¹ Co'o Simón Pedro asto apostol canjan jeiasennaicama Jesucristo, nlhenquec ewalhoc aplhamacjo acnaicamoc la meliasqueiam actacmanma nquec nac, ca ctonac ennenco'o aniem'o nac Engiapom Neten canjan Jesucristo apto apeiwomo canjan jenweluonquescama tep. ² Asqueltawec ncanantancoc apquellamelaiam canjan metca acmasca apiesecsec anac quetlhencap aniem'o apquelianweiacmo Engiapom Neten canjan Jesús apuesque engancoc. ³ Apto lhta m'a acnema apmopuana, elanac na caselha jempelapquescama, jengellawema lhta cacpota jengellancoc lhamacjo caselha alaimommalhquelha lhta ennenco'o m'a, cacpota angellanancoc necsa nellaniemjaicama mota acpeiwomo. ⁴ Jengelleltennascamo lhta njan lhema apaioma antancoc jata nengelnemo Engiapom Neten, enwanca'ac jata njan jengelpaqnemecja caselha ncollatsecama nac jenque'e aniem'o aliasponcomacja nac engellualho'oc. ^{5 6 7} Nnaianquec quetlhencap meliasqueiam, coca ncaimelhquec etengiancoc apiempeioc ellanquesancoc lhamacjo caselha altacmelo ca ctonac nentacmelcasemmalhco, nengianweiacmojo', nenmopuana anmeiawalhcoc enganque', metca nempecjescama, nengamelaiam Engiapom Neten, nengamelaiam enquetcac, nengamelaiam aplhamajo enenlhet'awoc. ⁸ Ncaimelhquec angellanesancoc aquiecanweiacmo engellualho'oc anac caselha altacmelo nac, cacpota ncotnecjac malha allentepecja m'a ncollanancoc caselha altacmelo. Coca mantanco la m'a, netamen acjemo ta ncotnec nelianweiacmojo apuesque engancoc Jesucristo. ⁹ Coca enenlhet mancoietnema la m'a actonac alheno lhquec, malha ta ncotnec metca apaqto'oc la'a, nlho ca la njan nengaqtec la apuetai'a caselha, apqueluancaiam najan nema alhnasquescama lhta apualhoc necsa lhta meijamolhma. ¹⁰ Quetlhencap elialheng'a, apquellawema lhta Engiapom Neten, apqueliequiesaicamo lhta njan ma'a, ntasec enmeiwo mota m'a caselha altacmelo nac apualho'oc, ntase mota aplhenquescama enenlhet apto la m'a. ¹¹ Netamen ntasec jata ncotnec apuaiam ma'a iocjalhma aquieto nac aptemenwecjelha metca nnelha apuesque engancoc Jesucrista, apto njan jenwonquescama tep. ¹² Wanlha mota asqueltemo ncotlhenquescacjo apualho'oc asquetlhecmoscama nac acto jawe ngiapac anquec, asiawe niecje co'o apquelliawec quetlhencap jengetlhecmoscama nac, apquelleliejecjawec nac metca nnelha, ¹³ ncacjoc coca asqueltacjenwescacjec asquellanemacja etnancoc acuaiacmo asquetsepo ta co'o. ¹⁴ Apuesque engancoc Jesucristo apianwesquescaiacmoc ewalhoc ncanquetquec anwetsepoc jata aiengiecjac jata asiocja nac, ¹⁵ coca colhuawe nac alhenquesec jata asqueltacjenwesquecja asquetlhecmoscama cacpota ncotlheianwacjo apualho'oc quetlhencap asquetsepo ta. ¹⁶ Lhamacjo netlhecmosecamoc anac actemacja apmopuana apuesque engancoc Jesucristo, actemacja njan apuectanlha ta, ncanec nellengai'a lhta ennenco'o neliocjo engancawec ma'a, jawe aniem'o m'a nema jengeltennasecama nac malha ncotno iocjalhme nac, neliocjo engancawe lhta neluetai'a ennenco'o m'a apientalhnacja apuesque. ¹⁷ Necsa nellengai'a lhta apaioma Engiapom Neten apto engiapma'ac, necsa lhta njan aponmatema neten acuaiwantamo lhta njan apaioma, aio'o lhta m'a, actemesquescamo lhta njan aquiawai'a nquec apuesai'a Jesús, lhta ntac: «Ca eietca jam ascamelaiam, apto njan asqueliequiescama co'o» lhta ntac ma'a. ¹⁸ Nelleng'a lhta ennenco'o nema aliatecama nac aniem'o neten necsa nentaicamoc alhta netlhelhma'ac apuesque aquieto m'a nalhma acjaiam acpocquenammalhca, ¹⁹ ca nqueniemai'ac neltemesquescamo iocjalhmec anquec ania'a apquetlheianmo lhnac nanec apquetsecama ania'a nnenga, ntasec na quetlhencap eltacmelcasoc apquellailhemo ania'a nac ncanec malha talha alhancoc la m'a altetquescama nac ienactesacjalhma apualho'oc ma'a, actacmelquescamo coca atsasecamo lhma m'a acuacmo aptepo malha iau'a apiawai'a la'a apquellualho'oc quetlhencap ma'a. ²⁰ Asqueltawec na aleltennacsec caselha acto neten anquec aquiaspommalhca nac, mancolatsema elpeiwesocja apanco'oc apancawec la ania'a aquietnemo nac ma'a waccajac Engiapom Neten apaioma, ²¹ apquetsecama ania'a nneng'a metlheianmac apanco'oc apancawec la'a ania'a, Engiapom Neten coca apquellaicamoc apaioma m'a cacpota etlhenec ma'a, aniem'o njan apquenmaicama Espiritu Santo.