¹ Pjia nirrí, mamaodacatsa noaco ioya njite pimatsieta picaolre ricó coajica nocanantaca pjia, ² ima nacadotsa pirso aima jalredaoca, aima walria watsa piofacawa jalredaoca lrico njite pimaodaca caotsa piofacawa. ³ Mamacatsa jliaji yacoti inaitjanda iapiya waca, pipapini piwedarico, pidanani picaolre ricó. ⁴ Njitenaotsa pioketa watsa matsiadalri Dios inai njite inaiki inai tsakja. ⁵ Picada picaolreo wa-Minalri inaco njite corrin pianjikeshowaca naco; ⁶ picada piomi njaji pidenjicalre Dios inaco njite lricadawatsa piowawatsa matsia. ⁷ mawaopiatsa pianjipaca apjetsida yoya,pifio wa-Minalri iwana njite pjienitaca matsidalri ioya. ⁸ Ima tapecaotsani pidaki irso njite matsiawatsa pidada irson cainji matsia capisho padada yanjiaca capisho paiñja cayami. ⁹ Pinaitja matsia norso nasho njajĩ pirsojĩ cacoadaperri njite nasho tsakja njajĩ pipania iinaka pinitajĩ piniwaca, ¹⁰ Njite pakjamiwatsa caidalritsa picadacawa piñjaope njite pirraope tsakja jaico tjeda walrijaipe sho. ¹¹ Noenipe, mamacoadatsa jliajĩ wa-Minalri icanantashoda njite mamacoadatsa lrioya jliajĩ coajĩca jlirrapiteta pjia. ¹² Nini jliajĩ wa-Minalri jirrapitetaca pjiomi njajĩ lripeyonjipe, caiji pada jinirriti jirrapitetaca capisho lrienipe lriomanda. ¹³ Catimawatsa jliajĩ ioketacada lrianjikjeo, lriajĩ tsakjaotsa coajĩcaotsa lridejĩca. ¹⁴ Jliajĩ yanjikjeti pirsolrina cacoadadalri pjacani palrata ioya njite cacoadadalri pjacani owirso ioya tsakja. ¹⁵ Jliajĩ yajĩkjeti cacoadadalri pjaca naoya njajĩ icapirroti njite cacoadadalri pjaca naoya naji piomajĩ. ¹⁶ Njite jliajĩ yanjikjeti lricada watsa wiaa piofacawa jalredaoca lrico njite lricadawatsa aima cacoadape pinaniwa njite caconadalricaotsa pjia naikjaote. ¹⁷ Nini matsiaminitsa pjiomi jliajĩ pinaitjalri njite namaodaca caotsa pjiomi naikjaote njajĩ pinaitjaji. ¹⁸ Jliajĩ yanjikjeti caicaniajĩ apana jaico iacada pacaficao naiñja capoa lrinaca, njajĩ irsocapeni catima naofacawa. ¹⁹ Canjikjedalrica jliajĩ wa-Minalri lrinaitja jliajĩ jipai, lriajĩcapoa lrinaita njajĩ eeno icoma, ²⁰ ima lriajĩkje sho jlienita naoiawaca njajĩ tjewacalrepe njite njajĩ iyadaoca nacada tiñajli jiwacao. ²¹ Nirri, picapawatsa matsia jliajĩ pinaitalri njite piwopia matsia nanaco njajĩ pinaitalri. ²² Pinaitja capoa watsa cayo pirso watsa jaalripa jalredaoca njite njajĩ apetsida nacapawatsa naicawa pjia. ²³ Nini pimaodaca watsa pianjĩcawa njite corriwatsa pioketa maatsidalri, ²⁴ picoa cadanaco watsa, corriwatsa pifiocao pimaodacawatsa pimaaca. ²⁵ Corriwatsa jirrapitaca caijĩ inaiki matsiperri sho. ²⁶ Ima wa- Minalri caotsa pinai njite lriwapaotsa pjia wadee pjiwacawa owepi rico nacadanda pipia. ²⁷ Pitaitacada pinaitaca matsiacalri apada irso pinaitan. ²⁸ Macaitetsa picodapidalri irso, cayoji: ''Corri notata panaya, tjewaotsa pino"; pirso cadanatsa palrata pinacoa. ²⁹ Manaitjatsa piwaopiakje matsidalritsa picodapidalri ikjoete jliaji icadacada icaolre pinaco. ³⁰ Macoitacatsa apada iapaya mikjapantsa corricadanatsa lrinaita pirso matsi ³¹ Mamatsicatsa picapa apada irso njite manaitjatsa caijĩ lricayosho. ³² Ima corrin Dios ioma njajĩ inaiki matsidalri iwaopiakje, mitsa Dios ikitsindajĩca jliajĩ atsia ajadalridalri. ³³ Matsi Dios icapa njajĩ inaiki matsiperri, mitsa lrikitsindata naofacawa matsia njajĩ inaiki matsiaperri. ³⁴ Lricaa naicao njajĩ icacape apetsida icao, mitsa lrikitsindata njajĩ kjenaperri iwaopiakje. ³⁵ Njajĩ inaiki icacoadatacape apjetsida nacacoadata tsakjana, mitsa njajĩ inaiki manjicaperri namacoadata tsakjana.