¹ Escribe ao anxo da igrexa en Éfeso: o que ten as sete estrelas na súa man dereita, o que anda entre os sete candeeiros de ouro, di esto: ² Sei das túas obras, o teu cansanzo e a túa perseveranza, e que non podes aturar aos malos, e puxeches a proba aos que se chaman apóstolos e non son tal, e topáchelos mentireiros. ³ Tes perseveranza, e aturaches moito por mor do meu nome e non desfaleceches. ⁴ Mais teño esto na túa contra: que deixachelo teu primeiro amor. ⁵ Lembra, pois, de onde foi que caíches e arrepíntete, e fai as obras que fixeches ao principio; se non virei a ti e quitarei o teu candeeiro do seu sitio, a non ser que te arrepintas. ⁶ Por outra banda tes isto, que aborreces as obras dos nicolaítas, obras que eu tamén aborrezo. ⁷ O que ten oído, oia o que o Espírito di ás igrexas. Ao vencedor dareille a comer da árbore da vida, que está no paraíso de Deus. ⁸ Escribe ao anxo da igrexa en Esmirna: O primeiro e o derradeiro, o que estivo morto e voltou á vida, di isto: ⁹ Eu sei do teu padecemento e a túa pobreza (mais es rico), e a blasfemia dos que se din ser xudeus e non son tal, senón sinagoga de Satanás. ¹⁰ Non temas o que estás por sufrir. Velaí o diaño botará a algún de vós na cadea para serdes probados, e teredes padecemento por dez días. Sé fiel ata a morte, e Eu dareiche a coroa da vida. ¹¹ O que ten oído, oia o que o Espírito di ás igrexas. O vencedor non sufrirá dano da morte segunda. ¹² Escribe ao anxo da igrexa en Pérgamo: O que ten a espada aguda de dous gumes, di isto: ¹³ Eu sei onde moras, onde está o trono de Satanás. Gardas fielmente o meu nome e non negaches a miña fe, aínda nos días de Antipas, miña testemuña fiel, que foi morto entre vós, onde mora Satanás. ¹⁴ Pero teño na túa contra unhas poucas cousas, porque tes aí aos que manteñen a doutrina de Balaam, que ensinaba a Balac a poñer atranco ante os fillos de Israel, a comer cousas sacrificadas aos ídolos e a fornicar. ^{(inmoralidade sexual, practicar idolatría) 15} Mesmo tes tamén algúns que sosteñen a doutrina dos nicolaítas. ¹⁶ Polo tanto, arrepíntete; se non, virei a ti axiña e pelexarei contra eles coa espada da miña boca. ¹⁷ O que ten oído, oia o que o Espírito di ás igrexas. Ao vencedor dareille do maná agochado e dareille unha pedriña branca, e gravado na pedriña un novo nome, que ninguén coñece senón o que o recibe. ¹⁸ Escribe ao anxo da igrexa en Tiatira: o Fillo de Deus, que ten ollos como chamas de lume, e os seus pés son semellantes ao bronce lustrado, di isto: ¹⁹ Eu sei das túas obras, o teu amor, a túa fe, o teu servizo e a túa perseveranza, e que as túas recentes obras son maiores que as primeiras. ²⁰ Pero esto na túa contra: que admites a esa muller Xezabel, que se di ser profetisa, e ensina e seduce aos meus servos a que cometan actos inmorais e coman das cousas sacrificadas aos ídolos. ²¹ Deille tempo para arrepentirse, e non quere arrepentirse da súa inmoralidade. ²² Velaí a boto na cama, e en gran padecemento aos que adulteran con ela, a non ser que se arrepintan das obras dela. ²³ E aos seus fillos matarei con mala morte, e todas as igrexas coñecerán que Eu son o que escudriño o máis profundo das mentes e dos corazóns, e dareivos conforme cadansúas obras. ²⁴ Pero a vós, aos demáis que están en Tiatira, aos que non teñen esta doutrina, que non ceñeceron as cousas profundas de Satanás, como lles chaman eles, dígovos: non vos impoño outra carga. ²⁵ Así e todo, o que tendes, retédeo ata que eu veña. ²⁶ E ao vencedor, ao que garda as miñas obras ata a fin, dareille autoridade sobre as nacións; ²⁷ e ha pastorear con vara de ferro, coma os vasos do oleiro son feitos anacos, como eu tamén recibín do meu Pai; ²⁸ e dareille a estrela da mañá. ²⁹ O que ten oído, oia o que o Espírito di ás igrexas.