¹ Ja̧u̧nö̧ o'ca'a o'catoi'önä̧ Israel ttö̧ja̧mä̧ ya̧tȩtä̧ rä'opö i̧'cha̧'a̧ jä̧'i̧nö̧'a̧nö̧ 'chi̧nä̧tö̧, Danttö̧ kä̧mä̧dö̧ Beerseba jubu, Galaad rȩjȩ'i̧nä̧ juhua'atä jacuä päi'önä̧, ja̧hua̧nö̧ ja̧'a̧ jahuätömä̧ ji̧nä̧ yo̧metȩ ca̧ca̧cui̧nä̧tö̧ TÖ̧Ä̧NA̧HUA̧ ä'ca jo̧me Mizpattö. ² O'catoi'önä̧ ötähuiyä ttö̧ja̧ tturuhuotö, Israel ttö̧ja̧ ttahuaruhuä 'cotö'inä̧, ja̧hua̧ta̧'a̧nö̧ Dios i̧tti̧mö̧ huotö'inä̧ 400milnö̧ jo̧menä̧ ttö̧jä̧pö̧nä̧ 'chä̧nö̧ ca̧ca̧cui̧nä̧tö̧, jahuätömä̧ jo̧menö̧ huotö ji̧na̧'a̧ curä'chunä̧ ttörohuähua̧ pä'ö. ³ Jitä Benjamín ahuäruhuämä Israel ötahuiyä ttö̧ja̧ Mizpara'acu ttuhuä̧mi̧a̧ ä̧jucuinä̧tö̧. Israel ötahuiyä ttö̧ja̧mä̧ päi'nätö:" piyȩ surojumä tocu 'cuäopacuättö jiähuitö." ⁴ Levi ttö̧jąsą, irecuarö cuä'ö tticuini̧yä̧cu päjimä̧, instinto:"ttömä̧ ichinösä̧ Benjamín irejä̧nä̧ huȩjö̧ Guibeá ötahuiyära'cu, Ttömä̧ inä̧ ya̧huȩinä̧ chirecuacu, juäjucu yodo 'cuädopa pä'ö." ⁵ Ja̧u̧ yodomä̧, Guibeá ötahuiyä ttö̧ja̧ tturuhuottö tturohuähua pä'ömä̧, chojusodenä sobäcuächönä tto'epö cuä'ö tticua pättinäcu̧sä̧. Jahuätömä karaju chirecuarö 'chu'ädö ȩmi̧pö̧ suronä̧ jȩpi̧nä̧tö̧, ja̧'hua̧nö̧ jȩttä̧cua̧ 'corujuo'ächinä̧ju̧. ⁶ Ttömä karaju chirecua päjäjuru ȩmo̧po̧'ö̧ kidepämä ppo̧u̧cu̧ 'cui'ö icuinö̧sä̧, ja̧'hua̧nö̧ jȩpö̧ Israel ttö̧ja̧ tti̧rȩjä̧ jacuä ttötahuiyäpönä ka̧cuä̧tö̧rö̧ hue'inö̧sä̧, isopäi'önä jahuätömä Israel ttö̧ja̧rö̧mä̧ surojö, ttöjö'cocö jähuä jȩpä̧jä̧tö̧. ⁷ Ja̧'hua̧nö̧ ja̧'a̧ttö̧ ucutu Israel ttö̧ja̧ o'catoi'önä, "a̧mö̧cuädätucui pa̧'a̧nö̧ jȩta̧ja̧ pä'ö." ⁸ töja̧ o'catoinä ya̧tȩtä a̧ra̧miö i̧cha̧'a̧ jäi̧nö'a̧nö chänö päinätö: "!Ujututumä ya̧tȩi̧nä i̧'chi̧ya̧cua̧tó jahuätö ttä'ahuaräcumä, jahuata'anöta̧ ujututumä ya̧tȩi̧nä ppa̧cuä'chi̧ya̧cutó ojusodera'acumä! ⁹ Jahua'anö ja̧'anä jitämä pa̧'a̧nö jȩta̧cuo̧töjä Guibeáttörömä:Ujuturu adiunänö jo̧mȩ ' chänö ttörohuähuäcuotöjä. ¹⁰ Ujutu'i̧nä̧ ja̧'hua̧ta̧'a̧nö̧ tö'ojo'äcuotöjä̧ dieznö̧ jo̧mȩnä̧, cienö̧ u̧mä̧tö̧ttö̧mä̧ o'catoi'önä ttahuaruhuä 'cotö Israel ttö̧ja̧, ja̧'hua̧ta̧'a̧'nä̧ cienö jo̧mȩttö̧mä̧ milnö̧ huotö, ja̧'hua̧ta̧'a̧nö̧ milnö jo̧mȩnä̧ huotö diez milnö̧ ttö̧ja̧, ja̧'hua̧ta̧'a̧nö̧ cuähuä tti'cächa pä'ö ötahuiyä ttö̧ja̧ ttu̧cuȩ, ja̧'hua̧nö̧ ja̧'a̧ttö̧ juätö ttichomenä̧ Guibeá Benjamínä, ttötäbota pä'ö jahuätörö suronä jȩtti̧nö̧ta̧'a̧nö̧ Israelttö. ¹¹ Ja̧'hua̧nö̧ ja̧'a̧ttö̧ o'catoi'önä su̧ro̧do̧u̧ curä Israel ttö̧ja̧ ca̧ca̧cui̧nä̧tö̧ juȩnȩ ötahuiyänä̧ ka̧cuä̧tu̧cu̧ tturohuähua pä'ö, ubo ya̧tȩ 'cua̧rö̧nä̧. ¹² Israel ahuäruhä'cotömä hueina̧tö huȩnȩ jittähuajapäö Benjamín, ahuäruhuä o'catoinärö pa'anö päö:"¿Tti̧yȩjätö ucutu suronätä jȩ'cu̧ätu̧cu̧mä? ¹³ Jahua'anö ja̧'a̧tö jahuätö Guibeátö suronä jȩpäjätörömä iyitö cuäöticuatö päötä,jahua'anö jötötä huȩnȩ juiyönä ja̧cua̧'a̧ Israel ttöja̧tömä. ¹⁴ Jahua'anö pätta'anäi̧nä ä̧ju̧cuo̧'co̧tö pinätö Benjamitas ttöja̧mä ttahuäruhuä Israel ttöja̧ pätömä.Ja̧u̧nu̧ o'ca'a Benjamin ahuäruhuämä räopinätö ji̧nä yo̧mȩtȩ pätti'a päö Guibeánä juorötä tu̧huo̧jui'a̧ päö ttörohuahuacua'a päö Israel ttöja̧cu̧. ¹⁵ Benjamín ahuaruhuä ji̧yȩnö̧ mo̧ro̧ ttidepiyu pönättö̧mä̧ ca̧ca̧cui̧pi̧nä̧tö su̧ro̧do̧u̧mä̧ veintiseis milnö̧ jo̧mȩ huotö ji̧na̧'a̧, jahuätömä curä o'chönä tturuhuähua pä'ömä jo̧mȩnö̧tä̧ huo̧juȩcuo̧tö̧ pinätö̧. Guibeá ötahuiyänä̧ ka̧cuä̧tö̧ u̧mä̧tö̧ pojopö ttȩmi̧nä̧u̧ttö korotömä setecientosnö huotö jo̧mȩnä̧ ka̧cui̧nä̧tö̧. ¹⁶ Pitö su̧ro̧do̧u̧ recuätöttö pojopö ttȩmi̧nä̧u̧ u̧mä̧tö̧ pohuepätömä setecientos huotö jo̧mȩnä̧ ka̧cui̧nä̧tö̧. Jahuätöttö yotucunämä ttuhuocoinä ido'quinä tticuttö'i̧nä̧ kä̧do̧ppö juiyönä ticu'anö̧ huinätö̧. ¹⁷ Israel ttö̧ja̧mä̧, Benajamincu̧ kä̧cuä̧tö̧rö̧ pa̧ja̧cuä̧ juiyönä̧mä̧, o'catoi'önä̧mä̧ 400milnö̧ u̧mä̧tö̧ ji̧na̧'a̧, jahuätömä̧ curä'chunä̧ ttörohuähua pä'ö huo̧juȩcuo̧tö̧ pinä̧tö̧. O'catoi'önä̧ jahuätö u̧mä̧tö̧mä̧ curä ruhuä ji̧na̧'a̧. ¹⁸ Israel ttö̧ja̧mä̧ ä̧rä̧mi'ö̧, Betelra̧'a̧cu̧ 'chi̧nä̧tö̧, TTÖ̧Ä̧NÄ̧HUA̧ jiähuatö pä'ö jä'epö. Jahuätö jä'epinä̧tö̧: "¿Dijä̧ttö̧ ujututtu ä̧cuomenä̧ ö̧ro̧huä̧huä̧cua̧mä̧ Benjamin ahuaruhuärö? "TTÖ̧Ä̧NÄ̧HUA̧ pä̧'inö̧: "Juda ä̧cuo̧menä̧ ö̧ro̧huä̧huä̧cua̧mä̧." ¹⁹ Israel ötahuiyä ttö̧ja̧mä̧ yo̧a̧'a̧nä̧ porähuinätö̧ ja̧'hua̧'ta̧'a̧nö̧ ttö̧jö̧ ode pporädinä̧tö̧ Guibeá ttö'cöcu. ²⁰ Israel ttö̧ja̧mä̧ rohuäu 'chi̧nä̧tö̧ Benjamín ttö̧ja̧cu̧. Juätömä ka̧cuä̧mi̧nä̧tö̧ tturohuähua pä'ö juätucu Guibeá cuttu. ²¹ Benjamín ahuaruhuämä rä'o'inätö̧ Guibeáttö. Ja̧'hua̧nä̧ ja̧'a̧ veintidosmilnö̧ su̧ro̧do̧u̧ jo̧mȩnä̧ cuä'ö icuinätö̧ Israel ttö̧ja̧rö̧ ja̧u̧nö̧ mo̧ro̧mä̧. ²² Ja̧hua̧nö̧ ja̧'a̧nä̧ Israel ötahuiyä ttö̧ja̧mä ka̧ra̧ ka̧ra̧nö̧ ppäsecu juruhuächi'inä̧tö̧, ja̧hua̧nö̧ ja̧'anä̧ a̧cuo̧mȩnä̧ji mo̧ro̧ ttörohuahua pä'ö tti̧jä̧mä̧dä̧jo̧mȩtä̧ kä̧mä̧dui̧nä̧tö. ²³ Ja̧hua̧ta̧'a̧nö̧ Israel ötahuiyä ttöja̧mä̧ 'chä̧nö̧ TTU̧RU̧HUA̧ ä'ca jo̧mȩtto̧ ajuahuinätö̧ ni̧päromȩ juächomȩ jubu.Jahuätömä̧ TTU̧RU̧HUA̧ öjo̧mȩ usinätö:"¿Pä'äjita'anö rohuäö ti̧'cha̧cua̧'a̧ ujututä tahuäruhuäcu Benjamín ötahuiyä ttö̧ja̧cumä̧?"Ja̧hua̧nö̧ ja̧'a̧ TTU̧RU̧HUA̧MÄ̧ pä'inö: "Rohuähuäjätucui!" ²⁴ Ja̧'hua̧nö̧ ja̧'a̧ todare mo̧ro̧ päi'omenä Israel ttö̧ja̧mä̧ Benjamín ahuaruhuä curä ruhuäcu rohuähuinä̧tö̧. ²⁵ Todare mo̧ro̧ päi'omenä, Benjamín ahuaruhuämä̧ Guibeá ötahuiyättö kä̧mä̧dö̧ jahuatucu tturohuähua pä'ö ichinä̧tö̧, ja̧'hua̧nö̧ ja̧'a̧ttö̧ Israel ttö̧ja̧rö̧mä̧ dieciocho milnö̧ jo̧mȩnä̧ huotö u̧mä̧tö̧rö̧ cuä'äu icuinä̧tö̧. O'catoi'önä jahuätö u̧mä̧tö̧mä̧ curä o'chönä tturuhuähua pä'ömä jo̧mȩnö̧tä̧ huo̧juȩcuo̧tö̧ pinätö̧. ²⁶ Ja̧u̧nö̧ o'ca'a o'catoi'önä Israel curä ttö̧ja̧ ja̧'hua̧nö̧ ja̧'a̧ttö̧ o'catoi'önä ttö̧ja̧mä̧ 'ca'achinätö̧ Betelra̧'a̧ juorömä ajacuähuinä̧tö̧, juȩnȩ pȩjä̧mi̧nä̧tö̧ Ttu̧ru̧hua̧ ä'ca jo̧mȩ jahuätömä ttu̧cuȩ a̧do̧chö̧ ja̧u̧nö̧ mo̧ro̧ ni̧pä̧ro̧mȩ jubö jo̧mȩnä̧ ja̧'hua̧nö̧ ja̧'a̧ iyinätö̧ ttiäre iyähuä curä juiyönä kä̧cuä̧huä̧ TTU̧RU̧HUA̧ ä'ca jo̧mȩ. ²⁷ Israel ttö̧ja̧mä̧ Tö̧ä̧na̧hua̧rö̧ jäepinä̧tö̧: Dä̧bö̧ Dios esecu u̧jo̧ca̧mä̧ ja̧u̧nu̧ pä̧nä̧mä̧ juȩnȩ ki̧na̧'a̧ttö̧, ²⁸ ja̧hua̧ta̧nö̧ Finees, Aaron i̧tti̧ Eleazar i̧tti̧mä̧, jo̧ca̧'a̧ eseu jȩcui̧no̧ca̧ ja̧'a̧tȩ ttaditina'attö̧ ja̧u̧nu̧ pä̧nä̧mä̧ "¿Pä'äjitanö tö̧jä̧hua̧tö̧ Benjamín ttö̧ja̧rö̧ räopächö rohuäu ti̧cha̧'a̧ pä'ö ja̧'a̧? Tö̧ä̧nä̧hua̧mä̧ pä'inö: "Rohuäu kä̧mä̧dä̧tö̧cui̧, ttömä ppä̧nä̧nä̧cuä̧ju̧jä̧ cujuruhuätöcunä yo̧i̧ mo̧ro̧mä̧". ²⁹ Jahua'anö ja̧'a̧ Israelttö rohuähuätörömä jo̧menö yȩhuȩi̧nä ku̧ninö Guibeá ippeyänä jäyänä. ³⁰ Jahua'anö jȩpu̧ rohuähuinätö Israel ttöja̧mä huäbodäcuä mo̧ro̧ päiönä Benjamín sotucumä,jahua̧'anö jȩpu̧ ko̧cuȩminätö i̧sa̧ra̧na̧ kurä rohuähuäcuänä Guibeárö koronöinä jȩttäi̧jö̧a̧nö̧tä̧. ³¹ Benjamín ahuäruhuä o'cotö 'chi̧nä̧tö̧ Israel ttö̧ja̧'a̧cu̧ rohuäu, jahua'anö ja̧'a̧ttö̧ jahuätömä töipächinätö ötahuiyätö'inä̧ otó jo̧me. Jahuättömä rohuäu ko̧cuȩminä̧tö̧ ja̧hua̧'a̧nö jȩpu̧ cuä'cuäpu ihuinätö a̧u̧cu̧nänöta̧. Israel ttöja̧tömä̧ to'einä̧tö̧ ttörohuähuomettö̧mä̧ ja̧hua̧ta̧'a̧nö̧ 'chänö ttörocuähuomettö̧mä̧ 30nö jo̧mȩta̧. Mäniya̧ o̧mättömä 'chi̧na̧'a̧ ji̧mätȩmä Betelra'cu ja̧hua̧ta̧'a̧nö̧ koromämä Guibeára'a̧cu̧. ³² Ja̧u̧nö̧ o'ca'a Benjamin ahuaruhuä o'cotö päinä̧tö̧: "Jahuätömä̧ rohuäu ticuäjä̧u̧ ja̧hua̧nö̧ ja̧'a̧ttö̧ ujuturu otonä̧ ye'ecu jopättö, ä̧cuo̧menä̧ji jȩttä̧ji ta̧'a̧nö̧." Ja̧hua̧nö̧ ja̧'a̧nä̧ Israelttö curäruhuämä̧ päinä̧tö̧: "Hua̧i̧nä̧ to'ca'acu jota'a topätö ja̧hua̧nö̧ jopö ötahuiyättö'inä̧ otó mä̧nä̧ra̧'a̧cu otipäcuotö." ³³ O'catoi'önä̧ Israel ttö̧ja̧mä̧ ttö̧jo̧mettö̧ ä̧rä̧miö̧ jo̧menö̧ ka̧cuä̧minä̧tö̧ curä ttorohuhua pä'ö Baal Tamarttö. Ja̧u̧nö̧ o'ca'a Isralttö curäruhuämä̧ jo̧menö̧ jeru'unä̧ dajahuächö ttö̧jo̧metä̧ räopinä̧tö̧ Maareh Gebattömä̧. ³⁴ Israel ttö̧ja̧ o'catoi'önättö̧ pojopö ttȩmi̧nä̧u̧, Guibeá ttö̧ja̧cu̧ rohuäu ichinä̧tö̧mä̧ diez milnö jo̧mȩnä̧ u̧mä̧tö̧ ji̧na̧'a̧ ja̧'hua̧nö̧ ja̧'a̧ yorö'iso pä̧i̧cu̧nä̧ rohuähuinä̧tö̧, ja̧'hua̧nö̧ tturohuähua'anä Benjamín ahuaruhuä 'cotömä jitörötä surojö 'cuäopäcuȩ tö'cö ka̧'a̧mä̧ jerupinä̧tö̧. ³⁵ Benjamín ahuaruhuä 'cotörö TTÖ̧Ä̧NÄ̧HUA̧ urohuähua'a topinä̧tö̧ Israel ttö̧ja̧mä̧, Israel ttö̧ja̧ttö̧ curä huohuähuätömä̧ Benjamín ahuaruhuä 'cotörömä̧ 25.100nö̧ huotorö cuä'äu icuinätö̧. Jahuätö o'catoi'önä̧ 'corujuo'ächinä̧tö̧mä̧ curä o'chunä̧ tturohuähua pä'ö'inä jo̧mȩnö̧ huo̧juȩcuo̧tö̧ ji̧na̧'a̧. ³⁶ Ja̧hua̧nö̧ ja̧'a̧ Benjamín ahuaruhuä sö̧ro̧daumä̧ toädeö jȩpö̧ icuahua'atä topinätö. Israel ötahuiyä ttö̧ja̧mä Benjamínrö̧ i̧rȩjä̧ iyinätö̧, Guibeá i̧mi̧nä̧ dajahuänö tta̧tta̧ra̧'a̧ pä'ö huȩttä̧mä̧ ujuturu ppädädäcuotö pä'ö ttamucuäda'attö. ³⁷ Ja̧u̧nu̧ o'camä jahuätö u̧mä̧tö̧ dajahuänö ka̧cuä̧tö̧mä̧ jurunänö ä̧rä̧mi̧u̧ Guibeá ötahuiyäcu dotepinätö̧. ³⁸ Israel sö̧ro̧da̧u̧cu̧ ja̧hua̧ta̧'a̧nö̧ jitö dajahuänö ka̧cu̧tu̧cu̧mä̧ pä'ö ttö̧jö̧na̧ ji̧na̧'a̧, ucurä isoppa rioppa cä'ecuächomenä jä̧cua̧'a̧tó pä'ö. ³⁹ Israel ttö̧ja̧ttö̧ curä rohuähuätömä̧ jȩttä̧cuȩ jä̧ji̧ jittähuopo'omenä̧ curä tturohuähuomettö̧mä̧ tto'ca'acu ppa̧'a̧chi̧'i̧nä̧tö̧. Ja̧'hua̧nö̧ ppa̧ttä̧chi̧'i̧yä̧u̧ Benjamín ahuaruhuä 'cotörömä̧ cä̧mä̧dö̧ rohuäumä Israel ttö̧ja̧ttö̧mä̧ 30nö jo̧mȩ huotörötä cuä'u icuä'cotö pä'inä̧tö̧: "A̧cuo̧mȩnä̧ turohuähuinö, rohuäu ticuinötinöta'anö rohuäu ti̧cuä̧u̧ 'cua̧ra̧'a̧." ⁴⁰ Ja̧'hua̧nö̧ ja̧'a̧nä̧ ötahuiyättö ocurä isoppa kä̧mä̧dö̧ 'chahuähuäda'a, Benjamín ahuaruhuä 'cotö tto'ca'acu kärächi'ö tottomenä ocurä isoppamä ötahuiyättö mo̧ro̧jä̧ra̧'a̧cu̧ cäepina̧'a̧. ⁴¹ Ja̧'hua̧nö̧ päi'omenä Israel ttö̧ja̧mä̧ ppa̧'a̧chi̧'ö̧ jahuätucu rohuäu icuinä̧tö̧. Benjamín ahuaruhuä 'cotömä̧ rö̧ȩnä̧ ye'ecui'inä̧tö̧, surojömä jitötä ttö̧ja̧cua̧'a̧cu̧ ma̧ä̧ma̧'a̧ topö. ⁴² Jahua'anö ja̧'a̧ttö jahuättömä jopu töipächinätö Israel ttöja̧ttömä, de'a huiya̧jära̧'a̧cu̧ mänänä 'chänö. Jahua'anö ja̧'anä töttipächapäö jui'inättö.Israeltö curä rohuähuätömä ichinättö ötahuiyä u̧mittö jahuättö ttöjo̧cuo̧mecu̧ huäö tticuapäö. ⁴³ Juatömä tto̧epinä̧tö̧ Benjamin ttö̧ja̧rö̧ ja̧'hua̧nö̧ ja̧'a̧ juattö tto̧'ca̧'a̧nä̧ ruinätö̧. Juattömä ja̧'hua̧nö̧ ja̧'a̧ tto̧epinä̧tö̧ Noha pä'u micuomȩttö̧ juorömä cuä̧'u̧ tticuinä'u mänä kä̧hua̧ räopa'acu rämä kä'co jo̧mȩttö̧ Guibéa ja̧'a̧cu̧. ⁴⁴ Benjamin ahuaröhuä o'cottö ttö̧mä̧, toe'inätö̧ diezciochomilnö ttö̧ja̧ jo̧mȩnä̧ o'catoi'önä juattömä curä rohuäcuähuä ttö̧ja̧ pi̧nä̧tö̧. ⁴⁵ Jahuätömä ppa̧'ä̧chi̧'ä̧'cotö, dö'ecuächinä̧tö̧ rȩjȩ de'a jui̧yä̧ttö̧mä̧ Rimón inähuära̧'a̧cu̧. Israel ttö̧ja̧mä̧ cinco milnö̧ jo̧mȩnä̧ yabonänö̧ huotörö cuä'äu icuinä̧tö̧ mä̧nä̧ttö̧mä̧. Juhua'a yabonö ru'u, tto'ca'anä tö'cönä̧nö̧ 'chi̧nä̧tö̧ mä̧nä̧nä̧ Gidón pättome jubö, ja̧'hua̧nö̧ 'chä̧nö̧ juhuorömä dos milnö jo̧mȩnä̧ yabonänö̧ huotörö cuä'äu icuinä̧tö̧. ⁴⁶ O'catoi'önä̧ Benjamín ahuaruhuä 'cotöttö curä rohuähuätö, ja̧'u̧nö̧ mo̧ro̧ to'e'ätömä veinticinco milnö u̧mä̧tö̧ ji̧na̧'a̧, curä o'chunä tturohuähua pä'ö jo̧mȩnö̧ huo̧juȩcuo̧tö̧mä̧; jahuätö o'catoi'önä curä rohuähuäcuähuämä̧ jo̧mȩnö̧ huinätö̧. ⁴⁷ ̧'hua̧nö̧ ja̧'a̧nä̧ seicientonö̧ jo̧menä̧ u̧mä̧tö̧mä̧ ppa̧'chö̧ ttö'ipinä̧tö̧ rȩjȩ de'a jui̧yä̧jä̧cu̧, Rimón inä̧huä tö'cö jo̧mecu̧. Ja̧'hua̧nö̧ ka̧cuä̧minä̧tö̧ Rimón möä'canä̧mä̧ pa̧ja̧cuä̧nö̧ kä̧hua̧ jo̧menä̧. ⁴⁸ Israelttö curä ruhuämä̧ pä'äjita'anö̧ kä̧mä̧dö̧ rohuähuinä̧tö̧ Benjamin ahuaruhuä o'cotucu ja̧'hua̧nö̧ rohuäu jahuätörö cuä'äu icuinä̧tö̧-- o'catoi'önä̧ ötahuiyänä̧ ka̧cuä̧to̧ro̧'inä̧ ttä̧ji̧mö̧ päcä̧yö̧rö̧'inä̧, ja̧'hua̧ta̧'a̧nö̧ o'catoi'önä̧ ttö̧jocua̧'a̧ to̧ttä̧u̧ru̧mä̧. Ja̧huata̧'a̧nö̧ 'cuhuä'chö icuinä̧tö̧ mä̧nä̧nä̧ tto̧jo̧cua̧'a̧ to̧ttö̧u̧ru̧mä̧.