¹ Njaji yacoti Nehemia ikaitenipe, jliaji Hacalia irri. Cayo pia jliyapacawa Quisleu-pi naco, vente waalria naco, aakadanacon yakaalre Susan lrico, jliaji yacaalre kadaana dalri taimi dalri ² naocalri nirse apada nanacoite naji nowenaipe, Hanani dalri iipitana, lridee lriinai apepena nanacjoite njaji Judá lricoperri, njitee notatja njomiona nanaco njaji judionai ipitocapem pjia njiteo, njite nanaco tsacja njaji namacanipem niini, njite Jerosalen nacó tsacja. ³ Njite naaco norso: ''Njaji inaiki manacoperrin presocalri ioya lri ricoda dalri jiipaica, aima matsicalri nanaco njite corritsa matsiacana, ima opica napeco jliwao jliaji yacaalre Jerosalen idana njite namjaita tsacja lripananomam.'' ⁴ Niini njomi cádanacotsa njaji yacoti, icaamitsa noofa noaiya, njite aima jalredaoca inonaaca njoa, mainjacaca njoa, njite notatja lriinai jliaji Dio eenolricojlé dalri. ⁵ Noaco lriso: ''Icatsa pjia no Minalri, Dio eenolricojle dalri, pjia Dio kjaidádalri, inaitacaita pjiomi, Pjiatsa jliaji imatsietacada njaji iacoti corridalritsa coca itaita jienitacani lrinaco jliaji ipeyokjeti pirsolri nakjoete njaji ipeyocape pjia, njite njaji jiepacaperri piaco. ⁶ Pjimi njaji notatjalri piinai njite pimjeco njaji pitji, pitaita carro pjimica jliaji pirsodalri itatjalri pinai, jliaji iemalri pipeyajle lritatja carro deepi rico jalrewe rico tsacja nanaco njaji aimadani pirsoperri Iraelnai. Nocaiteca na matsicana njaji aimadani Iraelnai, ima wanaitjaca maatsi pirso. Pjiomi faa, njoa, njite njaji njonirri iipaneta wanaitja wamatsicanawa pipeyajle. ⁷ Maatsitsa wanaitjaca picjoete njite corrin feepaca njaji yacoti pinaalri feepaca, njaji yacoti icaitecape coanca panaitjaca matsia, njaji icadaalri paofacawa cayecjatsa, njaji yacoti picadaji pirsodalri Moise irso. ⁸ Pinaitja matsiacalri, piwaopia nanaco njaji yacoti pinaalri pirsodalri Moise inaitjá carro. Ima lricaiteca, ''pinaitja cadaa maatsi, nocadaotsa nadeeca jia padapena pada jiipai nacojle, ⁹ mitsa idiá cada ioma Njoa, njite ioma irsowao noaco inaitja carro cayoji noaco icaite caoisho, teeco cadantja jia akjerre cawajle catsa jalredaoca lrico, No niwa caotsa njite jia, No dietá carro jia atsaji nocadaalri iofa niinio, niini carrotsa noipitana iofawa caidalritsa.'' ¹⁰ Njite, pirsoperrica njaa, pinaikite aimadanca nja, njaji Pidietaji pirsowaona picaapi cjaidá dalri sho. ¹¹ No Minalri, notatjaca piinai caiwi ricotsa, pjimica njaji notatjalri piinai, njoa pirsodalri njite jliaji natatjalri piinai njaji pirsoperri, njaji matsiaperri ianjiacacawa napeyo capoa pjia. Panaya, picadaa matsiaperri pirsodalri irso njite picaotsa kjenaaca lricapaca njoa jliaji atsia.''No denji piaca talricanaati irso irracada lripjeya lrirraoda.''