¹ Asqueltawec co etnec lheiap napaqtec Engiapom Neten canjan Cristo Jesús apto ta njan apuecta cacpota etnec apuesque, eliecpelcoc jata njan apquellelto nac apjalhnanco'oc cacpota njan apquenmasquenwaiacmo, ² asqueltawec na co'o epaiacsec ania'a actacmanma metca apqueluatescaiam lheiap ma'a, niecje apuetai'a ncolatsecama, actacmanma, njeclhec jato ca etnec aplhenquescama m'a. Etnesques jata njan malha apquelianwesquesquecjo meliamolhma m'a, ennawes jata njan, elleliatecjo ta njan etlhecmosancoc metca apquelpecjescama lheiap ma'a. ³ Ncanec ncowac jatelha acnem manconmajai'a ellailhoc jengetlhecmoscama acto jawe ngiapac anque, eliawencasancoc jatelha njan apquenmajai'acja la etengiancoc apanco'oc apancawec, eltengiancoc jata njan jengetlhecmoscama apquetlhecmosecamoc la'a aleclemelha la apualho'oc ellailhoc ma'a. ⁴ Apqapto'oc jata njan ellancocjac ania'a actacmanma nac acto jawe ngiapac anque, nconmajac jata njan ellailhoc ania'a nema altennaicama lhennenga. ⁵ Etne ta apmopuana emancoc apualhoc apuet'o la lhamacjo caselha ncolatsecama, ewascap jata njan necsa acuai'a aquientalhnema, etne ta mota aptema evangelista lheiap, elana ta mota njan actacmelo apcasennaicama Engiapom Neten. ⁶ Co'o coca quetsec ncaimelhcac asquetsepmacja, atnec jata ctonac malha nema acmescama nac Engiapom Neten nema aicamoc anac, ⁷ ncanec jeiasennaicama actacmanma nquec ma'a, astemenque mota njan malha ctonac soldado apmopwana la ennapacpoc, malha njan astemac ma'a apquelpaiwasemmap la'a apuaiam anac aquiensasemmalhca nac, moluatescacmoc na moi'asqueiam. ⁸ Asiawec co Apuesque apto apeiwomo jengiecpelquemo, jeiancoc jata malha lhema caselha astetema la epatec actacmanma nquec aniem'o asqueliejejo mota m'a, ncotnec jata m'a acmo'o ta ncowac acnem nengiecpelcammalhquelha, ellancoc jata njan ma'a aplhamacjo apquellelto nac mellescama eleljalhnama apuectanlha ta m'a. ⁹ Elienlhanmo ta apecjescamo elhiemoc jetnaienta la amaica'a lheiap jenque'e ¹⁰ ncanec Demas jeiengiacjeje', apmeiacje lhta ma'a aquieto Tesalónica aptengiai'a caselha meiasponcomacja nac Engiapom Neten. Crescente lhtoca apmeiacjac ma'a aquieto iocjalhma Galacia, Tito coca m'a iocjalhma Dalmacia, ¹¹ wanlha coca Lucas apnecjo jenque'e alhelhma. Asqueltawec na eliama lheiap Marcos jam eiantementac na jenque'e cacpota jepasenwatac asmacmecama nac. ¹² Tiquico lhtoca ascapasac ma'a aquieto Efeso. ¹³ Jata apquelhiacmo ta lheiap jenque'e jesantencaso ta astalhnema apmocjetma apuenactema lhta aspecquenecja aquieto Troade apnemacja m'a Carpo, jata njan waccajac ejenco'oc alhta, coca njan acto neten anquec ntasec esantac caselha aiempec aquiaqjapesammalhca actalhesammalhca. ¹⁴ Altennasama ta njan lhema ania'a lheiap, ca Alejandro lhta apto tawapac ngiapom apqueltecpoicama mancolatsecama jelanei'o m'a, Apuesque toca eiaqmoncasecjac aptemacja nac jelanei'o m'a. ¹⁵ Engiajo ta lheiap ma'a ncanec mantec apcammelhma nengetlhecmosecamoc anac. ¹⁶ Amanie lhta nema jeiantemecja napaqtawec apquelientalhnema mamma lhta enenlhet jepasmoma la m'a cacpota jengio'oc, wanlha lhtoca co'o ascasennalhco ejenquec ma'a, jeliengiacje lhta aplhamacjo asquetlhelhma'ac ma'a, coca asqueltawec co'o meiaqmoncasecjec Engiapom Neten apqueltemecja m'a. ¹⁷ Apuesque lhtoca jepasmoma, jeiaianco njan asiennactema cacpota apaiacsec aclhamacjo nquec ania'a actacmanma napaqtawec na aplhamacjo po'oc enenlhet, jewonquescanque lhta njan tep malha lhta ntemac quemjawa nac apmajai'a jeiaqjec ma'a. ¹⁸ Jewonquesec jata njan tep emanie nac necsa acuai'a maniamolhma, jeiantemecjac jata njan ma'a aquieto apcawacja neten aptemacja njan Apuesque m'a. ¡Antanco ta mota gloria Apuesai'a m'a mancotnenwaianlha nnelha! Amen. ¹⁹ Nquetlhenque ta ewalhoc Prisca canjan atawa' Aquila cacpota njan apquetcac apquennemolhema Onesiforo. ²⁰ Asqueltawec altennacsec lheiap apnacje lhta Erasto m'a aquieto Corinto, Trofimo lhtoca asnesacjac ma'a aquieto apiau'acja temma Mileto ncanec nenmasquema lhta ncaqjac ma'a. ²¹ Elienlhanmo ta ewatac apmanie nac apquelhcaianlha nac pieiam. Ca njan jenque'e Eubulo, Pudente, Lino, Claudia cacpota njan aplhamacjo elialheng'a jenque'e nquetlhenquec apualho'oc lheiap jam. ²² Asqueltawe co'o apuesque Jesucristo etnec aplhelhma mota lheiap, canjan Engiapom Neten ewaiwesentac nengamelaiam tacjaplhet'oc aplhamacjo apquetlhelhma'ac lheiap jam.