¹ Njite nocaite: ''Nonaitja watsa jidati wade nonaitjaca nomatsica noenen sho.''Noitaotsa nonoma kjaida wade caacoca njoa noema cádanaco atsia matsidalritsa iwaopiakje ipeyajle.'' ² Macotsa njoa; nonaitjatsa cayoji nocaite capisho matsiaperri cadana tjatsa njaji yácoti nomalri nocaiteca, njite caiwi cayao pja noaji jliaji caiwídalri norsolri nonaco. ³ Njite matsina noajiacacawa nowaopia cádanaco nanaco, tiye imjaita capisho noaji nowawa lrico. Niini caacoca njoa. ⁴ No-Minalri, picadaa noaji coancaojli watsa mayami njoa, a kjerrecaotsa njonana iocawa. Picadaa noaji coancaojli caotsa mayamiotsa njoa. ⁵ Picapa, medatsa picadaa njonana jalredaoca lrico, njite corritsa cocaca jliaji nocafica Pipeyajle. Caolritsa nacoana njaji inaiki jalredaoca lrico. ⁶ Ajádalri, itamana shocatsa najicawa njaji inaiki cafi cádanacona. Njaji inaiki nakjeyapita nawaketá-carro aima nayarroa corri cadana nají cocacaotsa jipa naoyana mayami cádanacoenana. ⁷ Panaya no-Minalri, ¿Cocao jliaji nowapalri? Ima icamitsa Pjia jliaji nowapalri inakjoite matsiadalri. ⁸ Piyomjeta njoa nomatsicana ioya; mamenatatsa njoa nainai njaji matsilriperrimi inaitjacape imatsicana. ⁹ Maco capoa njoa, corrin notaita nomjecoca nonoma caacó-carro njoa, ima Pjia catsa jliaji jirrapitetalri njoa. ¹⁰ Ajema pimatsiketaca njoa; ima mjaidaketsa njoa Pinoetacawa njoa Pjiida sho. ¹¹ Pjirrapiteta cádanaco njai inaiki namatsicana ima, Pioma pjitaca naoya pjiomi njaji imatsicanati narsolri cayoji wepji iñja capisho jaico jirico lrico; ajádalritsa corrica cocaca njaji inaiki, icamitsa itacati sho catsana. ¹² No-Minalri, Pjimi njaji notatjalri piinai, pjimica norso; Pjimica coajica noiyaca icaiyati ima. Maitatsa pjinacolrico noya, ima cayoca njoa apada capishotsa inaiki Pioya, pada iocacadatsa iofa napecolrico njaji apanatsa inaiki cayoji nacayosho pia njaji noferrinaipemi oopi. ¹³ Picapa tsenakja noikjaolre, nocácarro tsenakja mayamica ipjeya njoa.