Capítulo 12
8
Ucumä jitä mo̧ro̧ jȩtö̧ o'cajuiyönämä jȩpo̧cö̧ cuä̧cua̧jä̧, jitä o'catoi'önä tta̧mö̧nä̧ tottomenä adiutä jȩpä̧tö̧,
9
ucumä ji̧nä̧ 'cuä'ächi'ö cu̧'ä̧mä̧da̧ pä'ömä rȩbȩhui̧po̧cö̧jä̧, TÖ̧Ä̧NÄ̧HUA̧ CU̧Ä̧NÄ̧HUA̧TÖ̧CU̧ DIOS cui̧rȩjä̧ päi'önä cu̧ja̧ pä'ö i̧yä̧jä̧nä̧mä̧.
10
Ja̧'hua̧nö̧ ja̧'a̧nä̧ Jordán aje päcuädotora̧'a̧ cuijähuächätucuomenämä TÖ̧Ä̧NÄ̧HUA̧ CU̧Ä̧NÄ̧HUA̧TÖ̧CU̧ DIOS cui̧rȩjä̧ päi'önä cu̧ja̧ pä'ö i̧yä̧jä̧nä̧ cu̧jä̧tu̧cuo̧mȩnä̧mä̧, ja̧'hua̧ta̧'a̧nö̧ cuabo iyotö cuippeyänä ka̧cuä̧tö̧cu̧ huȩnȩ huiyönä 'quiya'a abotä cu̧jä̧tu̧cuo̧mȩnä̧mä̧,
11
ja̧u̧nö̧ jä̧cua̧'a̧ TÖ̧Ä̧NÄ̧HUA̧ CU̧Ä̧NÄ̧HUA̧TÖ̧CU̧ DIOS i̧mi̧ ka̧ pojopö ȩma̧cua̧'a̧mä̧, ju̧huȩtä̧ cui'cächätucuäcuotöjä o'cajuiyönä ttö huedömä: Ku icu iyähuä'inä, i̧sa̧ cuä'ö cui̧cuä̧tu̧cuä̧cua̧rö̧'inä, cuaditähuätucuttö 'cä̧'ȩpö̧ ku̧nä̧huä̧'inä, cuiyätucua pä'ö amöcuädö cu̧ju̧nä̧tö̧cu̧'inä, o'cajuiyönä ucutu tiyäcuotöjä̧ päcuinä̧tu̧cu̧ cu̧ca̧ca̧tä̧tu̧cu̧mä̧.
12
Ucutumä TÖ̧Ä̧NÄ̧HUA̧ CU̧Ä̧NÄ̧HUA̧TÖ̧CU̧ DIOS to̧ä̧ro̧mȩttö̧ cueseäcuähuäcuotöjä̧: Ucu'inä cui̧tti̧mö̧'inä, cumöhuäyotötö u̧mä̧tö̧'inä, nätö'inä̧ ja̧'hua̧ta̧'a̧nö̧ Leví ahuaruhuä 'cotö ucutucu ka̧cuä̧tö̧rö̧mä̧, juhua'amä jahuötörömä ucuturu iyö'anömä tti̧rȩjä̧mä̧ i̧yo̧co̧u̧ pinätö̧.
13
Ucutumä adiu ä̧ju̧cuä̧tu̧cui̧ ku icu iyähuämä o'catoi'önä tto̧ttä̧ro̧mȩttö̧mä̧ cuiyätucuä;
14
ja̧'hua̧nö̧ ja̧'a̧nä̧ TÖ̧Ä̧NÄ̧HUA̧TÄ̧ jä̧cua̧'a̧ ucutu yotuterö ku icu iyähuomettö ttiyäcuotörö ö'ojo'äcua̧mä̧, ja̧'hua̧nö̧ ja̧'a̧ttö̧ ju̧huȩnȩtä̧ jä̧cua̧'a̧ o'cajuiyönä ttö huedö jȩ'cuä̧tu̧cuä̧cuo̧mȩmä̧.