Capítulo 2
1
Lheiap malha eietca, elhenques jata mota aptengiai'o apiempec coca aniemai'o njan ma'a nengamelaiam anac aniem'o njan lheiap apasmecja Cristo.
2
Aplengai'a mota lheiap asquetlhecmoscamo napaqtawec enenlhet'awoc apentalhnema, etlhecmosa ta nja mota lheiap ma'a moclhem'a enenlhet apquellelto la apqueltacmelcasemmacpo cacpota njan ma'a etlhecmosancoc na po'oc.
3
Ewascap jata njan acuo'o la aquientalhnema ncanec lheiap apto malha soldado nema apiamo apcasennaicama la njan Cristo Jesus.
4
Ca soldado la'a metengiac apancoc apanquec la apcaniemjaicama, wanlha coca aptengia mota acleclemelha la apualhoc apuesque apancoc.
5
Apquellelto nac apquelpaiwasemmap carrera, apqueliajacje mota actemacja jenganemacja m'a cacpota elhcac aplhewai'a aquianmoma.
6
Canjan enenlhet apmacmecama la aniep apancoc, ecnec secje cacpota alhaiec etac apnaclhema aquielhna.
7
Etacmelcaso ta aclheianma apualhoc actacja nac asquetlhecmoscama lheiap, Apuesque ta eijanwesquescamjo aquiocjo nquec asquetlhecmoscama nac.
8
Coietnama ta apaqtec lheiap actemacja lhta apcaniemjaicama Jesucristo, apto aptawen neptamen David, aplhatecjanweiacmo lhta njan apiesecsec apquenmasquenwaiacmo m'a, ca ania'a actacmanma nac alheianmo na mota co'o,
9
asuet'ac najan aquientalhena acuacmo njan acno jenacteto cadenas aquieto nengaqlhencasemmalhquelha malha actonac enenlhet la meijamolhma, coca Engiapom Neten apaioma nac mancaqlhencasemmalhcac ma'a.
10
Coca asuascapmec necsa aslengaianco aquientalhnema cacpota ncoltacmelec apquellaniemjaicama apquellelto nac apqueliequiescama Engiapom Neten, apqueluoncasemmap jata njan tep, eluetac jata njan caselha altacmelo m'a aniem'o meliasqueiam Cristo Jesús.
11
Jawe ngiapac anquec asmac'acja nac atnec aspaioma, ca neletsepo la lheme Cristo, angelloca ta njan lhemec ma'a.
12
Ca nenwascapo la njan necsa nellengaianco aquientalhnema metca nengai'a njan, antancoc jata malha apqueluescai'e lhemec ma'a, canjan nenlheno la mangiamo apuesai'a Cristo, elhenec jata njan manjengiamo m'a.
13
Niecje mangelieplauquescama la nentancolha netlheianma, coca m'a Cristo eieplauquesec jata mota aptemacja aplheianma m'a ncanec aptemacja apanquec ma'a.
Nenganemmalhquelha antancoc nema jengasennaicama la nengiamolhma
14
Etlhenquesquescacjo ta mota apualho'oc enenlhet'awoc lheiap jenque'e jengetlhecmoscama nac, elleltennasamoc jata apquellanemacja etnancoc napaqtec Engiapom Neten metca apquellatemommap apiesecsec anac ma'a, coca aqjemo m'a, wanlha coca acmowana ncowescac acnaqtewascama apquellelto la apquellailhemo.
15
Elienlhanmo ta apquelanai'a acpeiwomo lheiap cacpota elhenec Engiapom Neten apeiwomo lheiap, melana' njan caselha jenmancascama la'a necsa apmacmecama lheiap, etlhecmos jatoca aquietemo nquec ania'a acto iocjalhme.
16
Melhen coca ania'a ncolatsecama la'a mancoleclemelha nac apualhoc Engiapom Neten, ncanec apto la aplheianma m'a ncoiawancoc jata m'a meijamolhma.
17
Ncopaijec jata njan apaioma ncolatsecama nac malha actonac iama al'oc la'a, ca aptaianco na mota m'a Himeneo cacpota njan Fileto,
18
apquetlhecmoseianco ncoitemo nquec ma'a, apquetlheianmo lhnac ntemenquec ma'a nentaiecja nac enjalhnanco'oc, lhna aptaiancoc ma'a, coca ania'a nac alietnocjesquescamo apualho'oc necsa aptaicamoc meliasqueiam moclhem'a Jesucristo apquennemolhema.
19
Coca Engiapom Neten jengellaianquec lhema iamet aquiennactema nquec, malha anencasemmalhca nenpatjetma la'a, aquieplomo coca alcasemmalhca ntemac jenque'e:
«Apqueliecpelcawec Apuesque enenlhet apanco'oc la'a»
Ca ntemac na mo'oc jenque'e: «Ntasec eliengiecjac ncolatsecama apquellelto nac apquellasennaicama Apuesque»
20
Lhema asietquescama, pa'at la aquiawai'a nnanquec conne altacmanma nquec caselha acmennawe nquec oro cacpota njan plata nema anmaicama la'a acuacjelha acnem actacmanma, nnanquec na conne caselha iamet necja cacpota njan nialpa alanemmalhca, nema anmaicama na mota lhamacjo acnem.
21
Ca apmac'o la etnec lheiap malha nema anmaicama actacmelo caselha nac, actacmanma nquec, apoccanma coca Apuesque m'a cacpota ncolanac altacmelo caselha m'a, meujanenwom na ncolatsecama nac jengetlhecmoscama ncanec ncopaisenquese ta apualhoc lheiap ma'a.
22
Etne toca malha apquengiema lheiap necsa acuai'a apualhoc atsepma apnengiec aniem'o apquetcoc, etengia toca mota acpeiwomo caselhaja, mangiasqueiam anac, nengamelaiam, etne ta njan metca acmasca apquelpasmacjo la aplhamacjo apquellelto nac apquellasennaicama Apuesque aquieplomo njan alalhnai'o apualho'oc.
23
Mengiailho nquec nema aliamenammalhca la'a, coca aqjemo m'a, wanlha coca mota actepquescama nennapommalhca m'a.
24
Lhema apcasennaicama la Apuesque
mancapuanquec eliamenacpoc po'oc, ntasec coca etacmelcasoc apaqmetquescama po'oc la'a, etnec na apmopuana etlhecmocsec canjan metca apecjescama caselha,
25
etnec na meientalhnemo ennawacsec apquellelto nac apquellammelhma la apquetlhecmoscama, coca Engiapom Neten jatelha ellanescasecjac apualho'oc ma'a canjan elianwesquescamjoc acuesai'a nac acto jawe ngiapac,
26
cacpota njan ma'a apuanca'ac ncolpaqnemecjac necsa anmama malha aljanemmalhca la ancoc queliacjameioc aniem'o altemo ellanac acmajai'acja nquec la m'a.