiapom Neten, ca ctemo lhta njan apquellengai'a ania'a actacmanma aclhenammalhco lhmanquec jam, co'o njan aspaiesquec ma'a ania'a nac aniem'o lhta jeiapascama Engiapom Neten. ²⁴ Mpaijacjec co ewalhoc aslenganco acmasca aniem'o jellasennaicama quetlhencap, ncanec asaujoc jata actemacja lhta aplengaianco Cristo aniem'o apquennemolhema, ncanec malha Cristo apiocja ntac ma'a apquennemolhema nac. ²⁵ Jetnescasquec Engiapom Neten jellasennaicama apquennemolhema apanque nac, jeianquec asmacmecama cacpota altacmelquesquesec apquellaniemjaicama aniem'o njan aspaiescama ania'a actacmanma, ²⁶ actemo lhta njan malha acposemmalhca lhennenga la aquietnema, colhua coca Engiapom Neten apqueluetascasquec apquennemolhema. ²⁷ Jai, apmajai'o lhta njan eluetasquesec caselha aquielhammalhca aquiawai'a nquec apenescamo lhnac nanec apmac'acja ta etnec cacpota eltacmelquesquesec apquellaniemjaicama aplhamacjo apquellawacja lhmanquec jam, Cristo apuesai'a m'a, apmajai'a lhta Engiapacsec Engiapom Neten jenque'e, apsoiacmo lhta njan aleljalhnecama nac apualho'oc etlhewancoc jata caselha altaqmanma nquec ma'a. ²⁸ Ennenco'o nelpaiesquec ania'a aplhenammap Cristo, nelleltennasenque mota aquieplomo aquiawai'a nquec nelianweiacmo, nennawesquec na enenlhet'awoc mellaniec acmasoma cacpota etnancoc apquelpeiwomo apcanemacja njan etnancoc Cristo. ²⁹ Awanjec asmacmecama asqueltemo ncotnec ma'a, aquieplomo asiennactema, asmopuana njan aniem'o Cristo.