¹ على جال هاذا الشيء الله مدلنا هاذي الخدمة ـبالرحمة تاعوـ مالا ما نفشلوش, ² بالعكس رفضنا كل تصرف مخبي و يحّشم, و ما مشيناش بالحيلة, و ما حرفناش كلمة الله, بالصح ظهّرنا الحق, و علِّينا قدرنا في ضمير الناس الكل قدام الله. ³ بالصح اذا كان الانجيل تاعنا مكتوم, يكون مكتوم برك عند الهالكين, ⁴ عند غير المومنين اللي الاله تاع هاذا الزمان عمى البصيرة تاعهم, باه ما يشوفوش النور اللي يضوي, النور تاع انجيل مجد المسيح, اللي هو تصويرة الله بالذات. ⁵ احنا ماناش قاعدين نبشروا بأرواحنا احنا نبشروا بالمسيح يسوع رب, و رانا غير الخدامين تاعكم على جال يسوع. ⁶ على خاطر الله اللي قال: "من الظلمة يخرج النور", هو اللي ضوى في قلوبنا, باه تشرق معرفة مجد الله اللي في وجه يسوع المسيح. ⁷ بالصح عندنا هاذا الكنز في ماعون فخّار, باه تكون القوة اللي فينا من فضل الله مش منا احنا. ⁸ تضياق علينا من الجوانب الكل, بالصح ما نتدمروش. نحيروا في امورنا واش نديروا, بالصح ما نيأسوش. ⁹ الناس يضطهدونا, بالصح الله ما يخليناش. نطيحوا في لرض, بالصح ما نموتوش. ¹⁰ في كل وقت هازين الموت تاع المسيح في اجسامنا, باه تظهر فينا ثاني حياة المسيح في اجسامنا. ¹¹ و مادام مازلنا في هاذي لحياة, دايما نتسلموا للموت على جال المسيح, باه تظهر حياة المسيح في اجسادنا الفانية حتى هي. ¹² مالا الموت يخدم فينا احنا, و لحياة تخدم فيكم انتوما. ¹³ و على خاطر عندنا روح الايمان بالذات, على حساب واش مكتوب: "امنت على هاذيك تكلمت", حتى احنا نامنوا على هاذيك نهدروا ثاني. ¹⁴ عارفين اللي حيّا الرب يسوع من بين الموتى راح بحببنا احنا ثاني بيسوع, و يجعلنا احنا و اياكم بين ايديه. ¹⁵ على خاطر هاذي لحوايج الكل هي على جالكم, باه على قد ما تكثر النعمة يكثروا الشاكرين للمجد تاع الله. ¹⁶ مالا ما نفشلوش, حتى وان كان الانسان اللي ظاهر من لبرى يفنى و يموت, بالصح من الداخل يتجدد يوم ورى يوم. ¹⁷ و هاذي الشدة الوقتية اللي نقاسِيو فيها راح تعدي و تفوت بالصح توجدلنا مجد دايم ما يفناش. ¹⁸ ما نسناوش في لحوايج اللي تتشاف ضرك, بالصح نسناو لحوايج اللي ما تتشافش. على خاطر اللي نشوفوها وقتية برك, اما اللي ما نشوفوهاش هاذيك هي الدايمة.