¹ Njaji yácoti wa-Minalri icaiterri Irael irsó Malaquía nakjoite. ² ''Nopeyonipeca shá,'' lriaco jliaji IMINALRITI. Mitsa icaitenakja cayoji: ''¿Coajio piyoca fa?'' ''¿Capja piají Esaú iwerrica Jacob?'' Njite cayotsa IMINALRITI shepana. ''Nopeyo mini catoa jliaji Jacob,'' ³ mitsa corrin matsia Nocapaca Esau irso. Nomatsikjeta njaji awacadaa jlipaite ricope niini maminalri cana, njite nocadaa jalrapocolrí-carro maminalrinaadalri jliaji njepaite yamapoipoi iyacalrewa.'' ⁴ Edom icaite cadaa: ''Oopi njaama fá, mitsa ferreta tsenakja jliaji wayacalre namatsiketanda waoya,'' Njite jliaji tsolrodaonai aimadan ITALRICANA icaite: ''Nataita njerretaca jliaji nayacare namatsicanda pia naoya, mitsa Nodiá tsenakjaotsa nopeeco naoya. Njaji apaana inaiki nanji jliaji yacaalre: ''Imatsicanaati iyacalrecan'' njite ''Njaji inaiki Dio icaiteji inaco maatsitsa caidalriwenatsa.'' ⁵ Jiwaca tsaotsa icapa jliaji Nocaiterri itjí shó, njite icaiteotsa cayoji: ''Macádalri pjaaca jliaji IMINALRITI Iraelnai jipaite ioya.''' ⁶ Jliaji pada yénipe lrinaitja matsia jlinirri irso, njite jliaji pada irsodalri lrinaitja matsia lriminalri irso. Njite Njoa, Jinirriti cadaa Njoa, ¿Coada corrin inaitja Norso matsia? Njite Iminalri cadaa Njoa, ¿Coada corrin icoanjawa Nopeyajle?'' lricaiteca jliaji tsolrodaonai aimadan ITALRICANA narso njaji sacerdotenai, njaji imenatalri noipitana. ''Mitsa icaiteca cayoji: ''¿Coajio wamenata piipitana?'' ⁷ Idee cádanaco iñjaodati maatsi-perriminatsa no-altarni nacojle. Njite icaiteca: ''¿Coaji tsakjao wama maatsica pjia?'' Icaite cádanaco corri catsa coadaca IMINALRITI i-altarni.'' ⁸ ''Ino cádanaco Norso maaficalri matji perrimi, ¿capja corrica maatsi jliaji inaitjalri? Njite ino cádanaco maaficalri pokjom perrimi, cayamikjé perrimi, ¿capja corrica maatsi jliaji inaitjalri? Ideetja narso njaji talricanaatinai iwapa cape shá, ¿capjaotsa lricoadata caotsa ioya lrikitsindatá-carro shá lrikjaote?'' lriaco jliaji tsolrodaonai aimadan ITALRICANA. ⁹ Panaya jliaji, ioma pjena irsowao Dio, wadetsantja kjenaaca Lricapaca irso. Idee cadaa Norso njaji ofrenda inoji Norso corri-perritsa matsiacana, ¿coanjintja Nokitsindataca shá? ¹⁰ ¡Noma-tja niinica apada inakjoite ítacada jliaji panti macade ipananoma, wadee iwaca catoa tiyé altar nacó mikjapantsa! Corrinatsa matsia Nocapaca jliaji inaitjalri,'' lriaco jliaji tsolrodaonai aimadan ITALRICANA, ''njite corrinatsa nocoadatá-carroca pada ofrenda idenda Norso. ¹¹ Ima jérri imotocatsawa atee lriá jliewawa, matsia watsa nanaitjaca Norso njaji apana inaiki jalredaoca lricoperri njite njaji inaiki nayacalre ricó namjaita watsa Norso incienso, naa tskjaotsa ofrenda matsiaperri nashopa Norso matsiadalri. Matsia watsa nanaitjaca Norso njaji apana inaiki jalredaoca lricoperri,'' lriaco jliaji tsolrodaonai aimadan ITALRICANA, ¹² ''Mitsa shá inaitjaca maatsi icaite capoa maatsidalri catsa jliaji IMINALRITI imesani, niini imenataca njaji ipania iinaca njite maaficalri iipe. ¹³ Icaite tsakja cayoji: ''Oopina lrimapjita fa jliaji, icaamitsa imenataca Njoa,'' lriaco jliaji tsolrodaonai aimadan ITALRICANA. ''Idee mana njaji maaficalri yawi ínoji, njite idee njaji maaficalri pokjomperri njite iyamicada; icatsa njaji iderri ofrendawa. ¿Coadantja Nocoadata ioya njaji cayoperri?'' lriaco jliaji TALRICANAATI. ¹⁴ ''Maatsidalrica jliaji cashadalrim, lrirso cadanatsa apana maaficalri atsiana matsiani tsa lrípirra njite lricaite yácoti ajádalri sho lricadaaca Norsoni, mitsa lriinoca Norso, Njoá lri-Minalri, ¡apana maaficalri maatsine tsa! Ima Talricanaati Kjaidádalrica Njoa,'' lriaco jliaji tsolrodaonai aimadan ITALRICANA, ''njite naa watsa matsiadalri Notrso njaji apanatsa inaiki jalredaoca lricoperri.''