¹ Engelialheng'a, nengelleltawec na ennenco'o jengellelmalhnesquesec cacpota enwanca'ac angelpaiacsec ania'a aplhenammap Apuesque lhmanquec jam cacpota ncotnec na actacmanma apquenmaicamoc tacja enenlhet'awoc ca actemo lhta quetlhencap jam apiesecsec anac. ² Jengellelmalhnesques najan cacpota jengeltacmelquesec Engiapom Neten necsa apquenmajai'a jennactewacsec enenlhet meliamolhma, apqueltemenwecjo lhma la'a apqueliasqueiam la njan Engiapom Neten. ³ Engiapom Neten apto apeiwomo elpasmoc jata m'a cacpota ncoliennac meliasqueiam quetlhencap, enmeiwoc jata njan necsa acmajai'a la ncowac ncolatsecama. ⁴ Nengelliawec ennenco'o quetlhencap apquelleliajacjawe mota nengetlhecmosecamo lhta, etlhenquesec jata njan mocjom ma'a nengetlhecmosecamo lhta aniem'o Apuesque engancoc. ⁵ Nengelleltawec na ennenco'o elpasmoc apuesque Jesús cacpota ellamelemmac po'oc ca aptemo nac ma'a Engiapom Neten apquellamelaiacmec aplhamacjo enenlhet'awoc, ellancoc na apqueliennactema cacpota eluascapoc necsa acuai'a la aquientalhnema. ⁶ Quetlhencap elialheng'a, aquieplomo apuesai'a apuesque engancoc Jesucristo mangelleltoc eliepetcanwomoc engelialheng'a nentemo lheme nac manconmajai'a enmacmama canjan melieplauquescama nengetlhecmosecamo lhta. ⁷ Quetlhencap coca ntasec eluanancoc nentaiancolha lhta ennenco'o jengeluetai'o lhta jam, aquietemo nque lhta nentaiancolha m'a, ⁸ ma lhta antoiancoc nentecamoc metca aquianmoma la'a, nientelhec anque lhta mota nenmacmecama lhamacjo acnem cacpota mongelientalhnesquesec apualho'oc quetlhencap jam jegellanco nlho mota nentecamoc. ⁹ Enwanca'a nlho lhta niecje angellelmalhnama jengelpasmoma la'a metca aquianmoma aniem'o nelemjama enmaniaie ennenco'o, coca montaiancoc ma'a, nemacmecama coca cacpota angenmancoc nentecamoc, ca nentaianco lhta ennenco'o m'a nengelleltemo ntasec jengeluanancoc quetlhencap ma'a nentaiancolha lhta. ¹⁰ Necsa nelloma lhta jam nellanque lhta njan ennenco'o lhema jenganemacja, ca ntemac jenque'e, enenlhet mancomajai'a la emacmamaja, mancoietoc na elhcac aptoma. ¹¹ Nellengai'ac coca apqueluesai'a moclhem'a apiesecsec anac quetlhencap acjemo lhna ntemac apquellaniemjaicama, manconmajai'a enmacmamaja, wanlha lhna mota apquetlheianweiacmo aptacja la po'oc temma apqueluetai'a. ¹² Coca mellammelho nquec aquientalhnema, enmacmama coca cacpota eluetac aptecamoc, nengelleltawec ennenco'o m'a aniem'o apientalhnemo apuesque engancoc Jesucristo. ¹³ Coca quetlhencap engellialheng'a nengelleltawec ellananco mota caselha altacmelo. ¹⁴ Jata apquelueto ta po'oc meliejecjo waccajac nennactalhesquescama nac, meliepetcamanquec ma'a cacpota njan enmancanwomoc ma'a. ¹⁵ Coca mellammelhanquec na m'a, ntasec coca ennawacsec ma'a metca apquelpalhencasecama, malha actonac apquelialheng'a apancawec la'a. ¹⁶ Jai, asqueltawec Apuesque apto ngiapom metca actaicama enwalhoc, ellancoc na metca altaicama apualho'oc nesca acuai'a lhamacjo actemacja aquientalhnema, etnancoc jata mota apquetlhelhma'ac ma'a. ¹⁷ Co'o Pablo astalhescama ejenquec jenque'e nlhenquec ewalhoc quetlhencap, aquieplomo njan astalhescama asuesai'a ca ntema mota lhamacjo waccajac astalhescama. ¹⁸ Asqueltawec na apuesque engancoc Jesucristo ewaiwesentac apquellamelaiam tacjaplhet'oc quetlhencap.