Capítulo 1
1
Co'o Pablo asto jeliequiescama Engiapom Neten cacpota atnec apostol, coca apto njan ma'a jeiapascama Cristo Jesús cacpota apaiacsec ania'a actemacja aliennactema ennengio'oc mancotnenwaianlha nnelha aniem'o nelpasmecja Cristo Jesús,
2
astalhescasquec co'o waccajac anac lheiap Timoteo apto malha eietca ascamelaiam. Asqueltawec co'o engiapma'ac anac Engiapom Neten canjan Cristo Jesús apuesque engancoc eluaiwesentac nengamelaiam anac, nengietnai'o nenga'at
canjan metca actaicama enwalhoc tacjaplhet lheiap.
3
Astec co mota gracias Engiapon Neten necsa asquenmalhnoncoma acnem anquec, pelhasep najan aclhenaicama mota njan ewalhoc lheiap, ascasennama njan Engiapom Neten aquieplomo alhnai'o aquietnaicama ejaqtec, ca aptaiancolha lhnac nanec na asquelieijenca' m'a.
4
Nlheianwacjec na co ewalhoc lheiap aiosei'o nac apualhoc canjan apuenemo lhta, awanjec asqueltemo atecjac mocjom lheiap cacpota ncopaijecjoc anquec ewalhoc.
5
Nlheianwacjec na ewalhoc iocjalhme lhta mei'asqueiam lheiap, amanie lhtoca lheiap apiama' Loida canja nquen acuesai'a Eunice mancoliasqueiam alhta m'a, asiawec na co'o lheiap nietnec mei'asqueiam actaiancolha nac ma'a.
6
Asmac anwancoc co'o lhema aspaioma lheiap, engialaiwasecjo ta mocjom malha talha nac aplhewai'a lhta apmopuana lheiap aniemai'o lhta m'a Engiapom Neten apcaicamoc necsa asnencanma lhta emeioc apietsecsec lheiap.
7
Jengellanquec ennenco'o Engiapom Neten engellualhoc acnema acmowana, nengamelaiam, nenmeiommalhco enganque', metca nengai'a njan.
8
Ca ncanec memancanquec na elhenec apuesai'a Apuesque engancoc, ca njan memancanquec na jelhenec co'o asnema nengaqlhencasemmalhquelha aniem'o ascasennaicama Apuesque. Ca apuanco ta emoc tacja lheiap apueto'o la aquientalhnema aniem'o apqueltennaicama ania'a actacmanma, Engiapom Neten jatoca njan engiancoc apiennactema cacpota ewascapoc lheiap.
9
Engiapom Neten jengeluonquescanquec tep, jengelliequiescanquec najan cacpota antancoc apquennemolhema jengelpoccanma, ma lhta niecje jengelietemo ennenco'o m'a, coca tep nac nanec metca nnelha actepecamo mota apenescamo jengeluetasquesec jata jengamelaiam apmajai'o engiapacsec ma'a Cristo Jesús.
10
Colhua coca neluetai'o njan apiamolhma apanquec Engiapom Neten aniem'o apuai'o m'a Cristo Jesús apto jengeluonquescama tep, aptewascamo njan acmowana nengetsepma nac, jengellaianco m'a aliennactema ennengio'oc ncotnenwaianlha nnelha aniem'o njan ania'a actacmanma nac nellengai'a.
11
Jeiapascanque lhta Engiapom Neten apaiacsec ania'a actacmanma nac, jetnesquescamo njan apostol canjan jengetlhecmoscama.
12
ca nqueniemai'ac asuetai'o nac aquientalhnema m'a, mancoca amancactemac ncanec co'o asiawec apto moi'asqueiacmo, apto lhta njan jeiapascama apaiacsec ania'a actacmanma, asiawec na aquietnema apmopuana m'a cacpota ncolhec aclhencasacjo nema acpaiescama ania'a actacmanma nac acuacmo m'a acnem aclhenammalhquelha.
13
Elhenques jata njan actemacja lhta asquetlhecmoscama lheiap, eloca ta njan lhemec ma'a mangiasqueiam anac, nengamelaiam alleniemai'o m'a apasmecja sonquec Cristo Jesus.
14
Etacmelques jata actemacja actacmanma jengetlhecmoscama aplhewai'a lhta lheiap, Espiritu Santo apcacjanquec apualho'oc aplhamacjo Jesucristo apquennemolhema epasmoc jata njan lheiap ma'a.
15
Apiawec na lheiap jeliengiecjo lhta aplhamacjo Jesucristo apquennemolhema aquieto m'a iocjalhma Asia, ca apqueluesai'a lhta moclhem'a m'a Figelo canjan Hermogenes.
16
Asqueltawec coca Apuesque elietnoc napaqta'ac apquennemolhema Onesiforo ncanec lhamacjo lhta mota jepasmoma m'a, ca asiennaiecjo lhta njan m'a necsa ascaclhencasemmalhca, ma lhta njan emancactemac jelanei'o co'o m'a.
17
Ma lhta njan ncowancoc apuai'a jenque'e Roma, jectamo colhuawec co'o metca apiamposammap acuacmo lhta jetacjo,
18
ca ncanec co asqueltemo eietnajoc napa'at Apuesque engancoc acuacmo ta acnem neliecpelcammalhquelha. Apiawec na lheiap ma'a awanje lhta njan jengelpasmoma m'a enenlhet anac aquieto lhta m'a Efeso.