Capítulo 27
Nema aquiantemecja Pablo aquieto natemma apiawai'a Roma
1
Pablo cacpota njan aptemo lhemec aplhatmommap nemo lhta aliantemecjo apquetlhewanweiacmo apuesque apanque' quempocjacme apuesai'a Julio cacpota eliantemecjac aquieto natemma Italia, Julio lhtoca apto apmacmesaicama apuesque Augusto Cesar.
2
Co'o cacpota njan Aristarco apqueniem'o Tesalonica aquieto conne iocjalhma Macedonia, netlhelhma'ac alhta njan Pablo m'a. Jengeliantemacje lhta aquieto aquiecnecjelha lomma nemmen acuesai'a Adramitio, nietne lhta m'a lhema loma nemmen aquiawai'a, mmac'a lhta ngcotiepoc mocjom cacpota ngconiacjac ngcoljaiwocja aquieto conne iocjalhma Asia, ca nelcananto m'a.
3
Mo'oc acnem alhta ntac neluacmo na temma Sidon, coca apuesque Julio ntase lhta apquelanei'o Pablo m'a, apquellancawe lhta enenlhet apquelto apqueliecpelquemelha aptanco amaica'a, apquelletsacjeso njan aptoma Pablo m'a.
4
Nempocjo mocjom netlhengama nemmen, ncamelhque lhta loma nemmen nelcanantema alhcaiam aquiennactema, ca neltetescacjo necja iemmen aquieto aquiaquienweiam lhepop Chipre cacpota angetlhong ma'a metca aquientalhnema.
5
Netamen netlhengo mocjom neiawa' iemmen neliecangco iocjalhma' Cilicia cacpota njan Panfilia, nelwacjo iocjalhma Mira, aquieto conne' Licia.
6
Coca m'a apuet'o apuesque Julio lhema loma nemmen aquiawai'a ampo'o iocjalhma Alejandria acmeiecja Italia, ca apquelto angelcantuomoc ma'a 'cacpota angetlhong mocjom.
7
8
Netlhengo metca acpecjai'a aclhamacjo acnem ma'a, alhcaiam alhta asonque'. Necsa aquientalhnema lhta netlhengama m'a neliecanwacmo apcammelhacja natemma Cnido, netlhengo mocjom nelammelho lhta alhcaiam ma'a, ca nelieco'o natemma Salmona, ca nelieco'o quetsec tep neljalhtepelhqueto aquieto pieiam Creta, ca netamen ma'a awanje lhta netlhengama m'a, nelwacjo iocjalhma acuesai'a Buenos Puertos, nengaqte lhta natemma Lasea. Nquelpaijacje lhta engelualho'oc nelwacjo m'a
9
Aholhe lhta netlhengama, nellak'a lhta
angetlhong mokhom nemmen ma'a ngkanek nengaqte lhta ieiam apvalhok ma'a, koka apto lhta Pablo
10
hengke'e:
—Mangolatsama telha netlhengama, nkolentek hatelha loma nemmen anak, nkopallemmak na atsekama nemmen, angelletsepok hatelha nhan ennengko'o —
lhta aptak apkellano Pablo m'a.
11
Koka apto apankok loma nemmen kakpota nhan apkennengkasekama aplhengkeskama loma nemmen alhta, avanhe lhta apkeleltemo ellempekhok
mokhom apketlhengama m'a, lhta aptangkok:
—Mangkolatsema angaqhangkok hengke'e iokhalhma nak ngkanek nengaqtek ieiam apvalhok songke', ntasek angetlhong mokhom ma'a akvakmo m'a aknangkongvekhelha loma nemmen Fenice akieto iokhalhma Creta, nenganmelhmo m'a sudoeste kanhan noroeste, ka ntasek angaqhengvakhak ma'a
apvalhok apieiam la'a —lhta aptangkok ma'a.
12
Nlecawe lhta apualhoc apuesque quempocjacme cacpota njan aplhamacjo actacja aplheianma otep loma nemmen.
13
Ca apquelhcacmo apquetquetsec pieiam, ca atlheno lhta apualho'oc ntasec anquec anlhong mocjom, ca netlheng'o neiawa nquec aluata, aniem'o nengai'a.
14
Quetsec mocjom enmanie actepo alhcaiam aquiennactema aisecsec aniem'o tep acnem nelhqueija, ma lhta ngcasac actenwo'o alhcaiam iemmen loma nemmen,
15
ma lhta angellapuanac angellammelhec alhcaiam aquiennactema m'a, lheme nellancawec jengelliengenco alhcaiam aquiennactema,
16
ca nellieco'o tep natemma lhepop aquiaqienweiam acuesai'a Cauda, ca acmanwo'o quetsec alhcaiam, ca nellacjetangco nelcanantacjo loma memmen atco'oc nenguaiam tep ancoc, nientelhe lhta nenmacmecama m'a.
17
Netamen ma'a apquellacjetancoc apnactetenco nalhet loma nemmen aquiawai'a cacpota mangcotuacsec alhcaiam ma'a. Apquellac'a lhta njan ngcasepuomoc lhepop
acjescaiam iemmen ma'a, ca apqueleiwesacjo njan carpa apaijema apiawai'a apielhnema neten tacjalhet loma nemmen, cacpota ngcoijengecjojo alhcaiam aquietelha metquelha lhepop acjescaiam.
18
Ca acto mo'oc acnem niawengque lhta alhcaiam iemmen ma'a, ca apquellentepcaso apquelhantamo nemmen alpatama loma nemmen cacpota mangcowaiwanquec
19
Netamen janetolhema acnem alhta ntac aquiecai'a m'a, apquelieniawo njan tama' aliawai'a anco'oc anmaicama loma nemmen.
20
Lhamacme lhta acnem nellaniemjaicama aluata' nelcanantaicama loma nemmen, mongelwetai'ac acnem, apiau'a njan, aniem'o alhcaiam iemmen aquiennactema, mmasque lhta neliojo, angeluomoc jatelha tep.
21
Ma lhta njan antaweicocjac ma'a, ca apto Pablo apquellano aplhamacjo:
— Ncaimelhque lhta jellasecjoc quetlhencap asmac'o lhta angacjancoc secjec ma'a Creta, mancolhec lhec actacja' loma nemmen cacpota njan ennenco'o m'a.
22
Coca moltama nquec apquelualhoc quetlhencap, asiawec co'o mancolhec jata actacja', loma nemmen jatoca ncotwacsec alhcaiam.
23
Pelhasep lhec apiepjonwo'o lhema enenlhet neten apcapascama Engiapom Neten apto co'o ascasennaicama, lhquec aptac jeiano:
24
"Menia ncoie' Pablo, Engiapom Neten jata ewonquesec tep lheiap cacpota njan apquetlhelhma'ac aniem'o lheiap, netamen emjancoc jata napaqtec apnacja apuesque Romano lheiap"
25
Lhque ptac jeiano enenlhet neten, moi'ascacmoc na co'o m'a, jata ncotnec ma'a, moltama nquec apualho'oc,
26
wanlha loma nemmen jatoca ncasepwomoc neiawa' aluata' — lhta ptac Pablo m'a.
27
14 acnem alhta nwaiacmoc neliaijecama nemmen aquiawai'a acuesai'a Adriatico, jengeliaseiangque lhta lhma lhcaiam aquiennactema m'a, netamen malha la12 pelhasep alhta ntajac, apquellelto apquetlhenquescama loma nemmen apqueluet'o lhta neiawa' lhepop nengaqte',
28
ca apquelieniantamo tama nemmen apquelietquesanco acuanlha apmaptonne iemmen, 36 alietquesammalhca lhta m'a acmaptonne iemmen ma'a, ca netlhengo quetsec mocjom aquieto neiawa', ca nelietqueso mocjom, nelwet'o 27 alietquesammalhca' acmaptonne iemmen ma'a.
29
Ca apquellieniewo nemmen tawapoc acnactetemmalhca'a aquieto ataqla' loma nemmen cacpota ncomangwomoc ma'a, ncanec mangcolatsema ncotiengwomoc metaimong aquietelha neiawa'. Neltawe lhta niecje' ncotsac ma'a.
30
Coca apquellelto apquenmacmecama conne loma nemmen apquenmac'a lhta enieniancoc ma'a, ca apquellentepcaso niejec loma nemmen atcoc nengwaiam tep ancoc anac, apquetlheno eliengio'oc niecje' nemmen tawapoc acnactetemmalhca' aquieto awajec loma nemmen, apquenmopuana ania'a lhtoca, apquenmajai'a enieniancoc coca niecje'.
31
Apuetanque lhta Pablo m'a apquenmac'acja etnancoc niecje, lhta ptac Pablo apquellano quempocjacme cacpota njan apuesque apanco'oc ma'a:
— Ca apquengianco la apquenmacmecama nac loma nemmen, melwomec tep quetlhengcap—
32
Coca apqueliaqtemenanque lhta quempocjacme tama' m'a acnactetemmalhca loma nemmen atcoc, ca acteiacmo nemmen ma'a.
33
34
Ncama lhta atsai'a m'a, lhta ptac Pablo apquellano:
— 14 acnem antac metaweicocja' aniem'o altaicama apualho'oc, etawamoc aptecamoc colhuawe nac cacpota eliennecja', moltama nquec apualho'oc, mangcolhec jata actacja'—
35
Ca apmamo Pablo pan ca apto gracias Engiapom Neten ma'a, ca aptawenco.
36
Apqueluanqueso aplhamacja, ca aptawenco njan,
37
276 enenlhet'awoc alhta m'a conne loma nemmen.
38
Ca apquelpeneso aptaweicocja, ca apquelieniawo nemmen alena pactec cacpota ngcolhiewecjac acpatama loma nemmen ma'a.
39
Ca atsac'o lhma, apquellelto apquenmacmecamaja apqueluetai'o lhepop, moca eliamoc aquietelha iocjalhma m'a, ca apquenmac'o eltetescamoc neiawa' iemmen, ma lhta ngcolapuanac ncanec tawapac alhta acmaicamoc ma'a,
40
ca apqueliaqtemenanco tama', ca apqueljalhiewasacjo aclhengamacja loma nemmen ma'a, ca apquelielhnesacjo neten carpa apaijema aquieto amanie loma nemmen. Ca aclhengo loma nemmen actetescacmo neiawa' iemmen,
41
coca aquieto awajec loma nemmen ngcasepuacme lhta lhepop actec acjescaiam iemmen, ma lhta ngcawanac ngcolhong ma'a, aquieto taqla lhtoca ngquelentac loma nemmen, ncanec iemmen alacjaiam aluata' ngquelluapocjaicama m'a.
42
Coca quempocjacme apquenmajai'a niecje ennapoc apquellelto apquenmammap cacpota menieniangquec enmancoc nemmen ma'a,
43
coca apuesque quempocjacme ma lhta eltoc ngcolhec annapo m'a, ncanec apqueltawe lhta ewonquesec tep Pablo. Ca apquelto ennelhtong nemmen apmaniaie apquenmopuanca'a la'a enmancoc iemmen, cacpota enmancoc aquiemac'acja lhma neiawa' iemmen,
44
coca mangconmapuangca la'a enmancoc iemmen, elmata iamet acpaijema. Netamen aplhamacjo lhta apqueluacmo neiawa', ntase' lhta apqueluaiam neiawa' m'a.