Capítulo 7 - Jliaji IMINALRITI lrinaitjaca matsia
1
Pjia IMINALRITI no-Diote, icatsa pinacojle nodawacawa. Pimanacota njoa naoya pjiomi njaji ipinetacape njoa. ¡Piyomjeta njoa!
2
Piyomjeta njoa naoya wade njepaca njoa cayoji yawi jipa capisho lriwini njite corrinatsantja coca iyomjte njoa naoya.
3
Pjia IMINALRITI no-Diote, nocaite pjia iacoti ajádalri sho corrica nonaitja pada matsidalri, corrin norsoca matsicalri nanaco njaji mayamperrimi.
4
Jliaji nokitsindaji matsi lrinaitjaca norso njite corrin nomaca nocoadawa lriinai. Nomaodaca lrioya jliaji iajicada pia ipineta njoa.
5
Mitsa noma pia cada nocoadawa naoya njaji nocoema panayantja napjoaca njoanjite cacocantjana maatsi nonaco panaya. Selah
6
¡Pjinicoa pirroa lrico, Pjia IMINALRITI! Picañjata pirroa, ima kerroaca pekirritsa njaji nocoema. Picada pimatsiaca nonacojle.
7
Niniotsa pada picadacawaotsa njerrapitaca njaji inaiki jalredaoca lricoperri; Nawacaaca caotsawa piwaida naco. Niini panaya pitalricanata tsenakja nanacojle padenirri.
8
Pjia IMINALRITI, picaite naacona njaji jalredaoca lricoperri, ima corritsa coca nomatsicana, cotsa coca jliaji nonaitjalri maatsi, Pjia yenorsedalri pja pjiomi ioya.
9
ajena picadaa nanaitjaca maatsi njaji inaiki matsiperri, pikitsindata jliaji matsiadalri pirso. Ima matsiadalrica pjia njite lrioma lricapa matsia wawaopiakje lrico pjiomi cocaca njaji wawaopialri.
10
Dio iwapaca njoa ima Lriwapaca njaji matsiaperri icaolre ricó.
11
Icaitecadaca ajádalri sho njaji imatsicanati, caidalritsa lricaiteca naacona njaji matsiperri.
12
Corri cadaotsa lripadameta lriwaopiakje lrimatsicana ioya jliaji inaitjaca lrimatsicanawa, Dio imatsietacaotsa lrinoaca shopa lrikjoete.
13
Dio iwapaketsa lrinoaca shopa lrinícarro jliaji inaiki matsidalri; kerraperrica tiyé sho njaji lriyawitjioco.
14
Picapa coajica lrinaitjaca jidati jliaji inaiki matsidalri lrinaitjácarro imatsicanati, lrinaitja lrimatsicanawa njite catjina lrirso lrishaa.
15
Njawacatsa idia jiwawa naowepi rico njaji njaji inaitjacapeni pada ipiawalre tja.
16
Pjiomi njaji matsirri nawaopialri nanaitjaca apjetsida ikjoete nadia watsa nanacojle tsenakja.
17
Noa matsiadalri Dio irso ima matsiadalricani. Nocantacaotsa salmo nocaitécarro matsiadalri IMINALRITI ípitana naco, jliaji Yenonshedalri pja pjiomi ioya.