¹ Njaji yacoti Salomón icaiteji, David irri, Israel italricanaa. ² Njaji lricaiteji icatsa njaji lri cananta shopa yajikjeti naco njite pajishopa coanca paofacawa matsia, njite lricanantacarro yacoti jirrapitinaperri pajica inaco, ³ wataitanji fépaca wanacoa wanaitacarro matsia, matsiadalri tsakja, njite ikitsidatacada tsakja pja. ⁴ Icatsa njaji lricaitenji tsakja lricadacarro yajikjeti narso njaji marsocapetoa yanjikjeti, njite lricadacarro yajikjeti nite iyeecati narso njaji yempetipe toa. ⁵ Jliaji yajicada jlimiotsa lricao niini lrirso pjacaotsa lriajikje; njite jliaji cayecadalri lrirso pjaotsa lriyekja jlimi capoa lriicao njaji yacoti. ⁶ Najiotsa njemican coanshopaca njaji inaiki jliaji yacoti lricanantashopana, njaji yacoti comparación shoperri; nacanantalri inaco njaji cajikjeperri caaco cádanacona yacoti pajishopa shoperritsa inaco. ⁷ Njaji iomacape isroca yanjikjeti nasrotsa nafioca Dios iwana njite njaji manjicaperri namacoadataca jliaji yanjikjeti njite jliaji nacanantalriinaco. ⁸ Noenipe, pjimi jliaji pjinirri icanantalri pjia inaco, njite mamacoadatatsa njaji pjidoa inaalri pjinaitaca ⁹ Njaji yanjikjeti nanaitja watsa aima matsiaperri pjiwida irso cayoji corona pjeetanda pjewida nacó, njite cayoji patjepi matsiaperri sho tsakja ¹⁰ Noenipe, camatsicanaperri inaa cada pinaitjaca cayoji nacayosho, mjepatsana, macadatsa nacashata pjia. ¹¹ Nacaite cada pirso: ''pino wainai wainocarro inaiki mikjapantsa, njaji mamatsicanaperritsa ¹² Wadawaotsana jiipai rico cafitsana, waorrocoetaotsana irrirri ricó-jlena naofacawa lrico njaji mayamperrimi. ¹³ Waoketawatsa aima nayarroanje cacoadaperri fewa cadanaco napanalrico, wapakjantaotsa waapana nayarroajipem sho wañaitoji apjetsida iooya. ¹⁴ Pioma cadaa matsica pjia pinoena wainai ima pjiomi fa fepacaotsa pacowaca njajii fetaji naoya. ¹⁵ Noenipe, maatsa nainai naapowa lrico, manaitjatsa cayoji nanaitja capisho, ¹⁶ kjeya nanaitjaca namatsicanao niini naaca naino inaiki. ¹⁷ Mikjapantsa panaitjaca pjepashoda wipiarro nacapacadanatsa. ¹⁸ Njaji inaiki nanaitja maatsi narsowao, njawacatsa inaitja narsowao naowepiwa jlipá-carrona. ¹⁹ Cayotsa nawayacacawa njaji inaiki ikemicape apana iyaarro, ²⁰ Jliaji yaanjiketi lricada najicani pjiomi inipolrico, cacoca kjaidani yacalrecoa lrico ²¹ inipo inomana lrico, aimacawa inaiki kjemaperri iofacawa lriwana naicalre, njite yaacalre ipananoma natatjacawa lrico. ²² ¿Sha majicaperri coancaojli watsa yaami ipeyoca imajican, njite coancaolri watsa yaami icatimatatacawa imajican ima, njite coancaojli watsa yaami imacoadataca yanjikjeti sha mawaopiakjé-perrimi.? ²³ Piwapa pjimi matsia coajica nocaiteca pjia, nocadawatsa pianji coamica pjiwaopiakje, nocada watsa pianji njaji yacoti piomalri pianjica inaco. ²⁴ Noinai tja sha, nowanatja sha mitsa corrin jimica nosro. ²⁵ Corrin ioma jimica coajica nocaiteca sha, noma tja nocanantaca sha mitsa imacoadata noaco. ²⁶ Niini nocaa watsa icao jirrapjita cádanacoena, nocawatsa icao cafainadari inocadanaco ikjaolre. ²⁷ Liocacadanaco inaco jliaji ifionda ikjoete, njite matsicalri jipa cádanacoatsa sha cayoji caolri kjaidadalri jiwacapisho panaco kjeyanadatsa. ²⁸ Nininaotsa nawana noikjaolre, mitsa corri watsa njomica narso, naomaotsa njoa, mitsa corriotsa naoketácarroca njoa, ²⁹ ima maatsica nacapaca lrirso jliaji yaanjiketi njite corrin nafio lriwana jliaji wa-Minalri, ³⁰ corrin njémica jliaji nocaiterri njite namacoadataca pjiomi jliaji matsiadalri nocantashopana. ³¹ Niini njawacatsa icaoña nanaitjanda ikjaote, ima pakjamicana namatsicana sho. ³² Nainocaotsa njaji majicaperri namajican ima, njite nainocaotsa njaji maashilriperrin namaodaca capoatsa naofacawa nacoema ikjoete. ³³ Mitsa jliaji jimicada norso lriofa watsa lrimawadacatsa noinai njite liwafetacaotsa mafiocanatsa lrioya jliaji cafainadaleri.