¹ Siete keerri icoa lriofaacao jliaji wa Minalri iarcan njepaite ricó njaji filisteonai. ² Njite njaji Filisteonai nawana njaji sacerdotenai, nja tsacja njaji inoparrotacaperri; naaco nasho: ''¿Coan wanaitjaca lriapiya jliaji Dio iarcan? Icaite femi coan cantja wanaitjaca wadietá carron lriyacalre ricojle.'' ³ Njaji sacerdotenai njite njaji inoparrotacape naaco nasho; ''Imeenaca cadaotsa lridia jliaji arca na Diute iyada njaji Iraelnai, ishotsa imeenacaca ofrenda Dio isho, imatsicana icjaote, icapá carroatsa matsiaca jia ipoati iuya, njite icapa tsacjaotsa coadaca corripia yaami jlirrapiteetaca fa panajietetoa.'' ⁴ Njite naaco nasho: ''¿Coandalrintja ofrenda wataita wameenacaca wa matsicana icjaote wadieta cadanaco jliaji arca?'' Njite njeepana: ''Imeenacaotsa cinco icolronti jinaana uwirrodape, cinco tsacja jiirri owirrodape, cinco namaimaca pjiomi ima cincoca namaimaca njaji filisteonai italricanaa. Njenaapjiamtsa njaji imatsikeetalri jia njite njaji iwapacaperri fáa. ⁵ Niini, ishotsa inaitjaca icolronti jinaapjiam, jiirrí jinapjiam tsacja njaji imatsikeetalri njaji inaiki, njite ishota iaca matsiadalri Iraelitanai Diote isho. Wadetsantja jlitaca Lricaapi iuya, idiute iuya njite jipaite iuya tsacja. ⁶ ¿Cuadantja itarrata icaolre nacayosho njaji egpcionai njite Faraón sho tsacja? Iraelitanai iDiote jirrapiteta caojlipiana; ¿Capja iwaada naifarrocatsana wadentja naaca naoya? ⁷ Panaya inaitja pada carreta walridalri, njite ioma yaamana vaaca ishocape ienipe tsonepe toa, corripetoa nacadaa idenji jiipai isho. Ipapiotsa nanaco jliaji carreta, mitsa njaji neenipe ideotsa teeco njadoana ioya na. ⁸ Njite jipaotsa iorrocoeta carreta ricó jliaji Dio iarcan. Njite lricodapitsa icadaotsa njaji ofrenda owirrodape jietaji pada caja ricó imeenacalri imatsicanaa icjaote. Inaitja caami pjiomi icadaotsa naawa inipolrico. ⁹ Iwaopaotsa icapa matsia, lrirricoda cadatsa lriawa jliaji inipo iacada jlipaite ricojle Bet Semes ricó, njiteotsa ianjíi Dio cadaa jliaji inaitalri isho maatsi. Mitsa cai carron cadaatsa, ianjii watsa corricatsa jliaca; jiyapacadam catsawa jliaji ipoati.'' ¹⁰ Njaji atsianai nanaitja cayoji nacaite capisho nasho; njepa yamana vaaca ishocape ienipe tsonipe toa, napapi nanaco jliaji carreta njite nja neenipe nacadaana corrarra lrico panti ricó. ¹¹ Nacadaa Dio arcan carreta ricó, njite lricodapitsa nacadaa caja ricó njaji jiirri owirrodape njite njaji icolronti jinaapjiam owirrodape tsacja. ¹² Nja vaaca naawa mayacan inipó ricó iacada Bet Semes ricojle. Jliaji inipo naalri irricoda lriorrocowa, mitsa njaji maaficalri corri njeenawa inipo iuya, naacatsa mayacanwa. Njaji talricanaati filisteonai napinietana teeco Bet Semes inomapi ricojle. ¹³ Njaji inaiki Bet Semes ricope naniwaca trigo iecje nakinkerre pacuacaitacaawa ricó, Niini njerreta cádanaco nacapa, nacapa jliaji arca, njite catiimana peikirritsa. ¹⁴ Jliaji carreta lrino Bet Semes ricjoite njite jliaewao Josué jipaite ricó, niinitsa lrioca lrirroa, nincawa jiipada macani, nakejloá jliaji carreta nanaitjanda jaico shotsa, njite namjaita nja waaca ofrendao Dio isho. ¹⁵ Njite njaji Levitanai naorrocoeta Dio iarcan, njite naorrocoeta tsacja jli caja, naarona njaji owirrodape, njite nacadana jiipada macani naco. Njaji atsianai Bet Semes ricope namjaita njite naino tsacja maaficalri Dio isho jliadatsa jecoapi. ¹⁶ Njaji cincodee talricanatinai Filisteonai nacapa cádanaco coanca, nadiawa jliadatsa Ecrón ricojle. ¹⁷ Icapiatsa njaji icolroti jinapjiam owirrodape nampe njaji Filisteonai Dio isho namatsicanaa icjaote; pada Asdod iipitana nacó, pada Gaza iipitana nacó, pada Ascalón iipitana nacó, pada Gat iipitana nacó njite pada Ecrón iipitana nacó. ¹⁸ Njite njaji jiirri imaimaca, namaimaca shotsa njaji Filisteonai iyacalre natalricanata caawa ricó njaji cinco talricanaatinai, njaji yacaalre taimí perri idaana njite pjiomi njaji yacalreewape ninperri. Jliaji jiipada macani nacadaalri pia inaco jliaji Dio iarcan, nincatsan panajiete ima icatsa jliaji icapalri coan piaca jliadaa pia jecoapi jlipaite naco jliaji Bet Semita Josùe. ¹⁹ Dio imatsikeeta njaji atsianai Bet Semes ricope, nacapa capoa Lriarcan iwawa lrico. Niini mayamica cincuenta mil setenta atsianai. Jorre naiyacana njaji inaiki Dio icadaa capoa mayamicana. ²⁰ Njaji atsianai Bet Semes ricope Naaco: ''¿Cocaotsa pa itaita iemawa wa Minalri ipjeyajle, jliaji Dio mamatsicanaadalritsa? Coca icjaolreotsa wameenaca jliaji arca ajaiteji?'' ²¹ Niini nameenaca ideecaperri iacoti naicjaolre njaji inaiki Quiriat Jearim ricope, naaco cayo: ''Oopi Filisteonai idieta wa Minalri iarcan; ino iorrocoetani ideecarron icjaolre.''