¹ Yääje mma yaawä aduwawä anototo ai, tösootoi jadäiñe David cönädöi Siclag ña töjatadö tödha´cwa cönedantäi Amalecitas wäiñe tönwanno cönwonotoicho Neguev ñano, Siclag mmaja. ² Yaawä cönädöicho wodiñamo tameedä yäätä cönäjatodö, mude´shiichä, adaijocomo mmaja. Tonichä ämjajoda cöneiyato, yawäne mmane cönadäicho tö´tädawäiñe. ³ Yaawä David shootoi mmaja cönädöicho töjaatacaiñe, todha´cwajäe cönedantoicho, yaawä töjiñantoncomo, tönnacontoncomo mmaja, tadä cönedantoicho jedeesuje. ⁴ Yääje´ma yaawä David ñanno soto chäjadä cönäjatodö mmaja, cönamoicho, tänacuducomo jeeda tudö´ene. ⁵ A´nädäncädä David jiiñantomo tadä cönä´jato jedeesuje, Ahinoam ñädä Jezreelita, Abigail mmaja ñäädä Nabal jiiñamo carmelita ñano. ⁶ David tösaade cönä´jacä yaawä, täjuque töwäjötödöqueiñe, täämadä jäcä soto wadeuwödöcomo weijäcä, tameedä ñanno soto coneda cönä´jato, tönnacontoncomo jumnei; Yaawä David cänäjödutäi töwanadiiyo jääcä. ⁷ Yaawä David cänädöacä Abiatar wä, ñäädä sacerdote Ahimelec ne´dö: " Sacerdote womö eneecä ö´waadädä; quee." Yaawä Abiatar cönnejä David wadädä. ⁸ Yaawä David cönadeuwäi Wanaadi wä cönecammajoi, cönädöacä: " Töwewänätamo äwwä ajecajäcäiñe, ¿Ejoodöjaiñeca wanä?" Töwö Cajiichana cöne´cwajäacä cönädöacä: "Ee ajeecacäto, mejoodöatode, "Adääacomo mewanacatode yaawä, quee cönädöacä." ⁹ Mädääje David cönämatäi yaawä 600 co´mo tösotoi jadäiñe. Besor soodö de´cäi cönä´döicho, yäätä dhantai cäno´nomjoicho. ¹⁰ Yaawäne David mane mänseedäcä ajecadöcomooje cöntämä ñanno 400 co´mo dhanwacomo mane cönonomjoicho töquincha töweijäcäiñe Besor soodö iyäjaicha cönäjato. ¹¹ Wooi awä cönedantäicho dhanwa Egipto ñano, yaawä cönnejoto David wadädä; tuna yocödöje cuntuicho, yuudu mmaja cunntuicho dea cönäwashinchäi yaawä. ¹² Yaawä tönwanno cuntuicho dea hijos panje tödöajä tonichä yatocajödö, acä uva cä ejedödö mmaja. Tuwasuta cönäjacä ämiicanaadöje mmaja, aaduwawä anoto, aaduwawä coijaicho mmaja. Yaawä töwäwashinchäjeje töwö cönäjödutäi. ¹³ David cönädöacä chäwwä: ¿Änäcö jadoonoca amäädä?¿äshanno meene? töwö cönädöacä: " Ejipto ñano dhanwa äjömanö öwö, amalcita anonö öwö, aduuwawä anoto wa cädäichajödö määdäje yedaajä nänne etää. ¹⁴ Neguev iyä cereteos ñano ñaa cönwänätäi, Juda ñancoomo mmaja, Neguev Caleb ñano mmaja, Siclag ñano ñaa cönna´cwai yaawä. ¹⁵ David cönädöacä: "¿iiña adäjai maanö ñanno döiñaiñe? töwö cönädöacä" Wanaadi etöjoi äwäcamajäcä yema´da aweichojo, yeedhajäjödö´wä yuutu´da aweichojo mmaja, yööiñaiñe adhadäjaiñe wa, quee cönädöacä. ¹⁶ Yääñaiñe cänädöicho yaawä ñädä egipto ñano, yäätä ñanno cone´jöncomo cönäjato yämecantacoomo, töneijätö´jocomo ca wäwashinchänäje cönäjato töwocödöcomo enöödöje mmaja. ¹⁷ Yää anoto jonno yääjenammato coomomödö jona tödöene David cönwänätäicho. Tonichä änejeda cöneiyacä, ñanno 400 como äjömanamo mmane camello de´wä cönänejeicho. ¹⁸ David cönewanacaicho tameedä ñanno amalecita nadä´jocomo; anädäncädä töjimñantomo David cönewanacaicho yaawä. ¹⁹ Tamedädä cönewanacaicho, inshomadöcomo, iñacontoncomo mmaja, ñanno woodiñamo cä, dhanwacomo cä mmaja. Töwennacadawä David cönnejätöi tameedä chäwwäncomo jödö. ²⁰ Täcönöcomo mmaja cönadoicho dea, ñanno oveja, jaaca mmaja, ñanno dhanwacomo dhawajoiñe cöntatodö töcä´de cönecammato. Tönwanno cönädöato: "Edää iyää David newanacadö tönsomadö." ²¹ Yaawä David cöneejä Besor soodöña ñanno 200 coomo dhanwacomo yonomjo´como döiñaiñe töquincha töweijäcäiñe yäätä cönäjatodö. Ñanno dhanwacomo dhowajoiñe cöntonto töwojodödöcomo wetä David jaadä, sotoi chäjadä cönäjatodö jadäiñe mmaja. Yaawä töwojodöacäiñe cönadejaicho. ²² Yaawä ñanno conemjönöcomo David jaadä cönewonotoichodö cönädöato: "Canno dhanwacomo tä´da cöjadäiñe cöneiyato. Yääje yeijäcä dhäwäiñe tu´emjeda na cöncanacadöcomo, iyää mösooma. Töjiiñantoncoomo mma nadäiñato, tönnacontoncomo mmaja, nötäñato yaawä." ²³ Yaawä David cönädöacä: "Mädäjedane eijai caato jimmä, Cajiichana Wanaadi cöwwäiñe inchöödu jäcä. Tameedä cutudetännamo nadääjätö´como quichanacatodö, Töwö dea cädaichätäne ñanno conenjömcomo cöjajodöcomoqueiñe. ²⁴ ¿Änäcö mädääje awa´deuwödöcomo anetadö deade? Canno cönsomadöcomo edaichä´namojödö wääiñe utuudu tujunnena cöncanacadöcomo, töweewänötamojödö nöngeiñe dea; Mädääje dea nödöatode tonwanno. ²⁵ "Mädääje David wanontänä cönnöi, wätäsetotojo Israel ña eduuwa joona tödöene tödöene mädääje na. ²⁶ Siclag ña David wä´döajäca, töwö cönadojoi täjemjönö töncanacadöcomo töjimmä inchoncomo Judañancomo wadädäiñe, edääje töwädöancädä: "Edää iyä täjemjönö awwäiñe ñaa nutuudu Cajiichana tudetännamo wännoiñe ñaa nichanacajödö; quee." ²⁷ Betel ñancomo inchoncomo wadädä mmaja cönadojoi chea, Ramot ña mmaja, iyää Negueg ñano jata, Jatir ña mmaja, ²⁸ Aroer, Sifmot, Estemoa ñancomo wadädä mmaja. ²⁹ Töwö cönadojoichea Racal ñancomo inchoncomo wadädä, Jerameelitas, Quenitas ñancomo wadädä mmaja. ³⁰ Ñanno wadädäiñe mmaja Horma ñancomo, Corasán ñancomo, Atac ñancomo mmaja. ³¹ Hebron ña inchoncomo cönäjatodö wadädäiñe mmaja, töwö David cönadäjojätöi tösotoi jadaiñe töweijödö wadäi.